Ororo Dekenai Ia Noho Hanuana
IESU be ena Haroro Herevana Badana ia henia lalonai ena hahediba taudia ia hamaoroa: “Umui be tanobada taudia ibounai edia diari. Ororo dekenai ia noho hanua be ia hunia diba lasi.”—Mataio 5:14.
Iuda bona Galilea edia taoni momo be ororo dekenai idia haginia, to koura dekenai idia haginia lasi. Ororo idia abia hidi ena badina badana be dika idia koua totona. Idau bese edia tuari oreadia sibona lasi, to raskol taudia edia tuari orea momo be Israela taudia edia hanua idia hadikaia danu. (2 King Taudia 5:2; 24:2) Gari lasi taudia be ororo dekenai gabu tamona ai idia haginia rumadia idia naria namonamo diba, to tano palakana dekenai unai be auka, bona unuseniai haba badana ta idia haginia be namo.
Nega momo Iuda taudia edia ruma edia haba be semenisi kurokurona amo idia koua dainai, ororo dekenai idia gini hebou ruma kurokurodia momo be gabu daudauna amo idia itaia haraga diba. (Kara 23:3) Palestine ena dina ena diari badana lalonai, unai ororo dekenai idia noho taoni be sisima edia dala idia hahedinaraia lamepadia bamona idia diari, hari iseda negai Meditereinien taoni idia do diari noho hegeregerena.
Iesu ese unai Galilea bona Iuda tanodia edia toana ia gaukaralaia, ena murinai idia raka taudia dekenai Keristani tauna korikorina ena kara ia hadibadia totona. Idia ia hamaoroa: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:16) Ena be Keristani taudia be kara namodia idia karaia lasi taunimanima ese idia hanamodia totona, to taunimanima ese edia kara namodia idia itaia.—Mataio 6:1.
Unai bamona kara namodia be Iehova ena Witnes taudia edia distrik hebouhebou ai idia hedinarai goevagoeva. Spain ena niuspepa ta be vanegai hebouhebouna ta ia herevalaia, ia gwau: “Dubu idauidau lalonai tomadiho idia laloa bada lasi, to Iehova ena Witnes taudia be unai bamona lasi. Idia ura lasi Baibel ena anina ia boio, unai dainai idia ese Dirava ena Hereva idia badinaia.”
Spain ena notwest kahana dekenai Witnes taudia ese hanaihanai idia gaukaralaia steidiam ta ena naria tauna, Thomas, be Dirava ena Hereva idia badinaia taudia bamoa karana ia moalelaia. Ena gaukara amo do ia ritaea negana be pura haida ia hadaudaua, Iehova ena Witnes taudia edia distrik hebouhebou lalonai do ia noho diba totona. Unai hebouhebou idia lao taudia momo, matamata taudia danu, be hebouhebou murinai ia danu lagani gunadia lalonai idia gaukara hebou dainai idia tanikiu henia bona ena ritaea negana do ia moalelaia totona hagoadaia hereva idia henia neganai, ia tai. Ia gwau: “Egu mauri lalonai lau moalelaia bada gauna be umui lau diba.”
Ororo dekenai ia noho hanuana be itaia tauna ena matana ia veria badina guba be idia gini ruma kurokurodia murinai ia noho bona idia ese dina ena diari idia hahedinaraia. Unai hegeregerena, Keristani taudia momokanidia be idia idau badina idia hekwarahi Baibel ena taravatu hereadaedia kara momokani, kara maoromaoro, bona hebogahisi dekenai idia badinaia.
Danu, Keristani taudia be edia haroro gaukara amo hereva momokani ena diari idia hahedinaraia. Aposetolo Paulo be Keristani taudia ginigunadia ia herevalaia, ia gwau: “Dirava ena bogahisihisi dainai inai haroro gaukara ai dekenai ia henia, unai dainai ai be hesiku lasi. . . . Ai be hereva momokani ai gwauraia hedinarai noho, Dirava ena vairana dekenai. Unai dekena amo taunimanima idia diba, ai be mai momokani danu Dirava ena gaukara ai karaia noho.” (2 Korinto 4:1, 2) Ena be idia haroro gabudia ibounai dekenai dagedage idia davaria, to Iehova ese edia hesiai gaukara ia hanamoa dainai, lagani 60 C.E. bamona ai, Paulo ia gwau diba sivarai namona be “tanobada ibounai dekenai” idia harorolaia vadaeni.—Kolose 1:23.
Hari inai negai, Iehova ena Witnes taudia be edia maduna idia laloa bada bona Iesu ese ia hagania hegeregerena, ‘edia diari be taunimanima edia vairana dekenai idia hahedinaraia.’ Iehova ena Witnes taudia be uduna bona idia halasia buka bona magasin amo Basileia sivaraina namona be tano 235 lalodiai idia harorolaia. Baibel ena hereva momokani ena diari be taunimanima momo ese do idia abia diba totona edia Baibel bukadia bona magasin be gado 370 bamona dekenai idia karaia.—Mataio 24:14; Apokalupo 14:6, 7.
Gabu momo dekenai, Witnes taudia idia hekwarahi, haroro gaukara idia koua gabudia eiava guna idia koua gabudia amo edia tano dekenai idia mai taudia edia gado idia dibaia totona. Hegeregere, North America ena hanua badadia momo dekenai, China bona Russia taudia momo idia noho. Unai gabu ena Witnes taudia be idia hekwarahi, China gado, Russia gado, bona gado ma haida idia dibaia bona edia gabu dekenai idia mai taudia idia haroro henidia totona. Momokani, gado momo hadibaia haraga kosidia idia karaia, unai dala amo uma gabu ena “anina be idia auka bona mage vadaeni” lalonai sivarai namona be ma haida dekenai do idia harorolaia diba.—Ioane 4:35.
Peroveta tauna Isaia ia gwau: “Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororo be ia ese, ororo ibounai do ia hereaia. Bese ibounai ese ia dekenai do idia haboua lao.” Iehova ena Witnes taudia be gabu ibounai dekenai edia kara bona haroro gaukara amo taunimanima idia durua, “Lohiabada ena Dubu Helaga ia gini ororona” dekenai do idia mai bona Dirava ena dala bona ena dala dekenai do idia raka dalana do idia dibaia totona. (Isaia 2:2, 3) Unai amo ia vara moale gauna be, Iesu ia hereva bamona, idia ibounai be Iehova Dirava, edia “Tamana guba dekenai do idia hanamoa” hebou.—Mataio 5:16; 1 Petero 2:12.