Iehova Ena Witnes Taudia—Mai Abidadama Goadana ida Idia Raka Vairai!

Lagani Ena Hebou Ripotina

INAI abidadama lasi bona daradara dinadia lalonai, ia hedinarai goevagoeva Iehova ena Witnes taudia be idau, badina idia be Keristani taudia mai edia abidadama goadana. Saturday, October 7, 2000 ai, Watch Tower Bible and Tract Society of Pennsylvania ena lagani ena hebou be Iehova ena Witnes taudia edia Assembly Hall, Jersey City, New Jersey dekenai, idia karaia neganai, unai idia hahedinaraia goevagoeva.a

Program ena seamani, John E. Barr, Iehova ena Witnes taudia edia Hakaua Oreana tauna ta, be ena hamatamaia herevadia lalonai ia gwau: “Tanobada ena taunimanima bilioni momo amo, ita diba bona ita abia dae Iehova ena lalokau Natuna, Keriso Iesu, be guba dekenai terona latanai ia helai, bona ena inai taudia bogaraginai ia lohia noho.” Unai abidadama goadana hamomokania gaudia be tanobada hegegemadai amo idia mai ripoti 6 ese idia hahedinaraia.

Baibel Ena Hereva Momokani ese Meamea Karana Ia Halusia Haiti Dekenai

Haiti dekenai momo ese meamea karana idia abia dae. Brens Komiti taudia edia kodineita, John Norman, ia gwau: “Nega momo taunimanima ese babalau karadia idia karaia sibodia idia gimaia totona.” Babalau tauna ta be aksiden lalonai ena aena ta ia haboioa neganai, ia daradara matamaia. Ia laloa, ‘Edena bamona inai gauna ia vara diba lau dekenai bema lauma ese lau idia gimaia?’ Taunimanima momo hegeregerena, Iehova ena Witnes taudia ese unai tauna dekenai hereva momokani idia hadibaia bona idia durua ena meamea karadia ia rakatania. Haiti dekenai Witnes taudia edia namba ia bada daekau diba, April 19, 2000, ese unai ia hahedinaraia, badina unai dina ai Keriso ena mase laloatao hebouna, Memorial, dekenai idia mai taudia edia namba ese unai tano ena Basileia pablisa taudia edia namba be nega hani amo ia hanaia.

Korea Ena Teritori Badana Dekenai Ura Bada Ia Noho

Korea dekenai, Iehova ena Witnes taudia 40 pesen be ful-taim hesiai gaukara idia karaia. Brens Komiti taudia edia kodineita, Milton Hamilton, ia gwau: “Unai tuari orea badana ese emai teritori lalonai idia noho taudia 47 milioni mai kahana be hua ta ta ibounai lalonai idia haroro henidia.” Taia kudima taudia edia kongregesen ena tubu ia hedinaraia goevagoeva. Taia kudima taudia edia sekit ta lalonai, Baibel stadi ibounai 800 idia karaia. Averes dekenai, pablisa ta ta ese stadi tamona ia karaia. Madi, tadikaka matamatadia momo edia gini siri karana dainai, dibura dekenai idia do atoa noho. To, dibura naria taudia ese unai abidadama Keristani taudia idia kara namo henidia, bona idia abidadama henia taudia sibona ese idia karaia diba gaukaradia idia henia.

Mexico ai Witnes Taudia Edia Namba Ia Bada Daekau Karana Idia Durua

August 2000 ai, Mexico dekenai, Basileia harorolaia taudia 533,665 ese edia haroro ripoti idia henia. Memorial dekenai idia mai taudia ese unai namba be nega toi amo ia hanaia. Brens Komiti taudia edia kodineita, Robert Tracy, ia gwau: “Emai tahua gauna inai lagani totona be, ai ura Kingdom Hall 240 ai haginia.” Ma ia gwau: “To, ai ura ma momo ai abia.”

Mexico dekenai Iehova ena Witnes taudia edia huanai idia noho matamata taudia be haheitalai namona. Katolik pris ta ese matamata ta ia herevalaia neganai, ia gwau: “Lau ura ia bamona ta be egu murinai idia raka taudia edia huanai ia noho. Inai taudia edia ura goadana bona Baibel be aonega dalanai idia gaukaralaia dainai, idia lau laloa bada. Dirava ena lohia siahuna idia abia isi, ena be reana unai dainai edia mauri do idia haboioa.”

Sierra Leone Dekenai Heiriheiri Huanai Kara Maoromaoro Idia Hahedinaraia

April 1991 amo, Sierra Leone dekenai tano tamona taudia tuari heheni karana ia vara neganai, taunimanima tausen momo idia mase vadaeni, bero idia abia, eiava edia imana o aena idia haboioa. Brens Komiti taudia edia kodineita, Bill Cowan, ia gwau: “Tuari bona mauri aukana ese taunimanima edia mauri ia haidaua momokani. Iseda sivarai idia laloa maragi taudia be hari mai edia ura bada ida idia kamonai. Taunimanima be reana ta ese ia boiria lasi to maoromaoro Kingdom Hall dekenai idia mai edia hebou ginigunana abia totona be nega momo ia vara. Nega momo dala dekenai Baibel stadi totona tadikaka idia nanadaia.” Ena be unai tano ai heiriheiri ia vara noho, to Basileia harorolaia gaukarana be huahua ia havaraia noho Sierra Leone dekenai.

Haginia Gaukara Badana South Africa Dekenai

Hari inai negai, South Africa ena brens opesi ese ia naria teritori dekenai, Kingdom Hall tausen haida idia haginia be namo. Kingdom Hall handred momo idia haginia vadaeni. Brens Komiti tauna ta, John Kikot, ia gwau: “Ruma maragina eiava au henunai idia hebou lasi, guna idia karaia bamona, to iseda tadikaka be gabu namona mai ena helai gaudia namodia dekenai idia hebou. Ena be unai Kingdom Hall momo edia toana be idau lasi, to idia namo herea bona edia gabu dekenai idia noho rumadia amo idia be idau momokani. Gabu haida dekenai, idia davaria Kingdom Hall ta idia haginia murinai, murina laganina lalonai kongregesen be nega rua amo do ia bada.”

Witnes Uru Matamatana Ukraine Dekenai

Lagani 2000 ena hesiai laganina lalonai, unai tano ena pablisa ibounai edia namba badana be 112,720. Idia amo 50,000 mai kahana ese Baibel ena hereva momokani be idia hanaia lagani ima lalonai idia dibaia. Brens Komiti taudia edia kodineita, John Didur, ia gwau: “Momokani, Iehova ese Witnes uru matamatana mai goadana ia haginia, ena ladana idia gwauraia hedinarai totona!” Ma ia gwau: “Idia hanaia lagani rua lalonai, ai be magasin 50 milioni mai kahana ai hariharilaia vadaeni,unai be tano ena taunimanima ibounai edia namba ida ia hegeregere. Hua ta ta ai, averes dekenai, kamonai taudia be hereva ma haida idia diba totona brens opesi dekenai revareva tausen momo idia siaia.”

Lalona Veria Gaudia ma Haida Program Lalonai

Daniel Sydlik, Hakaua Oreana tauna ta, ese lalona veria herevana ta ia henia. Hereva ladana “Hakaua Oreana Bona Gaukara Oreana Idia Idau Dalana,” inai magasin dekenai, be unai hereva amo idia abia.

Theodore Jaracz, Hakaua Oreana tauna ta, ese lalona ia veria herevana ladana “Tiokratik Dalanai Idia Abia Hidi Naria Taudia Bona Hesiai Taudia” ia henia. Inai magasin lalonai ia noho hereva ta be unai hereva amo idia abia.

Lagani ta ta hebouna dekenai Hakaua Oreana tauna, David Splane, ese hereva mai goadana lagani 2001 ena siri badana dekenai ia henia danu. Unai be aposetolo Paulo ena hereva amo, ia gwau: ‘Do umui gini goada bona Dirava ena ura ibounai be do umui diba namonamo.’ (Kolose 4:12) Iehova ena Witnes taudia tanobada hegegemadai ese edia lalona idia hadaia unai bamona do idia karaia, mai edia abidadama ida Dirava ena Basileia sivarai namona be tanobada ibounai dekenai idia harorolaia lalonai.​​—⁠Mataio 24:14.

[Footnote]