Baibel ese Taravatu Momo Ia Gwauraia, A?

FINLAND dekenai, mero matamata ta ia gwau: “Lau maragi neganai, egu tama sina ese Baibel ena taravatu bona Dirava ia noho lalohadaina be lau dekenai idia hadibaia lasi.” Hari, taunimanima momo be unai bamona. Matamata taudia momo idia laloa Baibel be idaunegai bukana ta sibona bona ena taravatu be momo herea. Taunimanima haida idia laloa Baibel ena hereva idia ura badinaia taudia be taravatu momo herea ese ia guidia. Unai dainai, momo be Baibel idia duahia lasi bona hekwakwanai idia davaria neganai, heduru be gabu idauna dekenai idia tahua.

Taunimanima be unai bamona lalohadai idia abia, badina histori lalonai, Kerisendom ena dubu taudia ese taunimanima idia dagedage henia bada. Hegeregere, histori taudia haida ese idia gwauraia Dibura Negana lalonai, Europe dekenai Katolik Dubu ese taunimanima edia mauri idia biagua. Tau ta bema dubu ena taravatu dekenai ia lalotamona lasi, unai tauna idia hahisia bada bona idia hamasea. Gabeai Protestan dubu ia matamaia, to idia danu be taunimanima idia biagua auka. Hari inai negai, bema tau ta dekenai Protestan ena dubu oi gwauraia, ia be unai dubu taudia sibona do ia laloa lasi, to unai dubu ese edia hahediba taudia idia panisia karana danu do ia laloa. Unai dubu taudia edia dagedage karadia dainai, taunimanima idia laloa Baibel ena hahediba herevadia idia badinaia be anina lasi.

Vanegai laganidia lalonai, gabu haida dekenai dubu taudia be edia taunimanima edia mauri idia biagua auka lasi. Taunimanima momo be dubu ena hahediba herevadia idia dadaraia dainai, idia laloa dahaka be maoro bona dahaka be kerere be sibona idia abia hidi diba. Unai dainai dahaka ia vara? Profesa ta, Ahti Laitinen, ia gwau: “Hari inai negai taunimanima momo be siahu taudia idia matauraia lasi, bona dahaka be namo bona dahaka be dika idia diba lasi.” Bona dubu gunalaia taudia be unai lalohadai idia abia dae. Luteran ena bisop ta ia gwau: “Lau laloa Baibel eiava dubu ta ese dahaka be maoro bona dahaka be kerere ita dekenai do idia hadibaia lasi.”

Idia Ura Sibona Edia Ura Idia Badinaia

Matamata taudia momo idia ura sibona edia ura idia badinaia. Haida be idia ura lasi taunimanima ese do idia biagudia eiava do idia hamaorodia dahaka idia karaia eiava dahaka idia karaia lasi totona. To, taunimanima ibounai be sibodia edia ura idia badinaia be namo, a? Unai henanadai haerelaia totona, mani haheitalai ta ita laloa. Bema siti ta dekenai trafik ena taravatu be lasi. Draiva taudia be test do idia karaia lasi bona laiseni do idia abia lasi. Taunimanima be sibona edia ura hegeregerena motuka idia taria diba, ena be idia kekero, motuka idia taria haraga, dala dekenai saini be lasi, trafik lait lasi, motuka idia heau kava bona raka hanai gabudia be lasi. Do oi ura unai bamona siti dekenai oi noho, a? Lasi! Badina unai ese dika bada ia havaraia diba. Ena be trafik ena taravatu ese taunimanima ia biagua, to ita laloparara unai taravatu ese draiva bona taunimanima edia mauri ia gimaia.

Unai hegeregerena, Iehova be ita ia durua totona, hakaua herevadia ia henia. Bema unai hakaua herevadia be lasi, hekwakwanai bona kerere momo do idia vara bona unai ese ita bona ma haida dekenai dika bada ia havaraia diba. Hegeregere, motuka be trafik taravatu lasi siti dekenai oi taria bamona. Momokani, taunimanima momo idia abia dae taravatu idia noho be gau badana.

“Lauegu Huaia Auna be Ia Metau Lasi”

Trafik ena taravatu be momo herea. To, Baibel ese taravatu momo ia gwauraia lasi. Baibel lalonai hakaua herevadia idia noho, bona idia be metau lasi bona auka lasi. Iesu Keriso ese ena negai idia noho taudia dekenai mai anina bada boiboi ta ia gwauraia, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Badina be lauegu huaia auna be ia metau lasi, bona huaia neganai danu hekwarahi lasi.” (Mataio 11:​28, 30) Aposetolo Paulo be Korinto Keristani kongrigeisen dekenai revareva ia torea neganai, ia gwau: “Lohiabada ena Lauma be tau ta dekenai ia noho neganai, gau ta ese unai tau ia koua diba lasi. Lasi momokani, badina ia dekenai ura kwalimu ia noho.”​​—⁠2 Korinto 3:​17.

To, unai ura kwalimu be mai ena hetoana. Iesu ese ia hahedinaraia goevagoeva Dirava ena taravatu haida be auka lasi. Hegeregere, Iesu ese iena hahediba taudia ia hamaoroa, ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena.” (Ioane 15:12) Bema taunimanima ibounai be unai taravatu idia badinaia, mauri be do ia namo herea! Unai dainai, Keristani taudia idia moalelaia ura kwalimu be mai ena hetoana. Aposetolo Petero ia gwau: “Umui be ura kwalimu taudia, to inai ura kwalimu do umui gaukaralaia kerere lasi. Unai ura kwalimu lalonai umui noho neganai, hunia dekenai kara dika do umui karaia lasi, to Dirava ena hesiai taudia mai guia danu do umui noho.”​​—⁠1 Petero 2:​16.

Ena be Keristani taudia be taravatu maragimaragi momo ese idia guia lasi, to edia ura hegeregerena dahaka be maoro bona dahaka be kerere idia abia hidi lasi. Dirava sibona amo idia mai hakaua herevadia ita abia be namo. Baibel ia hahedinaraia goevagoeva, ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Bema Dirava ena hakaua herevadia ita badinaia, hahenamo momo do ita davaria.​​—⁠Salamo 19:⁠11.

Hahenamo ta be emu mauri do oi moalelaia. Hegeregere, paragraf ginigunana ai ita herevalaia tau matamata be guna henaohenao bona koikoi tauna. Ia be matabodaga karadia ia karaia danu. Baibel ena taravatu ia dibaia neganai, iena mauri ia haidaua. Ia gwau: “Ena be Baibel ena taravatu ibounai be nega tamona lau badinaia diba lasi, to edia namo lau lalopararalaia. Hari lau davaria moalena be egu mauri gunana lalonai lau davaria lasi. Baibel ena taravatu oi badinaia neganai, emu mauri do ia namo. Dahaka be maoro bona dahaka be kerere edia idau do oi itaia bona mauri ena anina do oi diba.”

Witnes taudia milioni 6 mai kahana be unai idia mamia. Baibel ena hakaua herevadia ese idia ia durua ma haida ida idia noho namonamo totona, edia gaukara idia laloa maoromaoro totona, idia ia hadikaia diba karadia idia dadaraia, bona edia mauri idia moalelaia totona. Markus,a guna Baibel ena taravatu ia badinaia lasi, to hari ia badinaia mero matamana, ia gwau: “Egu mauri lalonai Baibel ena taravatu lau badinaia dainai, egu mauri lau naria namonamo diba.”b

Dahaka Oi Abia Hidi?

Baibel ena taravatu haida ese emu mauri lalonai gau haida dekenai oi ia koua, a? Oibe, badina unai be ita ibounai eda namo totona. To ia be taravatu momo ia gwauraia, a? Lasi. Bema sibona eda ura ita badinaia, dika do ita davaria. Baibel ena taravatu be idia hegeregere momokani, bona ita idia durua ita noho namonamo bona ita moale totona. Markus ia gwau: “Lagani haida idia hanaia murinai, lau laloparara Baibel ena taravatu ita badinaia be aonega karana. Ena be egu mauri be dala haida ai ia idau taunimanima haida amo, to lau laloa lasi egu mauri lalonai gau namodia haida lau reaia.”

Baibel ena taravatu be emu mauri lalonai oi badinaia neganai, hahenamo momo do oi davaria bona Dirava ena Hereva do oi ura henia. Bona hahenamo badana be, taravatu ia henia Diravana Iehova do oi lalokau henia diba. “Badina be Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”​​—⁠1 Ioane 5:⁠3.

Iehova be iseda Havaraia Tauna bona guba Tamana. Ia diba dahaka be namo ita totona. Ita dekenai taravatu momo ia henia lasi, to iseda namo totona, mai lalokau ida hakaua herevadia ia henia. Iehova be ita ia hagoadaia: “Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.”​​—⁠Isaia 48:⁠18.

[Footnotes]

[Picture on page 8]

Iesu ia gwau Dirava ena taravatu be metau lasi

[Picture on page 9]

Dirava ena taravatu ita badinaia neganai, do ita moale bona sibona do ita matauraia