Edia Aonega Idia Gaukaralaia

NIGERIA taudia edia aonega herevana ta ia gwau: “Taunimanima badadia be mai edia aonega, to natudia be mai edia aonega danu.” Nigeria dekenai Keristani elda tauna ta ladana Edwin ia davaria unai ia momokani.

Dina ta, Edwin ese ena ruma dekenai ena gaukara patana henunai auri mauana ta ia davaria.

Edwin ese ena natudia toi ia nanadaia: “Inai be daika ena?”

Emmanuel, mauri lagani 8 merona, ia gwau: “Unai be lauegu.” Bona ia gwau haraga, unai 12 sentimita rasta auri mauana mai ena matu be Iehova ena Witnes taudia edia tanobada ibounai gaukarana durua kontribusen monina atoa mauana. Ma ia gwau: “Lau be dina ta ta ibounai Kingdom Hall dekenai lau lao lasi dainai, lau laloa, maua ta do lau karaia bona egu ura gaudia maragidia hoia totona lau gaukaralaia lasi monina be unai maua dekenai lau udaia.”

Emmanuel ena tamana be mai ena maua ta danu ruma dekenai, bona lagani ta ta distrik hebouhebou dekenai lao totona do idia gaukaralaia monina be unuseniai ia haboua. To gau ta ia vara bona famili be heduru idia abia haraga be namo dainai unai moni idia gaukaralaia. Emmanuel ia ura ia hamomokania ena kontribusen monina be gau ma ta totona do idia gaukaralaia lasi, unai dainai auri gaukaralaia tauna ta dekenai tini gunana ia abia lao, do ia koua totona. Emmanuel ese unai tini do ia gaukaralaia dalana be auri gaukaralaia tauna dekenai ia hadibaia neganai, auri momoru amo maua ta ia karaia Emmanuel totona. Emmanuel ena lagani ima tadina Michael danu be maua ta totona ia henanadai.

Natudia ese idia karaia karana dainai Edwin ia hoa, bona ia nanadaidia dahaka dainai unai maua idia karaia. Michael ia gwau: “Lau ura kontribusen monina lau henia!”

Edia tama sina idia diba lasi, Emmanuel, Michael, bona Uchei, edia lagani 9 taihuna, be edia dina tubua ena aniani gaudia maragidia hoia totona idia gaukaralaia monina ena kahana be idia haboua bona unai maua dekenai idia udaia. Unai lalohadai be edeseniai idia abia? Unai natudia be moni dogoatao totona idia hegeregere neganai, edia tama sina ese idia hadibadia Kingdom Hall dekenai idia noho kontribusen mauana dekenai moni haida do idia udaia. Momokani, ita itaia diba, unai natudia be unai kara idia dibaia namonamo.

Unai maua idia honu neganai, idia kehoa. Idia haboua monina be K10.36​—⁠unai moni be bada, badina unai tano dekenai idia gaukara taudia edia lagani tamona ena gaukara davana be kina handred haida sibona. Unai bamona volantia kontribusen amo Iehova ena Witnes taudia ese hari tano 235 lalonai idia karaia haroro gaukarana idia durua.