Basileia Haroro Ripoti
Kingdom Hall ta Dekenai Medolo Idia Henia
FINLAND dekenai The Ministry of Environment oreana ese lagani 2000 be “Gabu Hanamoa Bona Hahairaia Laganina” idia gwauraia. Unai gaukara ia hegaegaelaia tauna ta ia gwau “unai lagani ai gwauraia gabu hanamoa bona hahairaia laganina ena badina be ai ura ita ibounai ita laloatao tubutubu gaudia ese iseda dina ta ta ena mauri dekenai namo idia havaraia.”
January 12, 2001 ai, Iehova ena Witnes taudia edia brens opesi Finland dekenai be revareva ta Finnish Association of Landscape Industries oreana amo idia abia. Unai revareva ese ia hahedinaraia Tikkurila ai ia noho Iehova ena Witnes taudia edia Kingdom Hall dekenai gabu hanamoa bona hahairaia laganina ena medolo ta idia henia, badina ena gabu idia palanilaia bona naria namonamo. Unai revareva be ma ia gwau “ena gabu ena toana, siahu neganai bona keru negana ai, be namo herea, bona mai hairai.”
Rosendahl Hotel Tampere, Finland dekenai, unai medolo be Iehova ena Witnes taudia dekenai idia henia, bona diba bada taudia bona bisinesi taudia 400 idia lao. Finnish Association of Landscape Industries oreana ese hereva ta ia halasia danu, ia gwau: “Finland ena kahana idauidau dekenai, Iehova ena Witnes taudia edia Kingdom Hall kahirakahira ibounai idia palanilaia namonamo dainai idia be mai hairai. Gabu idia naridia namonamo dainai, idia raka hanai taudia ibounai edia lalona idia veria. Tikkurila dekenai ia noho Kingdom Hall be uma namo herea ena haheitalai ta. Unai ruma bona tubutubu gaudia ese maino bona lalo-namo mamina idia havaraia.”
Finland dekenai Kingdom Hall 233 idia noho, idia momo edia gabu be mai hairai. To, unai gabu be mai hairai ena badina badana be idia be tomadiho momokani bona Baibel ena hadibaia hereva namodia abia gabuna. Tanobada hegegemadai Iehova ena Witnes taudia milioni 6 mai kahana dekenai, Kingdom Hall––hairai bada eiava hairai sisina––be idia ura henia gabuna. Unai dainai idia ura bada idia naria namonamo mai lalokau ida. Kingdom Hall iboudiai edia iduara be idia kehoa noho, emu gabu dekenai idia noho taudia ibounai totona!