Nikodemo amo Gau ta Oi Dibaia

“TAU ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.” (Luka 9:23) Idia manau haoda taudia bona taunimanima ese idia dadaraia takisi moni gogoa tauna ese unai boiboi herevana idia abia dae. Iesu murinai idia raka totona edia gau ibounai idia rakatania.​​—⁠Mataio 4:​18-22; Luka 5:​27, 28.

Hari inai negai danu, Iesu ena boiboi herevana ita kamonai noho, bona momo ese idia abia dae. To, Iehova ena Witnes taudia ida mai moale ida Baibel idia stadilaia taudia haida be ‘sibona dekenai do idia laloa lasi bona edia satauro do idia abia isi’ totona idia daradara. Idia be Iesu ena hahediba taudia ai do idia lao ena maduna bona hahenamo idia ura henia lasi.

Dahaka dainai haida ese Iesu ena boiboi herevana abia dae karana bona Iehova Dirava dekenai sibodia edia mauri idia gwauhamatalaia karana idia daradaralaia? Momokani, Iuda bona Keristani taudia edia Dirava tamona tomadiho henia dalana ai idia tubu daekau lasi taudia be siahu ibounai Havaraia Tauna tamona ia noho idia lalo-pararalaia namonamo totona reana nega bada idia halusia. To, herevana gabeai idia abia dae momokani Dirava be momokani ia noho, idia haida be Iesu ena aena gabudia dekenai idia ura lasi idia raka. Reana idia gari edia varavara bona turadia ese idia do idia lalo-dika henia bema Iehova ena Witnes taudia ai idia lao. Ma haida, ita be dokona negana lalonai ita noho idia laloaboio taudia, be ladana bada bona moni bada idia tahua. (Mataio 24:​36-42; 1 Timoteo 6:​9, 10) Iesu murinai idia raka taudia ai idia lao haraga lasi taudia, herevana badina be dahaka, be Iesu ena nega ai ia noho kohu momo Iuda lohia tauna ta Nikodemo ena sivarai amo gau ta oi dibaia.

Dala Ia Kehoa Hahenamo Badadia Ia Abia Totona

Iesu be hua 6 bamona tanobada dekenai ena hesiai gaukara ia karaia murinai, Nikodemo ia abia dae Iesu be “hadibaia tauna, Dirava dekena amo.” Nikodemo be Pasova 30 C.E. ai Iesu ese Ierusalema ai ia karaia hoa karadia ia laloa bada dainai, hanuaboi ai ia lao, Iesu dekenai ena abidadama ia gwauraia hedinarai bona unai hadibaia tauna ia dibaia namonamo totona. Unai neganai, Iesu ese Nikodemo dekenai Dirava ena Basileia lalonai vareai dalana ia hadibaia totona “vara lou” ena hereva momokani ia herevalaia. Unai negai, Iesu be ma ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”​​—⁠Ioane 3:​1-16.

Nikodemo dekenai ia kehoa dalana be namo herea! Iesu ena turana namona ta ai do ia lao diba, bona Iesu ena mauri tanobada dekenai ia itaia diba. Nikodemo be Iuda taudia edia lohia ta bona Israela dekenai ia be hadibaia tauna dainai, Dirava ena Hereva ia diba namonamo. Ia hedinarai ia be lalo-parara tauna danu, badina ia diba Iesu be Dirava ese ia siaia hadibaia tauna. Nikodemo be lauma gaudia ia laloa bada, bona ia be manau tauna. Reana Iuda taudia edia kota badana ena memba ta ese ogogami kapenta tauna ena natuna be Dirava ese ia siaia tauna ia gwauraia be ia auka! Iesu ena hahediba tauna ta ai ia lao tauna dekenai unai kara namodia be mai anina bada.

Toana be Nikodemo ese unai Nasareta tauna ia laloa bada noho. Lagani rua mai kahana murinai, Raurau Ruma Maragidia Ariana idia karaia neganai, Nikodemo be Sanhedrin taudia edia hebou dekenai ia lao. Unai nega ai, Nikodemo be unai “orea tauna ta.” Dubu biagudia bona Farisea taudia be edia hesiai taudia idia siaia Iesu idia dogoatao totona. Hesiai taudia idia giroa lou bona idia gwau: “Hamatamaia nega dekena amo ia mai bona hari, tau ta ia hereva lasi inai tau ia hereva bamona.” Farisea taudia be unai taudia idia hamaragia matamaia: “Be, umui danu ia ese ia koia vadaeni? Sedira hanua edia lohia ta, o Farisea taudia ta ese ia dekenai idia abidadama vadaeni, a? Lasi momokani. To inai ariara taunimanima be Mose ena taravatu idia diba lasi. Idia be Dirava dekena amo dika davana do idia davaria.” Nikodemo be ia haheauka diba lasi bona ia hereva. Ia gwau: “Iseda taravatu ese tau ta do ia kota henia neganai, be iena hereva do idia kamonai guna, ani, bona iena kara do idia diba guna, ani?” Bena Farisea taudia ma haida ese ia idia maumauraia: “Oi danu Galilea tauna, a? Do oi tahua, bona do oi diba, peroveta tauna ta Galilea dekenai do ia vara lasi.”​​—⁠Ioane 7:​1, 10, 32, 45-52.

Hua 6 murinai, lagani 33 C.E. ena Pasova Dinana ai, Nikodemo be satauro amo Iesu ena tauanina idia abia diho ia itaia. Iosepa Arimatea tauna, Kaunsolo tauna ma ta, ia durua bona Iesu ena tauanina idia guria totona idia hegaegaelaia. Unai totona, Nikodemo ese “muro bona aloe edia muramura idia mikisi gauna” ia abia lao, ena metau be kilogaram 33 bamona. Unai muramura ena davana be bada. Danu, ia gari lasi be namo, badina ena bamodia Farisea taudia ese Iesu idia gwauraia “koikoi tauna” bona Iesu ia durua dainai reana do idia gwau ia danu be unai bamona. Iesu ena tauanina be do idia guria totona idia hegaegaelaia haraga bona idia ruaosi ese unai gabu kahirakahira ai, Iesu ena tauanina be guria gabu matamatana ta dekenai idia atoa. To unai neganai danu, Nikodemo idia gwauraia lasi Iesu ena hahediba tauna!​​—⁠Ioane 19:​38-42; Mataio 27:63; Mareko 15:⁠43.

Ia Daradara Ena Badina

Nikodemo be ena “satauro do ia abia isi” bona Iesu ena murinai do ia raka totona ia daradara ena badina be Ioane ese ena sivarai lalonai ia hahedinaraia lasi. To, ia gwauraia gaudia haida amo unai Farisea tauna ena daradara ena badina ita davaria diba.

Gau ginigunana be, Ioane ese ia hahedinaraia unai Iuda edia lohia tauna be “hanuaboi ta Iesu dekenai ia lao.” (Ioane 3:⁠2) Baibel ia diba bada tauna ta ia gwau: “Nikodemo be hanuaboi ai ia lao, ia gari dainai lasi, to badina ia ura lasi taunimanima hutuma ese ia bona Iesu edia herevahereva idia hadikaia.” To, Ioane ese Nikodemo ia gwauraia “gunaguna neganai Iesu dekenai ia lao hanuaboi lalonai tauna” neganai, ia ese Iosepa Arimatea tauna ia gwauraia “Iesu ena diba tahua tauna ta, to Iuda taudia dekenai ia gari dainai, iena abidadama ia hunia.” (Ioane 19:​38, 39) Unai dainai, toana be Nikodemo be hanuaboi ai Iesu dekenai ia lao ena badina be ‘Iuda taudia dekenai ia gari dainai,’ iena negai idia noho taudia ma haida be idia gari dainai Iesu idia abia dae lasi hegeregerena.​​—⁠Ioane 7:⁠13.

Iesu ena hahediba tauna ta ai oi do lao lasi ena badina be emu varavara, turadia, eiava gaukara turadia ese reana do idia gwauraia herevadia dainai, a? Aonega herevana ta ia gwau “taunimanima do oi gari henia neganai, dika do oi davaria, tarapu lalonai oi moru bamona.” Unai gari be edena bamona oi hanaia diba? Aonega herevana ma ia gwau: “To bema Lohiabada oi abidadama henia neganai, mauri do oi davaria noho.” (Aonega Herevadia 29:25) Emu abidadama Dirava dekenai oi habadaia totona, namona be sibona oi mamia dika bada ia vara neganai Dirava ese oi do ia durua. Iehova oi guriguri henia, bona oi noia oi dekenai goada ia henia, emu tomadiho karadia lalonai abia hidi maragidia oi karaia totona. Gabeai, emu abidadama Iehova dekenai do ia goada bona oi be hegeregere, Dirava ena ura hegeregerena abia hidi badadia do oi karaia diba totona.

Nikodemo ena dagi bona ia be lohia oreana ena memba dainai ia abia ladana bada ese reana ia idia koua danu bona sibona laloa lasi ena dala badana ia abia hidi lasi. Unai neganai, ena Kaunsolo dagina ia do laloa bada noho. Keriso murinai raka tauna ta ai oi lao karana oi daradaralaia, badina emu dagi badana taunimanima huanai do oi haboioa eiava emu dagi habadaia daladia haida oi hadikaia diba, a? Unai gaudia ta lasi be guba bona tanobada ia biagua Ataiai Momokani Diravana, mai ena ura ida emu ura hegeregerena oi noia gaudia ia henia Diravana, oi hesiai henia ena hahenamo hegeregerena lasi.​​—⁠Salamo 10:17; 83:18; 145:⁠18.

Nikodemo ena daradara ena badina ma ta be reana iena kohu bada. Ia be Farisea tauna dainai, reana “moni dekenai idia laloa bada” taudia ma haida ese ena lalona idia veria. (Luka 16:14) Ia be hegeregere dava bada gauna muro bona aloe edia muramura idia mikisi gauna ia hoia diba dainai, ita diba ia be kohu bada tauna. Hari inai negai haida be Keristani tauna ena maduna idia huaia haraga lasi, badina kohu idia laloa momo. To, Iesu ese ena murinai idia raka taudia ia hamaoroa: “Mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. . . . To emui Tamana guba dekenai ia noho be ia diba, umui ura gaudia ibounai be unai. To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.”​​—⁠Mataio 6:​25-33.

Gau Momo Ia Reaia

Nikodemo ena sivarai be Ioane ena Evanelia bukana sibona lalonai ia hedinarai, bona ia be Iesu murinai ia raka tauna ai ia lao eiava lasi ia gwauraia lasi. Taunimanima edia sivarai ta ia gwau, Nikodemo be Iesu murinai ia raka matamaia, ia bapatiso, Iuda taudia ese idia dagedage henia, ena dagi idia kokia, bona gabeai Ierusalema amo idia lulua. Unai be herevana, ita diba namonamo gauna be inai: Iesu be tanobada ai ia noho neganai Nikodemo be ia daradara dainai gau momo ia reaia.

Bema Nikodemo be Lohiabada ia davaria negana ginigunana lalonai ena murinai ia raka matamaia, ia be Iesu ena hahediba tauna namona ta ai ia lao diba. Nikodemo be ena diba, lalo-parara, manau, bona lauma gaudia ia laloa bada dainai, hahediba tauna hereadaena ta ai ia lao diba. Oibe, ia ese Hadibaia Tauna Badana amo hereva namodia ia kamonai diba, Iesu ia gwauraia haheitalai idauidau amo diba bada ia abia diba, Iesu ese ia karaia hoa karadia badadia ia itaia diba, bona Iesu be aposetolo taudia ia rakatania neganai idia dekenai ia henia herevana amo goada ia abia diba. To ia ese unai gau ibounai ia reaia.

Nikodemo be ena daradara karana dainai gau momo ia reaia. Iesu ena lalokau boiboina danu, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” (Mataio 11:​28-30) Nikodemo be Iesu amo unai laga-ani abia dalana ia reaia!

Oi be Edena Bamona?

Lagani 1914 amo, Iesu Keriso be guba dekenai Dirava ena guba Basileia lalonai ia lohia. Iena noho negana lalonai do idia vara gaudia ia perovetalaia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Dokona ia do ia ginidae lasi neganai, tanobada ibounai haroro gaukarana ia guguru be namo. Iesu Keriso be mai moale ida goevadae lasi taudia ia abia dae, unai gaukara idia durua totona. Oi danu be unai gaukara oi durua diba.

Nikodemo ia diba Iesu be Dirava amo ia mai. (Ioane 3:⁠2) Reana oi danu be Baibel stadilaia karana amo unai lalohadai tamona oi abia. Reana emu mauri dalana oi haidaua, bena Baibel ena kara maoromaoro taravatudia hegeregerena oi noho. Reana Baibel amo emu diba oi habadaia totona Iehova ena Witnes taudia edia hebou oi lao henidia. Unai bamona hekwarahi dainai oi ai hanamoa. To, Nikodemo ia lalo-parara Iesu be Dirava ese ia siaia to unai sibona be ia hegeregere lasi. Namona be “sibona dekenai do ia laloa lasi, dina ibounai iena satauro do ia abia isi, [bona Iesu] murina dekenai do ia raka.”​​—⁠Luka 9:⁠23.

Aposetolo Paulo ese ita ia hamaoroa herevana oi badinaia be namo. Ia gwau: “Ai be Dirava danu ai gaukara hebou dainai, umui ai noia goada inai bamona, ‘Umui ese Dirava ena hariharibada umui abia vadaeni, be umui negea kava lasi.’ Badina Dirava be inai bamona ia hereva, ia gwau: ‘Lauegu hariharibada henia ena dina ia ginidae neganai, umui emui taitai lau kamonai. Lau ese mauri umui do lau henia dinana ia ginidae neganai, umui dekenai durua do lau henia.’ Umui kamonai! Dirava ena hariharibada ita abia ena nega namona be harihari! Hari dina hamauria ita abia dae be namo!”​​—⁠2 Korinto 6:​1, 2.

Hari be nega namona kara ta oi karaia totona oi ia durua abidadama do oi habadaia. Unai ia vara totona, Baibel ai oi stadilaia gaudia oi laloa dobu. Iehova oi guriguri henia bona oi noia oi do ia durua, unai bamona abidadama oi hahedinaraia totona. Iena heduru mamina oi abia neganai, ia oi laloa bada bona oi lalokau henia bada bona unai ese oi do ia doria ‘sibona dekenai do oi laloa lasi, dina ibounai iena satauro do oi abia isi, bona Iesu murina dekenai do oi raka.’ Hari do oi karaia, a?

[Picture on page 9]

Matamanai, Nikodemo be mai lalo-goada ida Iesu ia durua

[Picture on page 9]

Ena be Iesu idia dagedage henia, to Nikodemo be ena tauanina idia guria totona idia hegaegaelaia neganai heduru ia henia

[Picture on page 10]

Sibona emu stadi bona guriguri karana ese oi do ia hagoadaia hahediba tauna ai oi lao totona

[Picture on page 10]

Iesu Keriso ena gunalaia henunai do oi gaukara ena hahenamo oi abia dae, a?