Duahia Taudia Idia Henanadai . . .

Iesu be Aneru Badana, Mikaela, A?

▪ Haere be, oibe. Tano momo ai, taunimanima haida edia ladana be momo. Baibel lalonai danu haida edia ladana be momo. Hegeregere, Iakobo ena ladana ma ta be Israela. (Genese 35:10) Aposetolo Petero ena ladana ma haida be​​—⁠Simeona, Simona, Petero, Kepa, bona Simona Petero. (Mataio 10:2; 16:16; Ioane 1:​42; Kara 15:​7, 14, NW ) Edena bamona ita diba Iesu ena ladana ma ta be Mikaela? Baibel ena siri haida mani ita laloa.

Baibel ese inai aneru badana, Mikaela, be nega faiv ia gwauraia. Daniela bukana ese unai ladana be nega toi ia gwauraia. Daniela 10:​13, 21 ai ita itaia, Mikaela ese aneru ta ia hamauria, bona Baibel ese Mikaela ia gwauraia “aneru badana ta” bona ‘iseda lohia.’ Daniela 12:​1 ai ita itaia, dokona neganai, “Mikaela do ia toreisi. Ia be lohia aneru badana, oiemu bese taudia ia gimaia tauna.”

Danu, Apokalupo 12:7 ese Mikaela be inai bamona ia herevalaia, “Mikaela mai ena aneru momo danu” be tuari badana ta idia karaia, bona Satani Diabolo bona ena aneru dikadia be guba amo idia negea diho.

Ataiai siridia ese idia hahedinaraia, Mikaela be Dirava ena taunimanima ia gimaia totona ia tuari sibona lasi, to Iehova ena inai tauna badana, Satani, ia tuari henia danu.

Iuda siri 9 ai Mikaela ia gwauraia “aneru badana momokani.” Inai ladana, aneru badana, ia hedinarai sirina ma ta be 1 Tesalonika 4:​16 (NW ), unuseniai Paulo ese ia toreisi lou tauna Iesu ia herevalaia neganai, ia gwau: “Lohiabada [Iesu] be mai boiboi bada ida guba amo do ia diho, aneru badana ena gadona ida, bona Dirava ena kibi regena ida.” Unai dainai Iesu Keriso sibona be aneru badana.

Inai siri ta ta amo dahaka ita dibaia? Iesu Keriso be Aneru Badana bona Mikaela. Inai ladana rua​​—⁠Mikaela (anina be “Daika be Dirava Bamona?”) bona Iesu (anina be “Iehova be Hahemauri Tauna”)​​—⁠ese idia hahedinaraia Iesu ena maduna be Dirava ena lohia siahuna ia abia isi. Filipi 2:​9 ia gwau: “Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia.”

Iesu be tanobada ai taunimanima bamona ia do vara lasi neganai, ia be guba dekenai ia noho. Unai dainai ia do vara lasi neganai, aneru ta be Maria ia vadivadi henia bona ia hamaoroa lauma helaga ena siahu amo natuna ta do ia havaraia bona ena ladana do ia gwauraia Iesu. (Luka 1:​31) Iesu be haroro gaukara lalonai, nega momo ena guba maurina ia herevalaia.​​—⁠Ioane 3:​13; 8:​23, 58.

Unai dainai Iesu be tanobada dekenai ia do mai lasi neganai, iena ladana be Aneru Badana Mikaela. Tanobada ai Iesu be mase amo ia toreisi lou bona guba dekenai ia giroa lou murinai, ia be aneru badana Mikaela ena gaukara ia karaia lou, “badina be unai dekena amo Tamana Dirava ena ladana do idia abia isi momokani.”​​—⁠Filipi 2:​11.