Kara Maoromaoro Tahua Karana ese Ita Do Ia Gimaia
“Dirava ena . . . kara maoromaoro do umui tahua guna.”—MATAIO 6:33.
1, 2. Keristani taihuna ta ese edena abia hidi ia karaia, bona dahaka dainai unai bamona ia karaia?
ASIA dekenai, Keristani taihu matamata ta be gavamani ena dipatmen ta dekenai seketere gaukara ia karaia. Iena gaukara be namo herea, ia leiti lasi, bona ia lahedo lasi. To, unai be ful-taim moni gaukarana lasi dainai, ena biaguna ia laloa daika dekenai do ia henia. Gaukara biaguna ese taihu ia hamaoroa unai gaukara ia karaia hanaihanai diba bona dagi namona do ia henia, bema ia ida ia mahuta hebou. Unai ia dadaraia momokani, ena be ena moni gaukara do ia haboioa.
2 Unai Keristani taihu matamata be ia kavakava, a? Lasi, ia ese Iesu ena hereva ia badinaia: “Dirava ena . . . kara maoromaoro do umui tahua guna.” (Mataio 6:33) Unai taihu dekenai, kara maoromaoro hakaua herevadia badinaia karana be mai anina bada, unai ese matabodaga karana amo do ia abia hahenamodia ia hereaia.—1 Korinto 6:18.
Kara Maoromaoro be mai Anina Bada
3. Kara maoromaoro ena anina be dahaka?
3 “Kara maoromaoro” ena anina be tau ta ese kara namodia ia badinaia bona ia kerere lasi. Baibel dekenai unai hereva be Greek bona Heberu gado dekenai idia hahanaia neganai, idia gwauraia “maoro momokani.” Ena anina be ta ese sibona ena kara maoromaoro ia hekokorokulaia karana lasi. (Luka 16:15) To ena kara be Dirava ena taravatu ida ia hegeregere be maoro. Unai dala amo Dirava ena kara maoromaoro ia hahedinaraia unai.—Roma 1:17; 3:21.
4. Dahaka dainai Keristani tauna dekenai kara maoromaoro be mai anina bada?
4 Dahaka dainai kara maoromaoro be mai anina bada? Badina Iehova ena “kara be maoromaoro,” bona ena taunimanima ese kara maoromaoro idia badinaia neganai, Iehova ia moale. (Salamo 4:1; Aonega Herevadia 2:20-22; Habakuku 1:13) Kara dika ia karaia noho tauna be Iehova ia tura henia diba lasi. (Aonega Herevadia 15:8) Unai dainai, aposetolo Paulo ese Timoteo ia hagoadaia: “Uhau edia lebulebu karadia do oi rakatania, bona . . . kara maoromaoro” bona mai anina bada karadia ma haida do oi badinaia. (2 Timoteo 2:22) Unai badina dainai, Paulo ese lauma tuari dabuana ia herevalaia neganai, “kara maoromaoro ena auri dabuana” ia gwauraia danu.—Efeso 6:14.
5. Edena dala ai goevadae lasi taudia ese kara maoromaoro idia tahua diba?
5 Oibe, taunimanima ibounai edia kara be maoromaoro momokani lasi. Idia ibounai be Adamu amo kara dika idia abia hanai dainai, idia vara negana amo idia be goevadae lasi. To, Iesu ia gwau kara maoromaoro ita tahua be namo. Unai be edena bamona ita karaia diba? Iesu ese ena mauri goevadaena amo ita ia hoia lou dainai, bema unai boubou gauna ita abidadama henia, Iehova ese iseda dika do ia gwauatao. (Mataio 20:28; Ioane 3:16; Roma 5:8, 9, 12, 18) Unai dainai, bema Iehova ena kara maoromaoro taravatudia ita dibaia bona badinaia—eiava iseda manoka hanaia totona ita guriguri—Iehova ese iseda tomadiho karana do ia abia dae. (Salamo 1:6; Roma 7:19-25; Apokalupo 7:9, 14) Unai be hagoadaia herevana momokani!
Inai Tanobada ai Kara Maoromaoro Hahedinaraia
6. Dahaka dainai Keristani ginigunadia dekenai tanobada be gabu dikana?
6 Iesu ena hahediba taudia be hahegani idia abia bena “tanobada ena kahana ibounai” dekenai ena ladana do idia gwauraia neganai, hekwakwanai badana idia davaria. (Kara 1:8) Idia haroro gabudia ibounai be “Satani ese . . . ia gunalaia.” (1 Ioane 5:19) Tanobada ibounai dekenai be Satani ese ia gaukaralaia siahu dikana ia noho, bona unai ese Keristani taudia edia kara ia hadikaia diba. (Efeso 2:2) Unai dainai, Keristani taudia dekenai tanobada be gabu dikana. To, Dirava ena kara maoromaoro tahua karana sibona ese idia ia durua diba idia haheauka bona Dirava idia badinaia noho totona. Momo idia haheauka, to haida be “kara maoromaoro ena dala” idia rakatania.—Aonega Herevadia 12:28; 2 Timoteo 4:10.
7. Dahaka dainai Keristani taudia ese tarapu idauidau idia dadaraia be namo?
7 Hari Keristani taudia dekenai, tanobada be gabu namona, a? Lasi! Tanobada be gabu dika hereana, aposetolo taudia edia nega ia hanaia. Bona Satani be tanobada dekenai idia negea diho bona horoa Keristani taudia eiava “hahine ena natuna [“garana,” NW ] oredia, idia do noho taudia, ia tuari henia. Unai taudia be inai: Idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai, ma idia badinaia danu.” (Apokalupo 12:12, 17) Bona Satani ese unai “garana” idia durua taudia ia tuari henidia danu. Keristani taudia be tanobada amo idia heau siri diba lasi. To idia noholaia, ena be idia be inai tanobada ena lasi. (Ioane 17:15, 16) Bona edia haroro gaukara amo tanobada dekenai idia noho kudou-maoro taudia idia tahua bona idia hadibaia Iesu ena hahediba taudia ai idia lao totona. (Mataio 24:14; 28:19, 20) Keristani taudia ese inai tanobada ena tarapu idauidau do idia davaria, unai dainai idia dadaraia be namo. Unai tarapu foa mani ita laloa.
Matabodaga Karadia Ena Tarapu
8. Dahaka dainai Israela taudia ese Moaba ena dirava idia tomadiho henia?
8 Israela taudia be taunimanima idia noho lasi gabuna dekenai idia loaloa bena lagani 40 idia ore gwauraia neganai, idia momo ese kara maoromaoro ena dala idia rakatania. Ena be Iehova ese idia ia hamauria karadia momo idia itaia, bona kahirakahira Gwauhamata Tanona dekenai do idia vareai. To, unai nega lalonai, idia ese Moaba ena dirava idia tomadiho henia matamaia. Dahaka dainai? “Tauanina ena ura dikadia” dainai. (1 Ioane 2:16) Baibel ia gwau: “Israela . . . tatau ese Moaba hahine idia sihari henidia.”—Numera 25:1.
9, 10. Hari inai negai dahaka ia vara dainai, namona be ita laloatao tauanina ena ura dikadia be mai ena siahu?
9 Unai sivarai ese ia hahedinaraia, tauanina ena ura dikadia ese manoka taudia ia hamorua diba. Unai amo gau ta ita dibaia be namo, badina taunimanima momo idia laloa matabodaga karadia be kerere lasi. (1 Korinto 10:6, 8) United States ena ripoti ta ia gwau: “Lagani 1970 ia do abia lasi neganai, America dekenai cohabitation [headava lasi tau bona hahine idia noho hebou kava karana] be idia taravatua. Hari, momo ese unai mauri dalana idia badinaia. Nega ginigunana idia headava taudia 100 100 amo 50 50 be idia noho hebou kava guna bena gabeai idia headava.” Unai bamona kara kereredia momo be tano tamona sibona dekenai ia vara lasi. To tanobada hegegemadai ia vara, bona madi, Keristani taudia haida ese unai idia badinaia dainai, Keristani kongrigeisen lalonai idia abia hahenamo idia haboioa.—1 Korinto 5:11.
10 Bona tanobada hegegemadai matabodaga karadia be ia bada ia lao. Muvi bona televisen program idia hahedinaraia, headava lasi matamata taudia idia sihari kava be kerere lasi. Tatau be tatau ida idia mahuta hebou karana idia gwauraia dika lasi. Bona piksa momo ese matabodaga karadia idia hahedinaraia goevagoeva. Internet dekenai matabodaga laulaudia itaia karana be auka lasi. Hegeregere, niuspepa torea tauna ta ia gwau, ena natuna mero ena mauri lagani be 7 bona sikuli amo ia giroa mai neganai, mai moale ida ena tamana ia hamaoroa, ena sikuli turana be Internet dekenai kopina kavakava hahinedia ia itaia, matabodaga karadia idia karaia. Ena be unai tamana ia hoa bada, to natudia momo be unai bamona Internet sait idia kehoa neganai, edia tama sina idia hadibaia lasi. Bona tama sina momo be edia natudia ese dahaka vidio gadara idia gadaralaia be idia diba lasi. To unai bamona gadara momo be matabodaga, demoni bona dagedage karadia idia hahedinaraia.
11. Edena dala ai tama sina ese edia ruma bese be tanobada ena matabodaga karadia amo idia gimaia diba?
11 Edena dala ai ruma bese taudia ese “moale” kara dikadia idia dadaraia diba? Dirava ena kara maoromaoro idia tahua guna bona matabodaga karadia idauidau idia dadaraia karana amo. (2 Korinto 6:14; Efeso 5:3) Tama sina momo ese edia natudia idia naria namonamo, bona idia dekenai Dirava bona ena kara maoromaoro taravatudia lalokau henia karana idia hadibaia. Unai ese idia ia durua matabodaga laulaudia bona kara dikadia idia hahedinaraia gaudia ma haida idia dadaraia totona.—Deuteronomi 6:4-9.a
Taunimanima Edia Laloani Karadia Ena Dika
12. Aposetolo edia negai edena hekwakwanai ia vara?
12 Paulo be Lusitera, Asia Minor dekenai ia noho neganai, hoa dalanai gorere tauna ta ia hanamoa. Baibel ia gwau: “Taunimanima momo ese Paulo ena kara idia itaia, bona Lukaonia gado dekenai idia boiboi, idia gwau, ‘Dirava be taunimanima ena toana dekenai idia diho mai ita dekenai.’ Bona Banaba ena ladana idia atoa Dio, bona Paulo ena ladana idia atoa Hereme, badina ia be hereva gwauraia tauna.” (Kara 14:11, 12) Gabeai, idia ura Paulo bona Banaba idia hamasea. (Kara 14:19) Unai ese ia hahedinaraia goevagoeva, taunimanima edia laloani karadia ese unai taudia edia lalona idia veria. Idia haida be Keristani taudia ai idia lao neganai, edia mauri gunadia idia do badinaia noho. Paulo ese Kolose Keristani taudia ia sisiba henia neganai, ia ese “aneru . . . tomadiho henia” karana ia herevalaia.—Kolose 2:18.
13. Keristani tauna ese edena kastom haida ia dadaraia be namo, bona daika ena heduru ia abia be namo?
13 Hari inai negai, Keristani taudia ese kastom karadia haida idia dadaraia. Badina unai bamona kastom karadia be tomadiho koikoi edia lalohadai idia hahedinaraia, to Keristani hakaua herevadia idia utua. Hegeregere, tano haida dekenai, beibi eiava mase ta ia vara neganai idia karaia ariadia momo be koikoi, badina idia gwau ita mase neganai ita be mai iseda mase diba lasi laumana. (Hadibaia Tauna 9:5, 10) Tano haida edia kastom hegeregerena, kekeni matamata edia tauanina ena hehuni kopina kahadia idia utua. Unai be kara dika rohorohona, bona Keristani tama sina ese edia natudia dekenai unai bamona idia karaia be lalokau karana lasi. (Deuteronomi 6:6, 7; Efeso 6:4) Edena dala ai Keristani taudia ese taunimanima edia laloani karadia bona unai bamona kastom karadia idia negea diba? Iehova abidadama henia momokani karana amo. (Salamo 31:6) Kara maoromaoro Diravana ese mai edia kudouna ibounai ida inai hereva idia gwauraia taudia do ia hagoadaia: “Lohiabada e, oi be egu gima Tauna bona egu naria Tauna, Oi be egu Dirava, oi dekenai lau abidadama noho.”—Salamo 91:2; Aonega Herevadia 29:25.
Iehova Laloaboio Lasi
14. Kahirakahira Israela taudia be Gwauhamata Tanona dekenai idia vareai neganai, Iehova ese dahaka sisiba ia henidia?
14 Kahirakahira Israela taudia be Gwauhamata Tanona dekenai do idia vareai neganai, Iehova ese idia ia hamaoroa Ia do idia laloaboio lasi. Ia gwau: “Do umui naria namonamo, Lohiabada, emui Dirava do umui laloaboio garina, o iena Taravatu o iena oda, hari dina umui dekenai lau henia gaudia do umui badinaia lasi garina. Do umui aniani, emui bogana do idia kunu. Ruma namodia do umui haginia, do umui noholaia. Umui emui boromakau oreadia bona emui mamoe oreadia do idia momo herea, emui siliva bona emui golo do idia bada, emui gau ibounai be momo. Unai neganai do umui naria namonamo, do umui hekokoroku garina, bona Lohiabada, emui Dirava, . . . do umui laloaboio garina.”—Deuteronomi 8:11-14.
15. Edena dala ai ita hahedinaraia ita ese Iehova ita laloaboio lasi?
15 Hari inai negai unai bamona ia vara diba, a? Oibe, bema gau kereredia ita atoa guna. To, bema Dirava ena kara maoromaoro ita tahua guna, tomadiho goevana be iseda mauri ena mai anina bada gauna ai do ia lao. Paulo ese ita ia hagoadaia bamona, ‘iseda nega do ita gaukaralaia namonamo’ bona iseda haroro gaukara ai kara haraga lalohadaina do ita abia. (Kolose 4:5; 2 Timoteo 4:2) To bema ita dekenai hebou lao henia karana bona haroro gaukara be gau badana lasi, bona laga-ani eiava moale karadia be gau badana, Iehova do ita laloaboio bona iseda mauri dekenai ia be gau iharuana ai ita halaoa diba. Paulo ia gwau, nega dokona dekenai taunimanima ese “lebulebu karadia idauidau do idia ura henia bada, to Dirava do idia ura henia maragi.” (2 Timoteo 3:4) Unai bamona lalohadai ese Keristani taudia ia hakererea lasi totona, hanaihanai sibodia edia kara idia tahua.—2 Korinto 13:5.
Sibona Laloa Bada Karana Dadaraia
16. Paulo ena negai idia noho taudia haida bona Heva ese edena lalohadai kererena idia hahedinaraia?
16 Eden dekenai, Heva be sibona ia laloa bada dainai, Satani ese unai ia gaukaralaia ena lalona ia veria totona. Heva ia ura ia sibona ese dahaka be namo bona dahaka be dika ia abia hidi. (Genese 3:1-6) Aposetolo edia negai, Korinto kongrigeisen taudia haida be sibona idia laloa bada. Idia laloa idia ese Paulo idia hereaia dainai, ia ese hevaseha dalanai idia ia gwauraia aposetolo taudia namo herea.—2 Korinto 11:3-5; 1 Timoteo 6:3-5.
17. Edena dala ai sibona laloa bada karana ita dadaraia diba?
17 Hari inai negai, taunimanima momo be “idia kara kava . . . idia gwau idia be tau badadia momokani,” bona Keristani taudia haida ese unai lalohadai idia badinaia. Haida be hereva momokani dadaraia taudia ai idia lao. (2 Timoteo 3:4; Filipi 3:18) Tomadiho goevadaena dekenai, gau badana be Iehova ena heduru ita tahua, bona “hesiai tauna mai ena kamonai, bona mai ena kara maoromaoro” oreana bona kongrigeisen elda taudia ida ita gaukara hebou. Unai amo ita be kara maoromaoro ita tahua, bona unai ese ita do ia gimaia sibona ita laloa bada lasi totona. (Mataio 24:45-47; Salamo 25:9, 10; Isaia 30:21) Horoa Keristani oreana be “hereva momokani ena du, bona hereva momokani ia gimaia maguna.” Iehova ese unai orea ia haginia ita idia gimaia bona hakaua totona. (1 Timoteo 3:15) Edia maduna dibaia karana ese ita ia durua bena ‘do ita hekokoroku lasi,’ to mai manau ida Iehova ena ura ita badinaia.—Filipi 2:2-4; Aonega Herevadia 3:4-6.
Iesu Tohotohoa
18. Edena dala ai Iesu ena kara ita tohotohoa be namo?
18 Baibel ese Iesu be inai bamona ia gwauraia: “Kara maoromaoro oi ura henia noho, bona kara dika oi badu henia noho.” (Salamo 45:7; Heberu 1:9) Iesu ena haheitalai ita tohotohoa be namo! (1 Korinto 11:1) Iesu be Iehova ena kara maoromaoro taravatudia ia diba sibona lasi, to ia ura henidia bada. Unai dainai, Satani ese tano gagaena dekenai Iesu ia dibagania neganai, Iesu ese ia dadaraia bona “kara maoromaoro ena dala” ia badinaia.—Aonega Herevadia 8:20; Mataio 4:3-11.
19, 20. Kara maoromaoro tahua karana ena namo be dahaka?
19 Momokani, tauanina ena ura dikadia idia goada diba. (Roma 7:19, 20) To, bema kara maoromaoro ita laloa bada, unai ese ita do ia hagoadaia kara dika ita dadaraia totona. (Salamo 119:165) Kara kererena be iseda vairana dekenai idia hedinarai neganai, kara maoromaoro ura henia karana ese ita do ia gimaia. (Aonega Herevadia 4:4-6) Laloaboio lasi, hahetoho lalonai ita moru neganai, Satani ia kwalimu. Unai dainai, gau badana be Satani ita dadaraia bona Iehova ita hakwalimua!—Aonega Herevadia 27:11; Iamesi 4:7, 8.
20 Keristani taudia momokanidia ese kara maoromaoro idia tahua dainai, edia “kara ibounai be do idia namo momokani. Iesu Keriso sibona ese inai bamona kara ia havaraia diba, Dirava ese hanamoa bona hairai do ia abia totona.” (Filipi 1:10, 11) Idia ese ‘mauri matamata idia atoa, dabua matamata idia atoa bamona. Inai mauri matamata dainai, edia toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’ (Efeso 4:24) Idia be Iehova ena, bona edia mauri idia gaukaralaia Iena ura idia karaia totona, to idia sibodia edia lasi. (Roma 14:8; 1 Petero 4:2) Unai ese edia lalohadai bona kara ia biagua. Idia ese edia guba Tamana idia hamoalea bada!—Aonega Herevadia 23:24.
[Footnote]
a Tama sina ese matabodaga karadia amo edia ruma bese idia gimaia daladia be Ruma Bese Ena Moale Havaraia Dalana bukana dekenai oi davaria diba. Unai buka be Iehova ena Witnes taudia ese idia karaia.
Anina Oi Gwauraia Diba, A?
• Dahaka dainai kara maoromaoro ita tahua be gau badana?
• Edena dala ai goevadae lasi Keristani tauna ese kara maoromaoro ia tahua diba?
• Keristani tauna ese edena tanobada gaudia haida ia dadaraia be namo?
• Edena dala ai kara maoromaoro tahua karana ese ita do ia gimaia?
[Picture on page 26]
Iesu ena murinai idia raka taudia dekenai, tanobada be gabu dikana
[Picture on page 27]
Iehova lalokau henia karana idia dibaia natudia ese matabodaga karadia do idia dadaraia
[Picture on page 28]
Israela taudia haida be Gwauhamata Tanona dekenai noho namona idia davaria murinai, idia ese Iehova idia laloaboio
[Picture on page 29]
Iesu bamona, Keristani taudia ese kara dika idia inai henia