Oiemu Kudouna Oi Hegaegaelaia Bena Iehova Oi Tahua
ISRAELA ena hahelaga tauna Esera be stadi tauna, diba bada tauna, toretore tauna, bona Taravatu hadibaia tauna namona. Danu, hari idia noho Keristani taudia dekenai ia be haheitalai namona mai lalona ibounai ida hesiai gaukara ia karaia dainai. Edena dala ai? Ia ese Babulonia, dirava koikoidia bona demoni tomadiho henia taudia edia siti, dekenai ia do noho neganai danu Dirava ia badinaia noho.
Esera ena Dirava badinaia karana ia vara kava lasi. Unai ia vara totona ia gaukara. Oibe, ita ia hamaoroa ia ese “sibona ena kudouna ia hegaegaelaia Iehova ena taravatu amo sisiba do ia tahua bona do ia badinaia” totona.—Esera 7:10, NW.
Esera hegeregerena, hari inai negai danu Iehova ena taunimanima idia ura Iehova ese ia gwauraia gaudia ibounai idia karaia, ena be inai tomadiho momokani inai henia tanobadana ai idia noho. Unai dainai namona be ita danu ese eda kudouna, lalona korikori—iseda lalohadai, kara, ura, bona ura ena badina—ita hegaegaelaia daladia haida ita tahua, ‘Iehova ena taravatu ita tahua bona ita badinaia’ totona.
Iseda Kudouna Ita Hegaegaelaia
“Hegaegaelaia” ena anina be “gaukara ta totona ita hegaegae guna: kara ta, gaukara ta, eiava lalohadai ta totona.” Oibe, bema oi ese Dirava ena Hereva amo diba maoromaoro oi abia bona Iehova dekenai emu mauri oi gwauhamatalaia vadaeni, unai ese ia hahedinaraia oiemu kudouna oi hegaegaelaia vadaeni bona Iesu ena hadoa tauna parabolena ai ia gwauraia “tano namona” ida ita hahegeregerea diba.—Mataio 13:18-23.
To, iseda kudouna ita naria bona hanamoa noho be gau badana. Dahaka dainai? Badina rua dainai. Gau ginigunana be, ita idia hadikaia diba ura dikadia, uma lalonai idia vara ava bamona, karaharaga edia ramuna idia atoa diba, badina inai “nega ena dokona” lalonai Satani ena tanobada ena “hodahoda” be tauanina ena lalohadai ena uhe dikadia amo ia honu momokani. (2 Timoteo 3:1-5; Efeso 2:2, NW ) Badina iharuana be tano. Bema ita naria lasi, karaharaga do ia kaukau, auka, bona anina do ia havaraia lasi. Eiava reana taunimanima momo be uma dekenai do idia raka bona unai tano be tano aukana ai do ia lao diba. Laulau dalanai iseda kudouna ena tano danu be unai bamona. Anina do ia havaraia lasi bema ita naria namonamo lasi eiava lauma dalanai iseda namo idia laloa lasi taudia ese do idia moia.
Vadaeni, ita ibounai ese Baibel ena hagoadaia herevana ita badinaia be mai anina bada, ia gwau: “To gau badana momokani, oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.”—Aonega Herevadia 4:23.
Iseda Kudouna Ena “Tano” Ia Hanamoa Gaudia
Gau haida, eiava kara namodia haida, iseda kudouna ena “tano” idia hanamoa bena anina ia tubu namonamo gaudia, mani ita laloa. Momokani, gau momo ese iseda kudouna idia hanamoa diba, to iniseni ita ese gau 6 do ita herevalaia: lauma aniani ita abia be namo ita lalo-pararalaia, manau, kara maoromaoro, Dirava gari henia, abidadama, bona lalokau karadia.
Iesu ia gwau: “Idia diba lauma gaudia idia tahua be namo taudia idia moale.” (Mataio 5:3, NW ) Tauanina dalanai hitolo ese ita ia hadibaia ita aniani be namo hegeregerena, lauma gaudia ita abia be namo ita laloa noho karana ese ita ia durua lauma hitolona ita abia totona. Vaia taunimanima ese unai bamona aniani idia ura abia badina ia dainai iseda mauri be mai anina bona mai badina. Satani ena tanobada ena doria karadia eiava stadi ita hesikulaia karana ese iseda lauma aniani ura henia karana do ia hadiburaia diba. To, Iesu ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.”—Mataio 4:4.
Aniani namodia idauidau ania hanaihanai karana ese tauanina ia hagoadaia, bona tauanina ia durua, aniani negana gabena ai aniani ania urana ia havaraia. Unai be momokani lauma dalanai danu. Reana oi laloa oi be stadi hanaihanai tauna lasi, to bema dina ta ta ai Dirava ena hereva duahia karana bona Baibel stadi durua bukadia stadilaia hanaihanai karana oi manadalaia, do oi davaria oiemu ura do ia habadaia. Momokani, mai ura bada ida oiemu Baibel stadi negana do oi naria. Unai dainai oi hadokoa haraga kava lasi; oi gaukara goada lauma aniani namona ura henia urana oi habadaia totona.
Manau Karana ese Kudouna Ia Hamanokaia
Manau karana be mai anina bada iseda kudouna ita hegaegaelaia totona, badina ia dainai ita idia hadibaia diba bona lalokau sisibana bona heduru herevadia ita abia dae haraga. King Iosaia ena haheitalai namona mani oi laloa. Iena lohia negana lalonai, Dirava ese Mose amo ia henia Taravatu idia davaria. Iosaia ese Taravatu ena hereva ia kamonai bona ia lalo-parara iena sene taudia be tomadiho momokani amo idia raka siri neganai, ia ese ena dabua ia darea bona Iehova vairanai ia taitai. Dahaka dainai Dirava ena Hereva ese unai pavapava ena kudouna ia hamarerea momokani? Unai sivarai ese ia hahedinaraia iena kudouna be ia “manoka” (NW ) dainai, Iehova ena Hereva ia kamonai neganai ia manau. Iehova ia itaia Iosaia be mai ena manau bona kamonai kudouna bona unai dainai ia hanamoa.—2 King Taudia 22:11, 18-20.
Manau karana ese Iesu ena hahediba taudia, “sikuli bada lasi bona aonega bada lasi taudia,” ia durua dainai lauma ena hereva momokanidia idia lalo-pararalaia bona badinaia diba, “inai tanobada ena” “aonega taudia bona diba taudia” ese idia lalo-pararalaia lasi herevadia unai. (Kara 4:13; Luka 10:21; 1 Korinto 1:26) Unai taudia be idia hegeregere lasi Iehova ena hereva do idia abia dae, badina edia kudouna be hekokoroku ese ia ha-aukaia. Unai dainai ita hoa lasi Iehova ese hekokoroku ia inai henia momokani, ani? —Aonega Herevadia 8:13; Daniela 5:20.
Kara Maoromaoro Bona Dirava Gari Henia Karana
Peroveta tauna Ieremia ia gwau: “Taunimanima edia kudouna be mai koikoi bada, bona mai dika rohoroho danu. Daika ese kudouna ena dala ia diba?” (Ieremia 17:9) Unai koikoi karana be dala momo ai ia hedinarai, hegeregere eda kerere dainai ekskius herevadia ita gwauraia toho. Danu, unai ia hedinarai bema ita ese eda kara kerere badadia dekenai badina maorodia ita gwauraia. To, kara maoromaoro ese ita do ia durua, unai kudouna mai ena koikoi ita halusia totona, ita do ia durua eda kara korikori ita itaia bona hamaoromaoroa diba totona. Salamo torea tauna ia guriguri neganai unai bamona kara maoromaoro ia hahedinaraia, ia gwau: “Lohiabada e, lau do oi tahua bona tohoa, bona egu kara do oi itaia. Egu ura bona egu laloa danu do oi tahua.” Ia hedinarai goevagoeva, salamo torea tauna ese ena kudouna ia hegaegaelaia Iehova amo hagoevaia bona tohoa ia abia dae totona, ena be unai kara ena anina be ia abia dae ia be mai ena kerere badadia bena do ia hahanaia diba.—Salamo 17:3; 26:2.
Dirava gari henia karana, ena anina ta be “kara dika do ita ura henia lasi,” be inai hagoevaia karana dekenai mai ena siahu bada heduru gauna ta. (Aonega Herevadia 8:13) Iehova ena hebogahisi mai lalokauna bona ena kara namo ia laloa bada neganai, Iehova ia gari henia momokani tauna ia diba goevagoeva Iehova be mai ena siahu ia idia badinaia lasi taudia dekenai davana ia henia, eiava ia hamasea totona. Iehova ese Israela taudia ia herevalaia neganai ia hahedinaraia ia idia gari henia taudia ese ia do idia badinaia danu, ia gwau: “Nega ibounai unai bamona bema idia laloa be namo, bona bema lau dekenai idia [gari], bona egu Taravatu bema idia kamonai henia, edia noho be do ia namo, bona edia natudia bona tubudia danu edia noho be do namo ela bona hanaihanai.”—Deuteronomi 5:29.
Ia hedinarai goevagoeva, namo lasi Dirava gari henia karana ese gari bada dainai Dirava badinaia karana ia havaraia, to namona be unai kara ese ita ia veria iseda lalokau Tamana, iseda namo ia tahua tauna, ita badinaia totona. Momokani, unai bamona Dirava gari henia karana ese iseda hemami ia hanamoa bona ita ia hamoalea danu, unai be Iesu ese ia hahedinaraia namonamo.—Isaia 11:3; Luka 12:5.
Ita Hegaegaelaia Kudouna be Abidadama amo Ia Honu
Abidadama goada kudouna ia abia tauna ia diba Iehova ese ena Hereva amo ia henia hakaua herevadia ibounai be idia maoro bona iseda namo idia havaraia. (Isaia 48:17, 18) Unai bamona kudouna ia abia tauna ese Aonega Herevadia 3:5, 6 ena hagoadaia herevana ia badinaia neganai, moale bada ia abia bona ena hemami ia namo, unai siri ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” To, abidadama lasi kudouna ese Iehova ena hereva ia abia dae lasi, bona unai ia vara bema Dirava ena hereva abia dae karana dainai ena ura gaudia do ia dadaraia be namo, hegeregere Basileia ia tahua guna totona ena mauri lalonai gau haida ia rakatania be namo. (Mataio 6:33) Badina namona dainai, Iehova ese abidadama lasi kudouna ia gwauraia “dika.”—Heberu 3:12.
Iseda abidadama Iehova dekenai be dala momo ai ia hedinarai, iseda ruma ai ta ia itaia lasi neganai ita karaia gaudia danu. Hegeregere, Galatia 6:7 lalonai ia noho hakaua herevana mani oi laloa, ia gwau: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia.” Iseda abidadama unai hakaua herevana dekenai be inai gaudia dekenai ia hedinarai, ita itaia muvini piksa, ita duahia bukadia, Baibel stadi dekenai ita haorea negana, bona iseda guriguri. Oibe, “lauma ena gau” ita hadoa totona ita ia veria abidadama goadana be mai anina bada gauna ta, Iehova ena Hereva ita abia dae bona badinaia totona iseda kudouna ita hegaegaelaia karana dekenai.—Galatia 6:8.
Lalokau—Mai Anina Bada Karana
Ita gwauraia karadia iboudiai amo, lalokau ese iseda kudouna ena tano ia hamanokaia momokani Dirava ena Hereva ita abia dae totona. Unai dainai, aposetolo Paulo ese abidadama bona helaro danu ia hahegeregerea neganai, ia gwau lalokau be “hereadaena.” (1 Korinto 13:13, NW ) Dirava lalokau henia karana ese ia hahonua kudouna be Dirava badinaia karana amo lalo-namo bona moale ia abia; Dirava ena hahegani dekenai ia badu lasi. Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioane 5:3) Unai hegeregerena, Iesu ia gwau: “Lau ia lalokau henia tauna ese lauegu hereva do ia badinaia, vadaeni egu Tamana ese do ia lalokau henia.” (Ioane 14:23) Mani oi itaia, bema unai bamona lalokau oi hahedinaraia, oi dekenai do idia hahedinaraia danu. Oibe, Iehova ese lalokau dainai ia dekenai idia lao taudia ia lalokau henidia bada.
Iehova ia diba ita be kara dika taudia bona hanaihanai ia dekenai ita kara dika. To, ita amo sibona ia hadaudaua lasi. Iehova ia ura ena hesiai taudia be mai edia “kudouna ibounai” ida idia gaukara, unai bamona kudouna ese ita ia veria ena hesiai gaukara do ita karaia mai eda moale ida. (1 Sivarai 28:9) Oibe, Iehova ia diba kara namodia be iseda kudouna ai idia tubu bona lauma huahua ita hahedinaraia totona eda nega bona goada do ita haorea. (Galatia 5:22, 23) Unai dainai, ita dekenai ia haheauka noho, “ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:14) Iesu ese unai bamona kara ia hahedinaraia danu, ena hahediba taudia edia kerere dainai ia gwau henidia dikadika lasi, to mai haheauka danu ia durudia bona ia hagoadadia. Iehova bona Iesu ese idia hahedinaraia lalokau, hebogahisi, bona haheauka karadia ese oi idia veria idia oi lalokau henia badabada totona, ani?—Luka 7:47; 2 Petero 3:9.
Bema nega haida oi davaria oi hekwarahi bada edia ramuna idia habadaia vadaeni ava bamona eiava raro aukana bamona karadia oi kokia totona, namona be oi lalohisihisi eiava oi lalo-manoka lasi. To, namona be oiemu kara oi hanamoa totona oi gaukara noho bona ‘guriguri oi goadalaia nega ibounai,’ bona Iehova ena lauma totona oi noinoi. (Roma 12:12) Iehova ia ura ita ia durua dainai, Esera bamona, oi ese emu kudouna oi hegaegaelaia diba “Iehova ena Taravatu oi tahua bona oi badinaia” totona.
[Picture on page 31]
Ena be Babulonia dekenai ia noho to Esera ese Dirava ia badinaia noho
[Picture Credit on page 29]
Garo Nalbandian