Duahia Taudia Edia Henanadai

Mose ena Taravatu ese varavara taudia haida edia headava ia taravatua, to hari inai negai Keristani taudia dekenai unai taravatu be mai anina, eiava?

Iehova ese Israela besena dekenai ia henia Taravatu be headava ariadia bona edia karaia daladia ia gwauraia momo lasi. To, headava haida ia taravatua. Hegeregere, Levitiko 18:​6-​20 ai, “varavara ta” adavaia karana ia taravatua ena lista ita davaria. Unai siri ese ia hahedinaraia edena varavara taudia idia mahuta hebou lasi be namo. Momokani, Keristani taudia be Mose ena Taravatu henunai idia noho lasi eiava iena taravatu ese ia koudia lasi. (Efeso 2:15; Kolose 2:14) To, ita gwau lasi Keristani taudia ese adavana ta idia abia hidi neganai unai taravatu do idia laloa lasi. Badina idauidau dainai unai be momokani.

Gau ginigunana be, gavamani ena taravatu haida ese varavara korikori taudia edia headava idia taravatua, bona Keristani taudia ese idia noholaia tanona ena taravatu idia badinaia be gau badana. (Mataio 22:21; Roma 13:⁠1) Momokani, unai bamona taravatudia be gabu ta ta dekenai do idia idau. Hari inai negai taravatu momo idia haginia badina tauanina ena genetik taravatudia idia diba vadaeni. Taunimanima idia diba varavara korikori taudia idia headava neganai, reana edia natudia edia tauanina do ia dika diba bona gorere idauidau idia davaria diba. Idia headava gwauraia Keristani taudia ese unai badina bona “gavamani do idia kamonai henia” karana idia laloa bada dainai, edia gabu dekenai idia noho headava taravatudia idia badinaia be namo.

Gau ma ta be, ta ena noho gabuna dekenai, taunimanima be kara haida idia abia dae bona kara haida idia abia dae lasi. Kahirakahira gabu iboudiai edia taravatu bona kastom karadia ese varavara korikori taudia edia headava idia koua, nega momo idia laloa ia be ruma bese taudia sihari henia karana bona unai dainai ia be taravatu. Ena be gabu idauidau ai headava taravatua daladia be idau, to The Encyclopædia Britannica ia gwau: “Gabu momo dekenai idia ura lasi varavara korikori, ruma bese tamona taudia unai, idia mahuta hebou, mai goada bada ida unai kara idia gwauraia dika bona taravatu idia atoa.” Reana Keristani taudia idia diba ruma bese taudia sihari henia karana idia karaia lasi, to idia ura lasi taunimanima edia kastom bona taravatu idia laloa lasi, badina unai amo reana Keristani kongregesen bona Dirava ena ladana do idia hadikaia.​​—⁠2 Korinto 6:⁠3.

Dirava amo ita abia lalona ena mamina ita laloaboio lasi be namo. Taunimanima ibounai idia vara neganai maoro bona kerere, dika bona namo, edia toana idia diba. (Roma 2:​15) Edia lalona ena mamina ese ia hadibadia dahaka be vaia idia karaia bona maoro bona dahaka be dika bona taravatu, to miro karadia ese edia lalona ena mamina idia hagagevaia eiava idia hamasea diba. Iehova ese Israela taudia dekenai varavara korikori taudia adavaia karana ia taravatua neganai, unai kara ia hahedinaraia danu. Ita duahia: “Umui be guna Aigupito tano dekenai umui noho, to Aigupito taudia edia kara bamona do umui karaia lasi. Bona umui do lau hakaua vareai Kanana tano ena taudia edia kara bamona do umui karaia lasi. Edia taravatu danu do umui badinaia lasi.” (Levitiko 18:⁠3) Keristani taudia ese Baibel amo idia hadibaia lalona ena mamina idia naria namonamo, bona idia ura lasi tanobada taudia edia lalohadai kererena, maoro bona dika dekenai, ese ia hadikaia.​​—⁠Efeso 4:​17-19.

Vadaeni dahaka ita gwau diba? Ena be Keristani taudia be Mose ena Taravatu henunai idia noho lasi, to edia lalona ena mamina ese ia hadibadia goevagoeva varavara korikori taudia​​—⁠hegeregere tama bona ena natuna kekeni, sina bona ena natuna merona, mero bona iena taihuna⁠—idia headava be maoro lasi bona Keristani kongregesen ese do ia abia dae lasi.a Keristani taudia idia diba reana gavamani be varavara taudia ma haida adavaia karana dekenai taravatu ia atoa bona edia gabu dekenai idia noho taudia bona edia bese edia kastom bona idia abia dae gaudia be idauidau. Namona be unai gaudia ita laloa namonamo, unai amo Baibel ena oda do ita badinaia diba, ia gwau: ‘Taunimanima iboudiai ese headava do idia matauraia be namo.’​—⁠Heberu 13:​4, NW.

[Footnote]