Mase Murinai Mauri Ia Noho, A?

LAGANI 3,500 gunanai, bese kwarana tauna Iobu ia henanadai: “Bema tau ta ia mase, ia be do ia mauri lou, a?” (Iobu 14:14) Lagani tausen momo lalodiai taunimanima ese unai henanadai idia laloa bona idia daradaralaia. Idia hanaia laganidia lalonai, bese idauidau ese unai hereva idia lalohadailaia bona hahediba herevadia idauidau idia havaraia.

Sibona idia gwauraia Keristani taudia momo be guba bona hel idia abia dae. To, Hindu taudia ese mase tauna ena souli be tauanina idauna ta lalonai ia vara lou herevana idia abia dae. Islam tomadiho gabuna ta ai ia gaukara tauna ta, Emir Muawiyah, ese Muslim taudia edia lalohadai ia herevalaia, ia gwau: “Ai abia dae lalohadaina be mase murinai hahemaoro dinana ta do ia vara, bona unai neganai Dirava, Allah, vairanai do oi gini, hegeregere kota dekenai oi lao bamona.” Islam tomadiho idia abia dae herevana be Allah ese ta ta ena mauri dalana do ia tahua bena paradaiso dekenai eiava hel lahina dekenai do ia siaia lao.

Sri Lanka dekenai, Buddhist taudia bona Katolik taudia be edia ruma bese lalodiai ta ia mase neganai, ruma edia iduara bona uindo do idia kehoa badabada. Oela lamepa ta idia gabua, bona mase mauana idia atoa neganai mase tauna ena aena be vaira iduarana ena kahana dekenai idia lao. Idia laloa unai kara ese dala ia kehoa mase tauna ena lauma be ruma ia rakatania totona.

University of Western Australia tauna ta, Ronald M. Berndt, ia gwau Australia ena Aborigine taudia idia abia dae lalohadai be, “taunimanima be mai edia lauma bona ia mase diba lasi.” Africa ena iduhu haida idia abia dae lalohadai be, taunimanima oredia ibounai be mase murinai lauma taudia ai idia lao, to ladana bada taudia be tubuna laumadia ai idia lao, bona idia do idia matauraia bona gunalaia laumadia bamona edia heduru do idia noidia.

Tano haida dekenai mase taudia dainai idia abia dae herevadia be kastom bona Keristani lalohadai hakapua karana amo idia vara. Hegeregere, West Africa dekenai, Katolik bona Protestan taudia momo edia kara be ta ia mase neganai, hevarivari idia koua, unai amo ta ese mase tauna ena lauma do ia itaia lasi.

Inai henanadai, ‘Ita mase neganai ita dekenai dahaka ia vara?’ dekenai, taunimanima edia haere be idauidau. To, edia lalohadai badana be inai: Taunimanima lalonai ia noho gauna ta ia mase diba lasi bona mase murinai ia mauri noho. Haida idia abia dae unai gauna be “lauma.” Hegeregere, Africa bona Asia ena gabu haida dekenai bona Pacific besedia Polynesia, Melanesia, bona Micronesia huanai, momo idia laloa lauma​—⁠souli lasi​—⁠be ia mase diba lasi. Bona gado haida dekenai inai hereva “souli” be lasi.

Ia mauri noho tauna ta lalonai lauma ta ia noho, a? Mase neganai, momokani lauma be tauanina ia rakatania, a? Bema unai be momokani, unai lauma dekenai dahaka ia vara? Bona mase taudia totona dahaka helaro ia noho? Unai henanadai do ita haerelaidia be namo. Herevana oiemu kastom eiava tomadiho be dahaka, to mase be ita ibounai dekenai do ia vara gauna ta. Unai dainai inai henanadai be mai edia anina bada oi dekenai danu. Oi ai hagoadaia unai do oi laloa totona.