Dirava Ena Peroveta Herevana—Vaira Negana Ena Helaro Ia Henia
DIRAVA ena Hereva, Buka Helaga, dainai Keristani taudia momokanidia be mai edia abidadama, helaro, bona lalohadai namona ida vaira negana idia laloa. Edia hetura namonamo karana Iehova Dirava ida dainai, vaira negana idia naria noho. “Dirava Ena Peroveta Herevana” Distrik Hebouheboudia edia hereva ginigunana bamona, lagani momo lalodiai Iehova ena Witnes taudia be Baibel ena peroveta herevana idia stadilaia namonamo. Unai dainai, Iehova be unai hebouhebou amo dahaka ia hegaegaelaia iena taunimanima totona? Unai hebouhebou dekenai idia noho taudia ibounai be Baibel idia dogoatao bona idia ura bada idia kamonai. Hebouhebou ena dina ta ta edia sinado be kwara maragidia ta ta dekenai idia torea.
DINA GINIGUNANA: Dirava Ena Hereva Ena Diari Ai Ita Raka Noho
Hereva ladana “Dirava Ena Hereva ese Ita Ia Hakaua” ese ia hahedinaraia Iehova ena taunimanima be tau ta hanuaboi ena dibura lalonai ia laolao matamaia bamona. Dina ia daekau matamaia neganai, ia do itaia namonamo lasi, to ataiai dina ia hedinarai namonamo neganai, ia itaia namonamo diba. Aonega Herevadia 4:18 ena peroveta herevana hegeregerena, Iehova ena taunimanima be Dirava ena peroveta herevana amo ia mai diari momokanina dainai, edia dala idia itaia goevagoeva diba. Idia be lauma dibura dekenai ia rakatanidia lasi idia hekwakwanai totona.
Hebouhebou ena hereva badana, “Dirava Ena Peroveta Herevana Oi Kamonai Namonamo,” ese kamonai taudia ia hadibaia, Iehova idia tahua taudia be mesia koikoi bona peroveta koikoi taudia idia badinaia taudia ese idia abia lalohisihisi bona daradara idia abia lasi. To, Mesia korikorina, Iesu Keriso, ena hereva be momokani vaitani! Hegeregere, Iesu ena toana be hoa dalanai ia idau neganai, unai ese ia hahedinaraia ia be Dirava ena Basileia ena King ai do ia lao. Lagani 1914 ai, Iesu be Basileia siahuna ia abia neganai, ia be Petero Iharuana 1:19 ia gwauraia “daba ena hisiu bada” ai ia lao danu. Hereva ia henia tauna, ia gwau: “Unai Mesia Daba ena Hisiu Bada ese dina, o nega, matamatana ta, kamonai taudia ibounai totona ia matamaia gauna, ia hahedinaraia.”
Adorahi ena program hamatamaia totona, hereva ladana “Diari Bamona Ita Hedinarai” be Efeso 5:8 ia herevalaia badabada, unuseniai aposetolo Paulo be ita ia sisiba henia, ia gwau, “diari taudia bamona do umui noho be namo.” Keristani taudia be diari idia hahedinaraia taudia dainai, Iesu do idia tohotohoa ena anina be haida dekenai Dirava ena Hereva idia harorolaia sibona lasi, to edia mauri lalonai Baibel do idia badinaia danu.
Unai bamona diari hahedinaraia tauna ai oi lao totona, namona be “Dirava Ena Hereva Duahia Karana Oi Moalelaia.” Unai hereva be kahana toi ai idia henia. Abraham Lincoln ena hereva, Baibel be “Dirava ese taunimanima dekenai ia henia harihari gauna namo hereana” ia gwauraia murinai, hereva ginigunana ia henia tauna be helai taudia ia nanadaia, edia Baibel duahia karana ese dahaka ia hahedinarai Iehova ena Hereva idia laloa bada karana dekenai. Kamonai taudia ia hagoadaia Baibel do idia duahia namonamo, nega do idia atoa Baibel sivarai idia lalohadailaia bona idia dibaia gauna matamatana be guna idia dibaia gauna ida do idia hakapua totona.
Unai hereva ena kahana iharuana ese ia hahedinaraia stadi karana be mai anina bada, bona nega ta ta sibona duahiduahi lasi, bema ita ura “aniani korikori” ita abia. (Heberu 5:13, 14) Hereva ia henia tauna ia gwau, stadi karana be ita do ia hagoadaia bada, bema ita ‘sibona eda kudouna ita hegaegaelaia,’ Israela hahelaga tauna Esera ia karaia bamona. (Esera 7:10 NW ) To dahaka dainai stadi karana be mai anina bada? Badina Iehova ida ita hetura karana lalonai ia be gau badana. Unai dainai, ena be Baibel stadilaia totona emu lalona do oi biagua bona do oi hekwarahi, to ena namo be bada herea, moale ia havaraia, bona lalona ia hanamoa. Edena bamona nega do ita atoa, unai mai anina bada stadi ita karaia totona? Hereva ena kahana ihatoina ia henia tauna, ia gwau, ‘nega namona ita hoia’ be namo. (Efeso 5:16, NW ) Oibe, nega ita davaria neganai, ita gaukaralaia namonamo be gau badana.
Hereva ladana “Dirava ese Hesiku Tauna Ia Hagoadaia” ese ia hahedinaraia, hari inai negai taunimanima momo idia hesiku. Unai dainai “siahu badana” amo Keristani hesiai gaukarana ita karaia namonamo totona, Iehova, ‘hesiku taudia ia hagoadaia Tauna,’ ita badinaia be namo. (2 Korinto 4:7; Isaia 40:29) Ita idia hagoadaia diba gaudia be hegeregere Dirava ena Hereva, guriguri, Keristani kongregesen, haroro gaukara ita karaia hanaihanai, Keristani naria taudia, bona abidadama taudia ma haida edia haheitalai. Sinado ena ladana “Nega Ia Ginidae Vadaeni Hadibaia Taudia ai Do Umui Lao” ese ia hahedinaraia Keristani taudia be hahediba taudia bona ma haroro taudia bona “hadibaia” gaukarana dekenai idia gaukara goada be gau badana.—2 Timoteo 4:2.
Unai dina ena hereva ginigabena, “Dirava Idia Heai Henia Taudia Do Idia Kwalimu Lasi,” ese hari inai negai tano haida dekenai Iehova ena Witnes taudia idia samania koikoi, idia gwauraidia tomadiho orea dikana, ia kikilaia. To, ita gari lasi be namo, badina Isaia 54:17 ia gwau: “ ‘Tuari gauna ta ese oi do ia hadikaia diba lasi. Bona oi idia samania gwauraia taudia, be oi ese idia edia hereva ibounai do oi koua diba. Lau ese egu hesiai taudia do lau naria namonamo, bona kwalimu idia dekenai do lau henia.’ Lohiabada ese inai bamona ia hereva vadaeni.”
DINA IHARUANA: Peroveta Herevadia amo Idia Hedinaraia Gaudia
Dina ena siri idia herevalaia murinai, idia mai taudia ese hebouhebou ena nega iharuana hereva kahana toi idia moalelaia bada, ena ladana be “Diari Loalaia Karana amo Iehova Ita Hanamoa.” Hereva ginigunana ese ia hahedinaraia, gabu iboudiai dekenai Keristani taudia edia tahua gauna be haroro gaukara amo Iehova do idia hanamoa be namo. Hereva iharuana ese Dirava ena orea dekenai kamonai taudia ita veria mai ia kikilaia. Edena dala amo? Pura ta ta ai, Baibel stadi vairanai o murinai, miniti 5 eiava 10 ita atoa, Dirava ena orea ia gaukara dalana ita hadibaia totona. Unai hereva toi edia kahana ihatoina ese ia hahedinaraia kara namodia amo Dirava ita hanamoa be gau badana.
Hereva ladana “Iehova Ena Hadibaia Herevadia Ura Henia Bada,” ese Salamo 119 amo idia abia hidi siridia ia kikilaia. Momokani, nega momo ita laloaboio dainai, ita idia hadibaia lou lou be namo. Unai dainai, Salamo torea tauna hegeregerena, Iehova ena hadibaia herevadia ita ura henidia be gau badana!
Bena hereva badana idia henia negana ia ginidae—bapatiso herevana, ena sinado be “Peroveta Herevana Ita Badinaia Dainai Bapatiso Ita Abia.” Bapatiso idia abia gwauraia taudia ia hadibadia, Keriso do idia tohotohoa ena anina be bapatiso idia abia sibona lasi, to iena aena gabudia dekenai do idia raka danu. (1 Petero 2:21) Unai bapatiso matamata taudia ese Ioane 10:16 ena hereva do idia hagugurua karana be hahenamo badana, unuseniai Iesu ia peroveta ia ese “mamoe idaudia” do ia haboudia, iena lauma amo ia abia hidi hahediba taudia do idia bamoa totona!
Adorahi ena program ia hamatamaia neganai, hereva ena ladana “Lauma Helaga Ena Hereva Do Oi Kamonai” ese ia hahedinaraia Iehova ena lauma helaga be Baibel amo, “hesiai tauna mai ena kamonai, bona mai ena kara maoromaoro” amo, bona Baibel amo ita hadibaia lalona ena mamina amo, ita ia hereva henia. (Mataio 24:45) Unai dainai, Keristani taudia ese Dirava hamoalea daladia do idia diba totona, guba amo gado ta idia kamonai be anina lasi. Murinai idia henia herevana ena ladana, “Dirava Badinaia Dalana Hegeregerena Idia Noho Hahediba Herevadia Dogoatao Auka,” ese Keristani taudia ia hagoadaia inai tanobada ese ia havaraia lalohadai dikadia idia dadaraia totona. Momokani, bema eda ura ita biagua lasi, hereva momokani negea taudia bona Satani Diabolo ena hesiai taudia ma haida ese idia havaraia herevadia, ita do idia hadikaia gaudia, do ita itaia. Unai dainai Baibel bona Gima Kohorona bona Awake! lalonai idia noho hereva iboudiai ita duahia hanaihanai be gau badana.
Hereva ma ta ena sinado, “Hereva Momokani Ita Badinaia Noho,” ese ia hahedinaraia Baibel ena “hereva momokani,” eiava Baibel ena hereva namodia edia toana ita diba namonamo be gau badana. (2 Timoteo 1:13) Unai hereva momokani ita lalo-pararalaia ena anina be Dirava kamonai henia ena dala ia hahedinaraia sibona lasi, to hereva momokani ida idia hegeregere lasi herevadia do ita gwauraia diba danu.
Mani oi laloa, Iehova ena vairanai oi be kohu namona bamona. Unai be hahenamo badana ta! Hagai ena peroveta herevana hegeregerena, hereva ena ladana, “ ‘Kohu Namodia’ be Iehova Ena Ruma Idia Hahonua Noho,” be hagoadaia hereva momokanina, badina kamonai taudia ia hadibaia lou, Iehova dekenai “hutuma bada herea” taudia ta ta be kohu namodia bamona. (Apokalupo 7:9, NW ) Unai dainai, Iehova ese tanobada “hamarerea” negana ginigabena ia havaraia neganai, “hisihisi bada herea” amo do ia hamauridia. (Hagai 2:7, 21, 22; Mataio 24:21) To, ita naria noho lalonai, hereva ladana “Peroveta Herevadia Dainai Ita Gima Noho,” ese ia hahedinaraia, gau badana be Iehova ena taunimanima be lauma dalanai idia naria namonamo. Hereva henia tauna ese Iesu ena hereva ia gwauraia, ia gwau: “Do umui naria, badina be umui emui Lohiabada do ia mai negana be umui diba lasi.” (Mataio 24:42) Lauma dalanai edena bamona ita noga noho diba? Namona be Iehova ena hesiai gaukara ita karaia goadagoada, ita guriguri hanaihanai, bona Iehova ena dina badana ita naria noho.
Unai dina ena hereva ginigabena ena sinado be “Peroveta Herevana Dokona Negana Lalonai.” Unai be lagani momo lalodiai do ita laloatao. Dahaka dainai? Badina hereva ia henia tauna ese buka matamata—Pay Attention to Daniel’s Prophecy! ia halasia. Hereva ia henia tauna, ia gwau, “Inai mai ena rau 320 buka namona ese Daniela bukana ena kahana ta ta ibounai ia herevalaia.” Unai abidadama ia hagoadaia herevana ese ia hamomokania, Iehova be ena peroveta Hereva ia hadiaria noho!
DINA IHATOINA: Dirava Ena Peroveta Herevana Do Ia Moru Diba Lasi
Hebouhebou ena dina ihatoina be hereva kahana toi amo idia kehoa, ena ladana be “Ia Abia Hidi Negana Ena Peroveta Herevadia.” Unai kahana toi herevadia be peroveta tauna Habakuku ena hereva badadia toi, Iehova Dirava ena hahemaoro herevadia, edia anina idia kikilaia. Ginigunana be Iehova ena hahemaoro karana idaunegai gwau-edeede Iuda besena totona bona iharuana be dagedage Babulonia taudia totona. Ihatoina be ia do guguru lasi, unai be kara dika taudia ibounai haorea totona. Hereva ihatoina ia henia tauna be kamonai taudia edia lalona dekenai Dirava gari henia karana maorona ia hagoadaia, inai bamona ia hereva neganai, ia gwau: “Momokani, Iehova ese ena siahu ibounai ia gaukaralaia neganai, do ita hoa.”
Hebouhebou ena Baibel drama ena sinado be “Iseda Ahuna Lauma Dalanai Ita Laloa Bada.” Unai lalona tahua drama be Iakobo bona Esau ese lauma gaudia idia laloa karana ia hahedinaraia. Esau be ena ahuna ia dadaraia dainai Iakobo dekenai ia henia bena ia ese ia naria namonamo. Hebouhebou dekenai idia mai taudia ia nanadaia, ia gwau: “Iehova ese ita dekenai dahaka [ahuna lauma dalanai] ia henia?” Hereva henia tauna ia haere, ia gwau: “Ena Hereva, Baibel, ena hereva momokani; mauri hanaihanai helarona; bona iena gwaukau taudia bamona sivarai namona ita harorolaia hahenamona.”
Hereva ma ta ena sinado be “Iseda Davana Bada Ahuna Ena Anina Oi Dekenai be Dahaka?” Iseda ahuna lauma dalana ita laloa maoromaoro dalana be Iehova ena hesiai gaukara bona lauma gaudia ita atoa guna bona sibona eda ura bona tauanina gaudia be gabeai. Unai dala amo Adamu, Esau, bona abidadama lasi Israela taudia bamona do ita karaia lasi, to iseda mauri dalana lalonai iseda hebamo karana Iehova ida do ita atoa guna.
Pablik tok ena ladana, “Gau Ibounai Do Ia Hamatamataia—Ia Gwauraia Guna Bamona,” be “guba matamata” bona “tanobada matamata” idia perovetalaia hereva badadia hani ia kikilaia. (Isaia 65:17-25; 66:22-24; 2 Petero 3:13; Apokalupo 21:1, 3-5) Ia hedinarai goevagoeva, Iehova be unai peroveta herevadia idia guguru negana badana ta ia laloa vadaeni, lagani 537 B.C.E. dekenai iena bese taudia ia hanamoa lou karana do ia hanaia. Oibe, ia be iena Basileia gavamani (“guba matamata”) bona ena tanobada taudia (“tanobada matamata”), tanobada paradaisona do idia noholaia taudia, ia laloa.
Unai hebouhebou ena hereva ginigabena be moale bona lalona hamarerea gauna badana, ena sinado be “Dirava Ena Hereva ese Ita Ia Hakaua Dainai Ita Naria Gaudia.” Unai hereva ese ibounai ia hadibadia lou, Basileia harorolaia gaukarana hagugurua ena “nega be kwadogi.” (1 Korinto 7:29) Oibe, ita be Iehova ena hereva, Satani bona ena nega dikana ibounai do ia haorea herevana do ia guguru negana lalonai ita noho. Salamo torea tauna ena ane bamona ita hereva be namo, ia gwau: “Ita ese Lohiabada ena durua ita naria noho. Ia be iseda durua Tauna bona iseda kesi.” (Salamo 33:20) Dirava ena peroveta herevana hegeregerena idia naria noho taudia edia vaira negana be namo herea!
[Picture on page 7]
Lalona ia hamarerea drama ese Iehova ena hesiai taudia edia ahuna lauma dalanai idia laloa bada karana ia hagoadaia
[Picture on page 7]
Dirava ena peroveta herevana idia laloa bada taudia momo be bapatiso idia abia