Dirava Ena Basileia Do Ia Karaia Gauna
“Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—MATAIO 6:10.
1. Dirava ena Basileia do ia mai ena anina be dahaka?
IESU ese ia murinai idia raka taudia ia hadibaia Dirava ena Basileia totona idia guriguri neganai, ia diba unai do ia mai bona ia ese taunimanima edia lagani tausen momo lohia negana, Dirava ena lohia siahu idia dadaraia negana unai, do ia haorea. Unai nega ibounai lalonai, tanobada dekenai taunimanima momo herea ese Dirava ena ura idia karaia lasi. (Salamo 147:19, 20) To guba dekenai Basileia idia haginia murinai, namona be Dirava ena ura be gabu ibounai dekenai do idia karaia. Taunimanima edia lohia siahuna do ia ore bona Dirava ena guba Basileiana ena lohia siahuna do ia matamaia negana ia kahirakahira momokani.
2. Basileia ena lohia ese taunimanima edia lohia ena gabu ia abia negana ia makaia gauna be dahaka?
2 Iesu ese unai nega do ia makaia gauna ia gwauraia, ia gwau “hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Baibel ese unai nega ena daudau ia gwauraia lasi, to ia lalonai do idia vara gaudia dikadia be guna tanobada dekenai idia vara gaudia dikadia ibounai do idia hanaidia. Hisihisi bada herea ia matamaia neganai, tanobada taudia momo do idia hoalaia gauna do ia vara: tomadiho koikoi ibounai do idia hadikaia ore. To Iehova ena Witnes taudia do idia hoa lasi, badina nega daudau vadaeni unai idia naria. (Apokalupo 17:1, 15-17; 18:1-24) Hisihisi bada herea be Aramagedono ai do ia ore, bona unai neganai Dirava ena Basileia ese Satani ena tanobada ena oromana ibounai do ia hadikaia ore.—Daniela 2:44; Apokalupo 16:14, 16.
3. Ieremia ia gwau dahaka do ia vara gwau-edeede taudia dekenai?
3 Dirava idia diba lasi taudia bona Keriso ese ia gunalaia guba Basileiana ena “Sivarai Namona idia abia dae lasi taudia” dekenai dahaka do ia vara? (2 Tesalonika 1:6-9) Baibel ena peroveta herevana ese ita ia hamaoroa: “Kamonai! Dika be basileia ta dekena amo, ela bona ma basileia ta dekenai ia lao noho. Lai guba badana momokani be ia toa hamatamaia noho, tanobada ena dokona gabudia daudaudia dekena amo. Unai neganai Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho. Tau ta ese idia dainai do ia taitai lasi, bona tau ta ese idia do ia haboua lasi, bona tau ta ese idia do ia guria lasi. Idia be tano ena kopina dekenai do idia noho, boromakau ena kukuri hegeregerena.”—Ieremia 25:32, 33.
Kara Dika Ena Dokona
4. Dahaka dainai Iehova ese inai tanobada ena oromana dikana ia haorea be maoro?
4 Lagani tausen momo lalonai, Iehova Dirava ese kara dika ia koua lasi dainai, nega sisina daudau lalonai kudou-maoro taudia idia itaia diba taunimanima edia lohia dalana be dika. Hegeregere, niuspepa ta ia gwau lagani 1900 ema bona hari, tuari, gavamani hamorua karana, bona heiriheiri ma haida dainai taunimanima milioni 150 bona ma haida idia mase. Tanobada Ibounai Tuarina Iharuana lalonai taunimanima edia kara dika rohorohona ia hedinarai, unai neganai taunimanima milioni 50 bamona idia mase, bona idia momo be Nazi kamepa lalonai hamasea karadia dikadia dainai idia mase. Baibel ese ia perovetalaia hegeregerena, iseda nega lalonai “kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:1-5, 13) Hari inai negai, matabodaga karadia, taravatu utua karadia, dagedage, kara gageva, bona Dirava ena taravatu matauraia lasi karadia be bada herea. Unai dainai, Iehova ese inai tanobada ena oromana dikana do ia haorea be maoro.
5, 6. Idaunegai tanona Kanana dekenai ia noho kara dikadia mani oi gwauraia.
5 Lagani 3,500 bamona gunanai, Kanana tanona lalonai unai bamona kara ia vara danu. Baibel ia gwau: “Idia ese lebulebu karadia ibounai, Lohiabada ese ia badu henidia karadia idia karaia noho, edia dirava hanamoa totona. Oibe, edia natudia, memero bona kekeni be lahi dekenai idia gabua, edia dirava hanamoa totona.” (Deuteronomi 12:31) Iehova ese Israela besena ia hamaoroa: “Unai bese edia kara dika dainai, Lohiabada emui Dirava ese umui emui vairana dekenai idia do ia lulua.” (Deuteronomi 9:5) Baibel ena histori torea tauna Henry H. Halley ia gwau: “Bala, Asataroto, bona Kanana diravadia ma haida tomadiho henia karana lalonai inuinu kekero lebulebuna bada herea idia karaia; edia dubu badadia dekenai kara bodaga idauidau idia karaia.”
6 Halley ese edia kara dika ena bada ia hahedinaraia, badina idia davaria gabudia momo edia gabu ta dekenai, akioleji taudia ese “hodu momo idia davaria, idia lalonai be Bala dekenai idia bouboulaia beibi edia turia.” Ia gwau: “Unai gabu ibounai be beibi maragidia edia guria gabuna. . . . Kanana taudia idia tomadiho neganai, edia dirava vairadiai kara bodaga idia karaia, unai be edia tomadiho karana dainai; bona murinai, edia vara guna natudia idia hamasea, bona edia dirava dekenai idia bouboulaia. Reana, Kanana tanona be Sodoma bona Gomora hanuadia bamona, to Kanana tanona dekenai unai kara idia habadaia momokani. . . . Unai kara bodaga bona dagedage karadia bada hereadia idia karaia bese taudia be mai edia maoro idia do mauri noho totona, a? . . . Kanana hanua gunadia dekenai tano idia geia akioleji taudia idia daradara dahaka dainai Dirava ese idia ia hadikaia ore haraga lasi.”
Tanobada Idia Abia
7, 8. Dirava be edena dala ai inai tanobada do ia hagoevaia?
7 Dirava ese Kanana ia hagoevaia hegeregerena, kahirakahira inai tanobada ibounai do ia hagoevaia bona iena ura idia badinaia taudia dekenai do ia henia. “Kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.” (Aonega Herevadia 2:21, 22) Bona salamo torea tauna ia gwau: “Nega daudau lasi lalonai kara dika taudia do idia ore. . . . To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:10, 11) Satani do ia kokia danu, “tanobada bese do ia koia diba lasi totona, lagani 1000 lalonai.” (Apokalupo 20:1-3) Oibe, “tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17.
8 Iesu ese tanobada dekenai idia ura idia mauri ela bona hanaihanai taudia edia helaro namona ia kikilaia, ia gwau: “Dagedage lasi taudia be idia namo, badina tanobada do idia abia.” (Mataio 5:5) Toana be ia ese Salamo 37:29 ia gwauraia, badina unai siri ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” Iesu ia diba Iehova ena ura be kudou-maoro taudia be tanobada paradaisona dekenai do idia mauri noho ela bona hanaihanai. Iehova ia gwau: “Egu siahu badana bona goada dekena amo tanobada lau karaia, taunimanima bona tanobada ena boroma idauidau danu, bona lau ura henidia taudia dekenai tanobada lau henia.”—Ieremia 27:5.
Tanobada Matamatana Namona
9. Dirava ena Basileia ese edena bamona tanobadana do ia havaraia?
9 Aramagedono murinai, Dirava ena Basileia ese “tanobada matamatana” namona do ia havaraia, bona ia lalonai “kara maoromaoro sibona do ia noho.” (2 Petero 3:13) Aramagedono amo idia roho mauri taudia do idia moale badina inai tanobada ena oromana dikana idia rakatania! Basileia ena guba gavamani henunai ia noho kara maoromaoro tanobada matamatana lalonai idia vareai, bona hahenamo momo bona mauri hanaihanai do idia abia dainai idia moale bada herea!—Apokalupo 7:9-17.
10. Basileia ena lohia henunai, edena gau dikadia do idia noho lasi?
10 Taunimanima be tuari, raskol karadia, hitolo, eiava dagedage animal dainai danu do idia gari lou lasi. “Lau ese [egu taunimanima] danu gwauhamata taravatuna do lau karaia, bona uda boroma dikadia ibounai do lau lulua ore. . . . Huahua audia ese huahua do idia atoa, tano danu ese aniani gaudia do ia havaraia, bona taunimanina ta ta be sibona edia tano korikori dekenai do idia noho, mai maino danu.” “Idia ese edia tuari kaia, be hama dekenai do idia botaia, bona tano geia auridia do idia halaoa. Bona edia io danu be hama dekena amo, au rigidia utua kaia do idia halaoa. Bese idauidau ese tuari do idia karaia lou lasi, ma idia ese tuari ena dala do idia tahua lou lasi. Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi.”—Esekiela 34:25-28; Mika 4:3, 4.
11. Dahaka dainai ita diba momokani gorere idauidau ibounai do idia ore?
11 Gorere, lalohisihisi, bona mase danu do idia ore vaitani. “Idia noho taudia ta ese do ia gwau lasi, ‘Lau be gorere,’ bona Lohiabada ese edia kara dika ibounai do ia gwauatao.” (Isaia 33:24) “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni. . . . ‘Harihari be gau ibounai lau karaia matamata inai.’ ” (Apokalupo 21:4, 5) Iesu be tanobada dekenai ia noho neganai, ia hahedinaraia Dirava ia henia siahu amo unai gaudia ia karaia diba. Lauma helaga ese Iesu ia durua dainai, tano ena kahana ibounai lalonai ia loaloa bona aena dika taudia bona gorere taudia ia hanamoa.—Mataio 15:30, 31.
12. Idia mase vadaeni taudia totona edena helaro ia noho?
12 Iesu ese gaukara ma haida ia karaia danu. Ia ese mase taudia ia hatorea isi lou. Manau taudia be dahaka idia laloa? Ia ese mauri lagani 12 kekenina ia hatorea isi lou neganai, ena tamana bona sinana “idia hoa dikadika.” (Mareko 5:42) Unai be Basileia amo Iesu ese tanobada ibounai lalonai do ia karaia karana ma ta ia haheitalaia, badina unai neganai ‘mase taudia do idia toreisi lou, kara maoromaoro taudia, bona kara maoromaoro lasi taudia danu.’ (Kara 24:15) Mase taudia edia grup ta ta do idia mauri lou bona edia lalokau taudia ida idia hedavari lou neganai, edia moale bada hereana mani oi laloa! Ita daradara lasi, Basileia henunai hadibaia gaukarana badana do ia vara bena “tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”—Isaia 11:9.
Iehova Ena Lohia Siahuna Ena Maoro Hamomokania
13. Edena dala ai Dirava ena lohia siahuna ena maoro do ia hahedinaraia?
13 Basileia ena lagani 1,000 lohia negana ena dokona ai, taunimanima ibounai edia lalona bona tauanina do idia goevadae vadaeni. Tanobada ibounai be paradaiso ai do ia lao, Eden umana bamona. Maino, moale, noho namona, bona taunimanima idia lalokau heheni karana idia noho vadaeni. Taunimanima edia histori ibounai lalonai, Basileia ia do lohia lasi neganai, unai bamona gaudia idia itaia lasi. Bema lagani tausen momo lalonai taunimanima idia lohia negana dikana ita laloa bona Dirava ena guba Basileiana ena lagani 1,000 lohia negana namona ita laloa, edia idau be bada! Unai neganai, do ia hedinarai vadaeni Dirava ese ena Basileia amo ia hahedinaraia lohia dalana be hereadae momokani. Dirava ena lohia siahuna ena maoro do ia hamomokania goevagoeva.
14. Lagani 1,000 idia ore murinai, gwau-edeede taudia dekenai dahaka do ia vara?
14 Lagani 1,000 edia dokona ai, Iehova ese taunimanima goevadaedia do ia koua lasi, to edia ura hegeregerena do idia abia hidi daika idia ura idia badinaia. Baibel ia hahedinaraia “Satani be unai guri dobu masemase dekena amo do idia ruhaia.” Taunimanima do ia koia toho lou, bona idia haida be Dirava ena lohia siahuna do idia dadaraia. To Iehova ia ura lasi hisihisi be “nega iharuana” ai ia vara dainai, Satani, ena demoni, bona Iehova ena lohia siahuna ena maoro idia hepapahuahulaia taudia ibounai do ia hamasea ore. Ta ia gwau diba lasi unai neganai mase hanaihanai idia abia taudia be nega idia henia lasi eiava idia be goevadae lasi dainai kara kererena idia karaia. Lasi, idia be goevadae taudia Adamu bona Heva hegeregerena, idia ese Iehova ena kara maoromaoro lohia dalana idia dadaraia mai edia ura ida.—Apokalupo 20:7-10; Nahumu 1:9.
15. Iehova idia badinaia taudia ese edena bamona hetura karana do idia abia ia danu?
15 To, taunimanima momo herea ese Iehova ena lohia siahuna ena maoro do idia abia isi noho. Gwau-edeede taudia ibounai idia mase vadaeni dainai, kara maoromaoro taudia sibona be Iehova vairanai idia gini, badina hahetoho ginigabena lalonai idia kwalimu vadaeni. Bena Iehova ese ia idia badinaia taudia do ia abia dae iena natudia memero bona kekeni bamona. Idia ese Adamu bona Heva idia do gwau-edeede lasi neganai Dirava ida idia moalelaia hetura karana do idia abia lou. Unai amo, Roma 8:21 do ia guguru: “[Dirava] ia karadia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni [ura] kwalimu momokani do idia abia.” Peroveta tauna Isaia ia gwau: “[Dirava] ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”—Isaia 25:8.
Mauri Hanaihanai Ena Helaro
16. Dahaka dainai davana namona, mauri hanaihanai, ita laloa be maoro?
16 Abidadama taudia ese vaira negana namona idia naria, idia diba Dirava be lauma dalanai bona tauanina dalanai idia do ia hanamoa bada ela bona hanaihanai! Salamo torea tauna be mai ena maoro ida ia gwau: “Oi be emu imana oi kehoa noho bena mauri gaudia ibounai edia ura [maorona] oi hagugurua noho.” (Salamo 145:16, NW ) Iehova ese tanobada helarona idia abia taudia ia hagoadaia, Paradaiso ai do idia noho helarona idia abia dae bona unai be ia idia abidadama henia ena kahana ta. Iehova ese ena lohia siahuna ena maoro ia hamomokania be mai anina, to ia ura lasi taunimanima ese ia do idia hesiai henia bona davana namona abia helarona be lasi. Baibel ibounai lalonai, Dirava badinaia karana bona mauri hanaihanai helarona idia hakapua, badina idia ruaosi be Keristani tauna ese Dirava ia abidadama henia karana lalonai mai anina bada gaudia. “Tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.”—Heberu 11:6.
17. Edena dala ai Iesu ia hahedinaraia iseda helaro ese ita ia durua be maoro?
17 Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Unuseniai Dirava bona ena ura dibaia karana be ena davana namona ida ia hakapua. Haheitalai ta be, kara dika tauna ese Iesu ia noia iena Basileia ia abia murinai ia do ia laloatao neganai, Iesu ia gwau: “Ita ruaosi Paradaiso dekenai do ita ginidae.” (Luka 23:43) Unai tauna ia hamaoroa lasi davana do ia abia lasi to abidadama ia abia be namo. Lasi, Iesu ia diba Iehova ia ura ena hesiai taudia edia helaro be tanobada paradaisona dekenai mauri hanaihanai do idia abia, bena inai tanobada dekenai hahetoho idauidau idia davaria neganai, unai helaro ese idia do ia durua. Unai dainai, Keristani tauna ena haheauka ia durua gauna be ia diba davana namona do ia abia.
Basileia Ena Vaira Negana
18, 19. Lagani 1000 Lohia Negana ia ore neganai, Basileia bona ena King dekenai dahaka do ia vara?
18 Basileia be Iehova ia gaukaralaia gavamanina, bona do ia gaukaralaia tanobada bona idia noholaia taudia do idia goevadae bona ia bona taunimanima huanai maino do ia noho totona. Unai dainai Lagani 1000 Negana ia ore murinai, King Iesu Keriso bona ia ida idia lohia hahelaga taudia 144,000 edia gaukara be dahaka? ‘Unai murinai dokona do ia ginidae, vadaeni Keriso ese gunalaia taudia ibounai, lohia taudia ibounai, bona siahu taudia ibounai ia haorea. Unai neganai Keriso ese Dirava ena Basileia be Tamana Dirava ena imana dekenai do ia atoa. Badina be Keriso ese gau ibounai do ia biagua, ela bona Dirava ese ia dekenai idia tuari taudia ibounai iena aena henunai do ia atodia.’—1 Korinto 15:24, 25.
19 Keriso ese Dirava dekenai Basileia do ia henia neganai, Basileia do ia noho ela bona hanaihanai siridia be edena bamona ita lalo-pararalaia be namo? Basileia ia karaia vadaeni gaudia do idia noho ela bona hanaihanai. Keriso do idia abia isi ela bona hanaihanai, Dirava ena lohia siahuna ena maoro ia hamomokania gaukarana dainai. Unai neganai kara dika bona mase idia ore vadaeni, bona taunimanima ia hoia lou vadaeni dainai, Mauri Hoia Lou Tauna ena gaukara ia ore. Basileia ena Lagani 1000 Lohia Negana ia guguru vadaeni danu; unai dainai Iehova bona kamonai taudia huanai gavamani ta ia noho be anina lasi. Unai neganai, Dirava be “gau ibounai edia biaguna momokani do ia lao.”—1 Korinto 15:28.
20. Nega vairai Keriso bona 144,000 taudia dekenai do idia vara gaudia be edena dala ai ita dibaia diba?
20 Lagani 1000 Lohia Negana ia ore murinai, Keriso bona ia ida idia lohia taudia ese edena dagi gaukarana do idia karaia? Baibel ese unai ia herevalaia lasi. To, ita diba Iehova ese ia havaraia gabudia lalonai hesiai gaukara ena hahenamo momo do ia henia idia dekenai. Hari, namona be ita ibounai ese Iehova ena lohia siahuna ena maoro ita abia isi bona mauri hanaihanai ita abia, bena dohore, ita mauri noho dainai, Iehova ena palani ena King bona ia ida idia lohia bona hahelaga gaukara idia karaia taudia dekenai, bona tanobada bona guba totona, do ita itaia diba!
Hereva Badadia Riviulaia
• Edena lohia dalana matamatana ia mai kahirakahira?
• Edena dala ai Dirava ese kara dika taudia bona kara maoromaoro taudia do ia kota henia?
• Tanobada matamatana lalonai noho be edena bamona?
• Edena dala ai Iehova ese ena lohia siahuna ena maoro do ia hamomokania goevagoeva?
[Pictures on page 17]
“Mase taudia dohore idia toreisi lou, kara maoromaoro taudia bona kara maoromaoro lasi taudia danu”
[Picture on page 18]
Iehova idia badinaia taudia ese ia do idia tura henia namonamo