Emu Abidadama Dirava Dekenai be Ia Goada, Eiava?
“Dirava ena Basileia . . . do umui tahua guna.”—MATAIO 6:33.
1, 2. Tau matamata ta ese dahaka ia karaia ena moni gaukara dekenai, bona dahaka dainai?
TAU matamata ta ia ura ena kongrigeisen do ia durua bada. To hekwakwanai be, ena moni gaukara ese ena hebou lao henia hanaihanai karana ia koua. Unai be edena bamona ia hanaia? Iena moni gaukara amo ia risain bona gabeai moni gaukara ma ta ia abia, unai amo Keristani kongrigeisen gaukara idauidau ia durua diba. Hari ia karaia moni gaukara amo moni bada ia abia lasi, to ena ruma bese ia naria bona ia be hegeregere kongrigeisen ia durua diba.
2 Unai tau matamata ese ena moni gaukara ia haidaua ena badina oi lalopararalaia, a? Bema emu noho dalana be unai tau ena hegeregerena, ena kara do oi tohotohoa, a? Moale gauna be, Keristani taudia momo be unai bamona idia karaia vadaeni, bona edia kara ese ia hahedinaraia, idia ese Iesu ena gwauhamata idia abidadama henia. Ia gwau: “To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:33) Idia ese tanobada lasi to Iehova idia abidadama henia, badina idia diba Ia sibona ese noho namona do ia henia.—Aonega Herevadia 3:23, 26.
3. Dahaka dainai haida ese Dirava ena Basileia atoa guna karana idia daradaralaia?
3 Ita be nega aukana dekenai ita noho dainai, reana haida idia daradara unai tau matamata ese abia hidi maorona ia karaia eiava. Hari inai negai, taunimanima haida be idia ogogami bada, to ma haida be edia taga bada maurina idia moalelaia. Ogogami tanodia ai, momo ese gaukara ta idia davaria neganai idia karaia sibona, unai amo edia mauri idia durua diba. To, taga tanodia ai idia noho taudia momo idia gaukara goada edia noho dalana idia hanamoa totona, badina nega haida moni ena siahu ia ore, moni gaukara idia haidaua, eiava gaukara biagudia idia ura edia gaukara taudia be edia gaukara idia habadaia eiava ovataim idia karaia. Haida be idia ura edia mauri dalana idia haidaua dainai idia henanadai, ‘Basileia lau tahua guna be namo, a?’ Unai henanadai haerelaia totona, Iesu ena hereva idia kamonai henia taudia mani ita laloa.
“Laloa Momo Lasi”
4, 5. Dirava ena taunimanima be dina ta ta gaudia dainai idia lalohekwarahi be maoro lasi. Iesu ese unai be edena bamona ia hahedinaraia?
4 Galilea dekenai, Iesu be gabu idauidau amo idia mai hutuma ia hereva henia noho. (Mataio 4:25) Idia haida be taga taudia. To, momo be idia ogogami. Iesu ese idia ia hamaoroa tanobada kohudia lasi, to gau hereadaena—lauma kohudia unai—do idia haboua. (Mataio 6:19-21, 24) Ia gwau: “Umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. Mauri be gau badana, to aniani be gau maragi, ani? Tauanina ese be dabua ia hanaia, ani?”—Mataio 6:25.
5 Iesu ena hereva idia kamonai taudia momo dekenai, unai hereva be anina lasi. Idia diba bema idia gaukara goadagoada lasi, edia ruma bese taudia do idia hitolo. To, Iesu ese idia dekenai manu ia herevalaia. Dina ta ta ai manu ese aniani bona noho gabuna idia tahua, to Iehova ese idia ia naria. Danu, Iehova ese flaoaflaoa ia naria dalana ia herevalaia, Iesu ia gwau edia hairai ese Solomona ena dabua ena hairai ia hereaia. Bema Iehova ese manu bona flaoaflaoa ia naria diba, anina be ita do ia naria danu. (Mataio 6:26-30) Iesu ia gwau bamona, iseda mauri bona tauanina be mai anina bada, idia ese ita hoia aniani bona dabua idia hereaia momokani. To bema iseda nega bada ita haorea aniani bona dabua ita hoia totona, bona Iehova hesiai henia karana dekenai nega bada ita atoa lasi, iseda mauri ena badina ita reaia unai.—Hadibaia Tauna 12:13.
Laloa Maoromaoro
6. (a) Keristani tauna ena maduna be dahaka? (b) Keristani taudia ese daika idia abidadama henia momokani?
6 Oibe, Iesu ia gwau lasi ena kamonai taudia ese gaukara do idia rakatania bona do idia naria, Dirava ese hoa dalanai edia ruma bese edia mauri durua gaudia ia henia totona. Manu be idia sibodia bona edia natudia totona aniani idia tahua. Unai dainai, bema Keristani taudia idia ura aniani, idia gaukara be namo. Bona edia ruma bese ena maduna idia huaia. Keristani taudia be edia biagudia edia hesiai gaukara idia karaia goadagoada. (2 Tesalonika 3:10-12; 1 Timoteo 5:8; 1 Petero 2:18) Aposetolo Paulo be sibona ia durua totona, palai ruma ia karaia. (Kara 18:1-4; 1 Tesalonika 2:9) To, unai Keristani taudia idia gwau lasi moni gaukara ese noho namona ia havaraia. Idia ese Iehova idia abidadama henia. Unai dainai, ma haida idia diba lasi lalomaino idia moalelaia. Salamo torea tauna ia gwau: “Lohiabada idia abidadama henia taudia be Siona Ororo bamona. Inai Ororo be ia marere diba lasi, ia be do ia gini goada noho hanaihanai.”—Salamo 125:1.
7. Iehova ia abidadama henia lasi tauna ena lalohadai be edena bamona ia idau?
7 To Iehova ia abidadama henia lasi tauna ena lalohadai be idau. Taunimanima momo idia laloa kohu momo ese noho namona ia havaraia. Unai dainai, tama sina ese edia natudia idia hagoadaia, idia matamata neganai iunivesiti dekenai do idia lao, badina idia laloa unai ese idia do ia durua moni gaukara namona idia davaria totona. Madi, Keristani ruma bese haida ese edia natudia be unai bamona sikuli dekenai idia atoa totona, nega bona moni bada idia negea, to edia natudia be lauma dalanai idia manoka bona kohu bada idia tahua.
8. Keristani taudia be dahaka idia laloa maoromaoro?
8 To aposetolo taudia bamona, aonega Keristani taudia idia laloparara Iesu ena sisiba be mai anina bada hari inai negai, bona idia laloa maoromaoro. Ena be edia ruma bese idia naria totona moni gaukara dekenai hora bada idia halusia, to idia ura lasi unai ese mai anina bada lauma gaudia edia dala ia koua.—Hadibaia Tauna 7:12.
“Emui Lalona Idia Hekwarahi Lasi”
9. Edena dala ai Iesu ese Iehova idia abidadama henia momokani taudia ia hagoadaia?
9 Iesu ena Ororo Harorona ai, ena kamonai taudia ia hamaoroa: “Emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ Bese idauidau taudia ese unai gau ibounai idia tahua noho. To emui Tamana guba dekenai ia noho be ia diba, umui ura gaudia ibounai be unai.” (Mataio 6:31, 32) Unai be hagoadaia herevana! Bema Iehova ita abidadama henia momokani, Ia ese hanaihanai ita do ia durua. To, Iesu ena hereva ese iseda lalona ia veria danu. Ita ia hadibaia lou, bema tauanina gaudia ita “tahua noho,” ita ese “bese idauidau taudia,” eiava Keristani lasi taudia edia lalohadai ita hahedinaraia unai.
10. Tau matamata ta be Iesu ena sisiba ia tahua neganai, Iesu ese ena ura gauna be edena bamona ia hahedinaraia?
10 Nega ta, taga tauna ta ese Iesu ia nanadaia dahaka do ia karaia mauri hanaihanai ia abia totona. Iesu ese ia dekenai Taravatu ia herevalaia, badina unai nega ai Mose ena Taravatu be do mai anina bada. Unai tau matamatana ese Iesu ia hamaoroa: “Unai ibounai be lau badinaia namonamo vadaeni, ma dahaka dohore lau karaia?” Reana momo dekenai Iesu ena haere be anina lasi. Badina ia gwau: “Bema oi ura oi namo herea momokani, oiemu kohu oi lao hoia, ogogami taudia dekenai oi henia, guba ena kohu oi abia. Vadaeni lauegu murina dekenai oi raka mai.” (Mataio 19:16-21) Unai tau matamatana be mai lalohisihisi ida ia giroa lou, badina ia ura lasi iena kohu ia haboioa. Ia ese ena kohu ia ura henia bada, to Dirava ia lalokau henia maragi.
11, 12. (a) Iesu ese kohu ia herevalaia neganai, dahaka sisiba ia henia? (b) Edena dala ai kohu ese Iehova hesiai henia karana ia koua diba?
11 Unai dainai Iesu ia gwau: “Kohu momo tauna be Guba Basileia ena iduara dekenai vareai be do ia auka. . . . Kamelo be nila ena matuna dekenai do ia vareai haraga, to kohu momo tauna be Dirava ena Basileia do ia vareai be mai hekwarahi danu.” (Mataio 19:23, 24) Iesu ena hereva ena anina be, taga tauna ta be Basileia lalonai do ia vareai lasi, a? Lasi, badina ma ia gwau: “Dirava ese gau ibounai be ia karaia diba.” (Mataio 19:25, 26) Oibe, aposetolo edia negai, Iehova ena heduru amo taga taudia haida be horoa Keristani taudia ai idia lao. (1 Timoteo 6:17) To Iesu be badina namona ta dainai unai hereva ia gwauraia. Ia be gau ta ia hadibaia.
12 Unai taga tauna bamona, bema ta ese ena kohu ia ura henia bada, unai ese Iehova hesiai henia karana ia koua diba. Unai ia vara diba ia taga vadaeni tauna bona ‘kohu momo ia ura henia tauna’ dekenai. (1 Timoteo 6:9, 10) Kohu ia abidadama henia tauna ese ‘lauma gaudia do ia tahua’ lasi. (Mataio 5:3, NW ) Unai dainai, reana ia laloa Iehova ena heduru be anina lasi. (Deuteronomi 6:10-12) Eiava ia laloa kongrigeisen taudia ese ia idia kara namo henia be namo. (Iamesi 2:1-4) Bona ena nega bada do ia haorea ena taga ia moalelaia totona, to Iehova do ia hesiai henia badabada lasi.
Lalohadai Maorona Abia
13. Laodikea taudia be edena lalohadai kererena idia abia?
13 Aposetolo edia negai ia noho Laodikea kongrigeisen taudia ese kohu dekenai lalohadai kererena idia abia. Iesu ese idia ia hamaoroa: “Oi gwau, ‘Lau be mai egu moni, bona gau ibounai lau dekenai be hegeregere vadaeni.’ To lasi. Oi diba lasi, to oi be namo lasi momokani, oi be bogahisihisi gauna, oi be ogogami, matakepulu, bona kopina kavakava.” Ita gwau lasi kohu ese Laodikea taudia ia hakaudia kerere dainai, idia be lauma dalanai idia manoka. Idia ese Iehova lasi to kohu idia abidadama henia. Unai dainai, lauma dalanai idia siahu lasi bona Iesu ese ena uduna amo idia ia kanudia.—Apokalupo 3:14-17.
14. Dahaka dainai Paulo ese Heberu Keristani taudia ia hanamodia?
14 To, Paulo ese Heberu Keristani taudia ia hanamodia badina be matamanai dagedage idia davaria neganai, edia kara be namo. Ia gwau: “Umui ese dibura ruma lalonai idia koua taudia umui bogahisihisi henidia. Bona emui kohu be haida ese idia dadia neganai, edia kara umui haheaukalaia mai moale danu. Badina be umui diba, umui dekenai ia noho kohu, davana namona, be do ia noho hanaihanai gauna.” (Heberu 10:34) Ena be unai Keristani taudia ese edia kohu idia haboioa, to idia lalohisihisi lasi. Idia moale badina edia dava bada kohuna, “do ia noho hanaihanai” gauna idia haboioa lasi. Iesu ena parabole ta lalonai, hoihoi tauna ta be nadi namo herea ta hoia totona ena gau ibounai ia hoihoilaia. Unai hegeregerena, Keristani taudia be Basileia ena helaro idia dogoatao auka, herevana dahaka gau idia haboioa. (Mataio 13:45, 46) Unai be kara namona!
15. Liberia dekenai, Keristani taihu ta ese edena dala ai Basileia ia tahua guna?
15 Hari inai negai, momo be unai bamona kara namona idia hahedinaraia. Hegeregere, Liberia dekenai Keristani taihu ta be iunivesiti dekenai idia siaia lao. Unai hanua taudia dekenai, unai hahenamo ese dala ia kehoa diba, ta be vaira negana ai namo ia abia totona. To, unai taihu be painia, eiava ful-taim haroro gaukara ia karaia taihuna ta, bona ia idia boiria hua haida lalonai spesel painia gaukara do ia karaia. Ena lalona ia hadaia Basileia do ia tahua guna bona ful-taim hesiai gaukara do ia karaia noho. Ia idia siaia gabuna dekenai ia lao bona hua toi lalonai Baibel stadi 21 ia matamaia. Unai taihu matamata bona ma haida ese Basileia idia tahua guna, ena be tauanina dalanai gau namodia haida idia haboioa. Inai kohu momo tahua tanobadana ai, edena dala ai unai bamona idia karaia diba? Kara namodia ma haida idia manadalaia. Idia haida mani ita herevalaia.
16, 17. (a) Bema ita ura Iehova ita abidadama henia, dahaka dainai ita manau be gau badana? (b) Dahaka dainai Dirava ena gwauhamata ita abidadama henia be namo?
16 Manau: Baibel ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia. Oi sibona do oi laloa lasi oi be mai emu aonega.” (Aonega Herevadia 3:5-7) Nega haida, ita laloa do ita badinaia daladia haida be maoro. (Ieremia 17:9) To, Keristani tauna korikorina be Iehova ena hakaua dalana ia badinaia. (Salamo 48:14) ‘Ia karaia gaudia ibounai lalonai’—kongrigeisen gaudia, edukeisen eiava moni gaukara, laga-ani, eiava gaukara ma ta dekenai—namona be mai manau ida Iehova ena sisiba ia tahua.—Salamo 73:24, NW.
17 Iehova ena gwauhamata abidadama henia: Paulo ia gwau: “Tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:6) Bema Iehova ena gwauhamata dekenai ita daradara, reana inai “tanobada ena gau namodia” do ita tahua momo. (1 Korinto 7:31) To, bema iseda abidadama ia goada, iseda lalona do ita hadaia Basileia ita tahua guna totona. Iseda abidadama be edena bamona ita hagoadaia diba? Unai do ia vara bema hanaihanai mai kudouna ibounai ida ita guriguri bona sibona eda stadi karana amo Iehova kahirakahira ita lao. (Salamo 1:1-3; Filipi 4:6, 7; Iamesi 4:8) King Davida bamona, do ita guriguri: “Lohiabada e, egu abidadama be oi dekenai lau atoa noho. Oi be egu Dirava. . . . Taunimanima ibounai be inai oiemu kara namona idia diba.”—Salamo 31:14, 19.
18, 19. (a) Edena dala ai gaukara karaia goadagoada karana ese iseda abidadama Iehova dekenai ia hagoadaia? (b) Dahaka dainai Keristani tauna be mai ena ura ida ia sibona ia henia be namo?
18 Iehova ena gaukara karaia goadagoada: Paulo ese Iehova ena gwauhamata abidadama henia karana, be gaukara karaia goadagoada karana ida ia gwauraia, ia gwau: “Ai ura bada umui ta ta ese unai bamona do umui karaia goadagoada noho, ela bona emui mauri dokona. Badina be unai neganai, umui naria noho davana namona, mauri hanaihanai, do umui abia momokani.” (Heberu 6:11) Bema Iehova ena gaukara dekenai ita bisi bada, ia ese ita do ia durua. Nega ta ta ai iena heduru ita mamia neganai, iseda abidadama Iehova dekenai ia goada, unai amo ita ‘gini goada, bona marere lasi.’ (1 Korinto 15:58) Bona iseda abidadama ia matamata lou bona iseda helaro ia goada.—Efeso 3:16-19.
19 Mai emu ura ida sibona oi henia: Paulo ese ena gaukara namona ia rakatania Iesu murinai ia raka totona. Ia ese abia hidi maorona ia karaia, ena be nega haida tauanina dalanai ia dabu. (1 Korinto 4:11-13) Iehova ia gwau lasi ia be kohu momo do ia henia, bona nega haida ena hesiai taudia be nega aukadia do idia haheaukalaia. Mai eda ura ida iseda mauri ita haidaua bona sibona ita henia neganai, ia hahedinaraia ita ura bada Iehova ita hesiai henia.—1 Timoteo 6:6-8.
20. Dahaka dainai Basileia ia atoa guna tauna ia haheauka be mai anina bada?
20 Haheauka: Iamesi ese Keristani taudia ia hagoadaia: “Unai dainai, lauegu varavara taudia e, do umui haheauka noho ela bona Lohiabada do ia giroa mai.” (Iamesi 5:7) Inai tanobada dekenai gau momo dekenai ita bisi bada dainai, ita haheauka be auka. Ita ura gau haida ita karaia haraga. To Paulo ese ita ia hagoadaia, “Dirava ia gwauhamatalaia davana namona” do idia abia “abidadama bona haheauka taudia” edia kara ita tohotohoa. (Heberu 6:12) Mai eda ura ida Iehova ita naria. Mauri hanaihanai be tanobada paradaisona dekenai do ita abia—unai ita naria noho be gau badana!
21. (a) Basileia ita atoa guna neganai, dahaka ita hahedinaraia? (b) Stadi gabena ai dahaka do ita herevalaia?
21 Oibe, Iesu ena sisiba ita badinaia bona Basileia ita tahua guna be mai anina bada. Unai bamona ita karaia neganai, ita hahedinaraia Iehova ita abidadama henia momokani bona Keristani tauna ena mauri dalana namona ita abia hidi. To danu, Iesu ese ita ia sisiba henia “Dirava ena . . . kara maoromaoro do [ita] tahua guna” noho. Stadi gabena ai, do ita itaia dahaka dainai hari unai sisiba ita badinaia be mai anina bada.
Anina Oi Gwauraia Diba, A?
• Iesu ese kohu ia herevalaia neganai, dahaka hagoadaia herevana ia henia?
• Iesu ena parabole lalonai ia herevalaia kamelo bona nila ena matana amo dahaka ita dibaia?
• Edena Keristani karadia ese ita ia durua Dirava ena Basileia ita tahua guna totona?
[Picture on page 21]
Iesu ena hereva idia kamonai taudia momo be ogogami taudia
[Picture on page 23]
Kohu momo tauna ese ena kohu ia ura henia bada, to Dirava ia lalokau henia maragi
[Picture on page 23]
Iesu ena parabole ai ia gwau hoihoi tauna be nadi namo hereana ta hoia totona ena gau ibounai ia hoihoilaia
[Picture on page 24]
Bema Iehova ena hesiai gaukara dekenai ita bisi, Ia ese ita do ia durua