Mauri Sivaraina

Emai Lalona Ai Hadaia Hesiai Gaukara Do Ai Hagugurua

Lena Davison ese ia sivarailaia

Emai peleini taria tauna ia gwau, “Gabu lau itaia namonamo diba lasi.” Daudau lasi murinai, peleini ena tari ia rakatania bona ena sea dekenai ia maserea. Egu adavana be peleini ia taria diba lasi dainai, ia hekwarahi bada unai tauna ia hanogaia totona. Unai negai kahirakahira ai mase, to unai sivarai lau do gwauraia lasi neganai, Papua New Guinea dekenai ai mai ena badina do lau herevalaia.

LAU be lagani 1929 ai lau vara Australia dekenai, bona New South Wales ena taoni, Sydney ai lau tubu daekau. Egu tamana, Bill Muscat be komiunis tauna, to Dirava ia abidadama henia. Lagani 1938 ai, egu tamana be pepa ta ia sainia, unai pepa amo gavamani idia noia bema gwaumaoro ia henia diba, Iehova ena Witnes taudia edia hedikwota ai ia gaukara tauna, Joseph F. Rutherford, be Sydney Town Hall dekenai ia haroro diba.

Tamana ia gwau: “Reana mai anina bada herevana ta do ia gwauraia.” Lagani 8 murinai, unai hereva ena anina ai lalopararalaia. Tamana ese painia ta ladana Norman Bellotti, be emai ruma dekenai ia boiria mai, Baibel ia herevalaia totona. Emai ruma bese taudia ese Baibel ena hereva momokani idia abia dae bona daudau lasi murinai Keristani hesiai gaukara idia goadalaia.

Lagani 1945 ai, sikuli lau hadokoa egu gorere sinana lau naria totona. Bona emai mauri durua totona, dabua turia gaukarana lau karaia. Saturday adorahi ibounai lau bona egu kakana Rose be painia haida ai bamoa bona Sydney Town Hall murimurinai dala haroro ai karaia. Lagani 1952 ai egu kakana badana, John, be United States ai Gilead misinari sikuli ia haorea bona Pakistan dekenai idia siaia lao. Lau danu be hesiai gaukara lau ura henia bona lau ura iena haheitalai lau tohotohoa. Unai dainai lagani 1953 ai, regula painia gaukara lau hamatamaia.

Headava Bona Misinari Gaukara

Daudau lasi murinai, John Davison lau hedavari henia, ia be Australia ai Iehova ena Witnes taudia edia brens opesi dekenai ia gaukara. Ena manau karana bona kara namodia dainai, ia lau ura henia. Tanobada Tuari Iharuana lalonai, iena Keristani gini siri karana dainai, nega toi ia idia hadiburaia. Ai ruaosi ese emai lalona ai hadaia emai mauri lalonai Keristani hesiai gaukara do ai karaia.

June 1955 ai, lau bona John ai headava. Basi ta ai hoia bona unai basi be emai ruma bamona ai halaoa. Unai amo Australia ena gunika gabudia dekenai ai lao bona haroro gaukara ai karaia diba. Lagani 1956 ai, Witnes taudia haida idia boiria New Guinea dekenai idia lao totona. New Guinea be Australia ena not ist kahanai ia noho motumotu badana.a Basileia ena sivarai be unai tanobada ena kahana dekenai idia do harorolaia lasi. Unai dainai maoromaoro unai boiboi herevana ai abia dae.

Unai negai, bema ta be ia ura New Guinea dekenai ia lao, namona be unuseniai ful-taim moni gaukara ta ia abia. Unai dainai John be gaukara ia tahua matamaia. Daudau lasi, New Britain ai ia noho timba utua kampani dekenai gaukara ta ia davaria. Wiki haida murinai, emai gabu ai rakatania bona New Guinea dekenai ai lao. Bona July 1956 ai Rabaul, New Britain dekenai ai ginidae. Unuseniai dina 6 bouti ai naria, Waterfall Bay dekenai ai lao totona.

Emai Hesiai Gaukara Waterfall Bay Dekenai

Waterfall Bay dekenai ai lao neganai, davara be ia dika, to dina haida murinai ai ginidae. Unai gabu be kilomita 240 Rabaul ena saut kahana dekenai ia noho. Bona unai gabu ai timba kampani ta be uda badana lalonai ia noho. Unai adorahi ai gaukara taudia ibounai be aniani totona idia helai neganai, gaukara biaguna ia gwau, “Mr. bona Mrs. Davison, inai kampani ena taravatu be, gaukara taudia ibounai ese edia tomadiho idia gwauraia.”

Ai diba momokani unai bamona taravatu ta ia noho lasi, to idia ai hadibaia kuku ai ania lasi dainai, ai dekenai lalohadai kerere idia abia. John ia gwau, “Ai be Iehova ena Witnes taudia.” Unai neganai, tau ta ia hereva lasi. Unai tatau be guna Tanobada Tuarina Iharuana lalonai idia tuari taudia, bona Witnes taudia idia lalodika henia, badina tuari lalonai idia vareai lasi. Unai nega amo, dala idia tahua ai dekenai metau momo idia henia totona.

Matamanai kampani ese gaukara taudia ibounai dekenai frisa bona stove ia henia, to ai dekenai unai gaudia idia henia lasi. Ai mailaia aniani momo idia bodaga dainai ai negedia. Bona John ese uda lalonai ia davaria stove dikana ta ai gaukaralaia emai aniani ai nadua totona. Gabeai, idia ese hanua taudia idia hamaoroa ai dekenai uma aniani do idia hoihoilaia lasi, unai dainai ai davaria uma aniani sibona ai ania. Danu, idia gwau ai be spai taudia bona idia itaia bema ta dekenai Baibel ai hadibaia. Unai negai malaria lau abia.

Herevana unai gaudia idia vara, to emai lalona ai hadaia emai hesiai gaukara do ai hagugurua. Unai dainai nao gado idia diba gaukara taudia rua ai nanadaia, ai dekenai Pidgin gado idia hadibaia totona. Bona idia dekenai Baibel ai hadibaia. Wikeni iboudiai, daudau gabudia dekenai ai lao gabu ai itaia totona. To dala dekenai ai davaria taudia ai haroro henidia; emai Baibel stiuden taudia be emai hereva idia hahanaia. Ai hanaia sinavaidia edia aru idia goada bona sinavai ena isena ai huala badadia be dina siahu ai idia hekure. Gau ta idia karaia lasi, to nega tamona sibona ai idia lulua.

Hadibaia Gaukara Ena Tulu Idauidau

Emai haroro gaukara ai habadaia neganai, Baibel ena sivarai ai taipia bona kamonai taudia dekenai ai hariharilaidia. Emai Baibel stiuden taudia ese ai idia durua pepapepa ginigunadia ai hahanaia totona. Hanuaboi momo ai unai bamona pepapepa handred momo ai hahanaia, bona hanua taudia bona bouti dekenai idia gaukara taudia dekenai ai hariharilaidia.

Lagani 1957 ai, loaloa naria tadikaka ta, John Cutforth, ese ai ia vadivadi henia.b Ai ia hamaoroa, laulau ai gaukaralaia be namo, idia duahiduahi diba lasi taudia dekenai Baibel ena hereva momokani ai hadibaia totona. Ia bona egu adavana be Baibel ena hahediba hereva badadia idia hadibaia totona, laulau idia torea. Gabeai, hora momo lalonai unai bamona laulau momo buka haida dekenai ai torea. Baibel stiuden taudia ta ta ese kopi ta idia abia bona unai idia gaukaralaia ma haida idia haroro henia totona. Gabeai, unai hadibaia dalana be inai tano ena gabu momo dekenai idia gaukaralaia.

Lagani rua mai kahana Waterfall Bay dekenai ai noho murinai, emai gaukara ena kontraka ia ore, bona gavamani ese gwaumaoro ia henia inai gabu dekenai ai noho totona. Unai dainai spesel painia gaukarana ai hamatamaia.

Rabaul Dekenai Ai Giroa Lou

Bouti amo Rabaul ena not kahana dekenai ai lao neganai, hanuaboi ai Wide Bay ena kopra bona koko plenteisini dekenai ai mahuta. Unai plenteisini biagudia idia buruka dainai idia ura Australia dekenai idia giroa lou, bona John idia hamaoroa plenteisini ia naria totona. Ena be unai ese emai lalona ia veria, to hanuaboi ai unai ai herevalaia bona ai lalotamona, ai be kohu tahua totona ai mai lasi New Guinea dekenai. Emai lalona ai hadaia painia gaukara do ai hagugurua. Unai dainai daba ia rere neganai, plenteisini biagudia ai hadibaia unai gaukara do ai abia dae lasi, bona bouti dekenai ai guia lou bona Rabaul dekenai ai lao.

Rabaul dekenai ai ginidae murinai, tano ma haida amo idia mai bona unuseniai idia noho Witnes taudia haida ai bamodia. Hanua taudia idia ura bada Basileia ena sivarai idia kamonai, bona Baibel stadi momo ai hamatamaia. Unai negai, gabu ta ai rentaia emai Keristani heboudia ai karaia totona, bona kahirakahira taunimanima 150 idia mai. Idia momo ese hereva momokani idia abia dae bona Dirava ena Basileia ena sivarai namona be gabu ma haida dekenai idia abia lao.​​—⁠Mataio 24:⁠14.

Danu ai be Vunabal, kilomita 50 Rabaul amo ia noho hanuana ta, ai vadivadi henia. Unai gabu taudia idia ura bada Baibel ena hereva momokani idia kamonai. To Katolik dubu ai ladana bada tauna ta ese unai sivarai ia kamonai. Nega ta Baibel stadi ai karaia neganai, ia bona dubu taudia haida ese emai stadi idia hadikaia bona hanua amo ai idia lulua. Ai kamonai, murina wiki ai kerere ma haida do idia karaia dainai, pulisi ai noia ai idia bamoa totona.

Unai dina ai, Katolik taudia momo herea be dala dekenai idia gini bona idia boiboi bona ai idia kirikirilaia. Idia momo be idia hegaegae nadi amo ai do idia hodoa totona. Unai negai, pris tauna ta be hanua taudia momo herea ia haboudia. Pulisi taudia ese ai idia hamaoroa ai be mai emai maoro hebou ai karaia totona, unai dainai hutuma be dala idia kehoa bena ai hanaia. To emai hebou ai hamatamaia bena daudau lasi murinai, pris ese hutuma ia hamaoroa regerege bada idia karaia totona. Pulisi idia hegeregere lasi idia koudia totona; unai dainai, pulisi ena tau badana ese ai ia hamaoroa unai gabu do ai rakatania, bona emai motuka dekenai ai ia hakaua lao.

Hutuma be ai idia hagegea bona ai idia hereva dika henia, idia kanudia bona edia imana be ai dekenai idia duduia, unai ibounai lalonai, pris tauna be ena imana ia lokua bona ia kiri sibona. Unai gabu ai rakatania murinai, pulisi edia tau badana ia gwau, unai bamona kara be guna ia itaia lasi. Ena be Vunabal ai idia noho taudia momo be hutuma edia kara dainai idia gari, to Baibel stiuden ta be Basileia ena hereva momokani totona ia gini goada. Unai dainai, gabeai New Britain dekenai taunimanima momo be hereva momokani idia abia dae.

New Guinea Dekenai Dala Ia Kehoa

November 1960 ai, ai idia siaia lao Madang dekenai. Unuseniai, dala momo idia kehoa ful-taim moni gaukara ai karaia totona. Kampani ta be lau idia doria edia dabua sitoa lau naria totona. Ma ta ia ura dabua turia gaukarana do lau karaia. Bona nao hahine haida idia gwau edia moni amo lau do idia durua sibona egu dabua turia sitoa ta lau haginia totona. To inai gabu dekenai ai mai ena badina ai laloa dainai, dala namona ai idia ai hadibaia unai gaukara do ai karaia lasi.​​—⁠2 Timoteo 2:⁠4.

Madang dekenai taunimanima momo ese sivarai namona idia abia dae, bona daudau lasi murinai kongrigeisen ta ai haginia. Bona dina haida motabaik amo ai loaloa eiava aena amo gunika hanuadia dekenai ai lao, haroro gaukara ai karaia totona. Dala badinai taunimanima ese idia noholaia lasi ruma gunadia idia noho, bona rei ai utua bona idia latanai ai mahuta. Bona tini aniani, bisikesi, bona tainamu ai abia lao danu.

Nega ta ai loaloa neganai, kilomita 50 Madang ena not kahanai ia noho hanua ta, Talidig ai vadivadi henia, unuseniai idia noho taudia idia ura bada idia kamonai. Idia be lauma dalanai idia goada idia lao neganai, unai gabu ena sikuli hedmasta ese idia ia koua Baibel idia stadilaia lasi totona, ia gwau unai be gavamani ena tano. Gabeai, ia ese pulisi taudia ia hamaoroa unai kamonai taudia edia ruma idia hadikaia bona uda dekenai idia lulua lao. To Talidig kahirakahira ia noho hanua ta ena tau badana, ese kamonai taudia dekenai gwaumaoro ia henia iena hanua dekenai idia noho totona. Gabeai, unai hanua ena tau badana ese Baibel ena hereva momokani ia abia dae, bona unuseniai Kingdom Hall ta idia haginia.

Hahanaia Gaukara Bona Loaloa Gaukara

Lagani 1956 ai New Britain dekenai ai ginidae bona lagani rua murinai, lau bona John idia hamaoroa Pidgin gado ai Baibel bukadia ai hahanaia totona. Unai gaukara be lagani haida lalonai ai karaia. Bena lagani 1970 ai, ai idia boiria brens opesi dekenai hahanaia gaukarana ai karaia totona. Unuseniai, ma haida dekenai Pidgin gado ai hadibaia danu.

Lagani 1975 ai, New Britain dekenai ai giroa lou sekit gaukara ai karaia totona. Lagani 13 lalonai, Papua New Guinea ena gabu momo dekenai ai be peleini, bouti bona motuka amo ai lao, eiava ai raka. Unai gabu momo dekenai dika bada ai davaria diba, hamatamaia kahanai lau gwauraia sivaraina bamona. Unai negai New Britain ena Kandrian peleini diho gabunai, peleini taria tauna ena bogana ia hisihisi bada dainai ia maserea. Peleini be autopilot dekenai ia atoa dainai peleini be sibona ia giroagiroa, bona John be ia hekwarahi bada ia maserea tauna ia hanogaia totona. Gabeai, ia noga bona ia itaia namonamo dainai, peleini ia abia diho tano dekenai. To unai murinai ia maserea lou.

Gaukara Ma Haida

Lagani 1988 ai, ai idia boiria lou brens opesi dekenai hahanaia gaukarana ai durua totona. Ai ibounai 50 be brens opesi dekenai ai noho bona ruma bese ta bamona ai gaukara hebou, danu unuseniai haida ai hadibaia gado hahanaia gaukarana idia karaia totona. Ai ibounai be daiutu ta ta lalonai ai noho. Lau bona John be emai daiutu ena iduara ai kehoa, ai ura unai dala amo Betele taudia ese ai idia vadivadi henia bona idia do ai dibaia. Unai dainai, Betele ruma bese taudia ai tura henia namonamo, ai lalokau bona heduru heheni diba.

Bena lagani 1993 ai, John be kudou gorerena (heart attack) amo ia mase. Unai be hegeregere egu kahana ta ia mase danu. Ai be lagani 38 ai headava bona unai lagani ibounai lalonai hesiai gaukara ai karaia hebou. To egu lalona lau hadaia Iehova ena goada dekenai do lau gaukara noho. (2 Korinto 4:⁠7) Egu daiutu ena iduara ia do kehoa noho, bona matamata taudia be lau idia vadivadi henia noho. Unai bamona hetura karana namona ese lau ia durua lalohadai namona lau dogoatao noho totona.

Lagani 2003 ai egu gorere dainai, hari Australia ai Sydney brens opesi dekenai lau gaukara. Hari egu mauri lagani be 77, bona Gado Hahanaia Dipatmen dekenai lau do gaukara noho, bona haroro gaukara lau karaia danu. Egu turadia, bona lauma dalanai lau naria natudia bona tubudia ese lau idia hamoalea bada.

Betele dekenai egu daiutu ena iduara ia do kehoa noho, bona nega momo haida ese lau idia vadivadi henia. To bema egu iduara ia koua, iduara dekenai idia pidipidi, idia ura diba lau namo eiava lasi. Lau mauri noho lalonai, egu lalona lau hadaia egu hesiai gaukara do lau hagugurua bona egu Dirava, Iehova, do lau hesiai henia.​​—⁠2 Timoteo 4:⁠5.

[Footnotes]

[Maps on page 25]

(For fully formatted text, see publication)

NEW GUINEA

AUSTRALIA

Sydney

INDONESIA

PAPUA NEW GUINEA

Talidig

Madang

PORT MORESBY

NEW BRITAIN

Rabaul

Vunabal

Wide Bay

Waterfall Bay

[Credit Line]

Map and globe: Based on NASA/Visible Earth imagery

[Picture on page 24]

Lau bona John lagani 1973 ai, Lae, New Guinea ena hebouhebou ta ai

[Picture on page 27]

Lagani 2002 ai, Papua New Guinea ena brens opesi dekenai