Dirava Ena Lauma Ena Hakaua Dalana Oi Abia Dae, A?
“Lau ura oiemu Lauma ese lau do ia hakaua, vadaeni dala namona, bona mai maurina dekenai do lau raka.”—SAL. 143:10.
1, 2. (a) Iehova ena lauma ese iena hesiai taudia ia durua negadia haida mani oi gwauraia. (b) Dirava ese ena lauma helaga be dina badadia sibona ai ia gaukaralaia, a?
LAUMA helaga ena gaukara oi laloa neganai, dahaka gaudia oi laloa? Goada taudia Gideona bona Samson ese idia karaia gaudia oi laloa, a? (Gun. 6:33, 34; 15:14, 15) Reana, Keristani taudia ginigunadia edia gari lasi karana oi laloa. Eiava Stefano be Sanhedrin vairanai ia gini neganai ia manau karana oi laloa. (Kara 4:31; 6:15) Iseda nega ai, intenesenel hebouhebou ai tadikaka taihu edia moale karana oi laloa, a? Eiava iseda tadikaka be politikol orea ta idia durua lasi dainai dibura rumadia ai idia lokaia karana oi laloa, a? Haroro gaukara be tanobada ibounai dekenai idia karaia noho be hoa gauna, ani? Unai gaudia ibounai ese lauma helaga ena gaukara siahuna ia hahedinaraia.
2 To, Dirava ese ena lauma helaga be dina badadia sibona ai ia gaukaralaia, a? Lasi. Baibel ia gwau Keristani taudia be “lauma helaga ena dala hegeregerena [idia] raka noho,” “lauma helaga ese [idia] ia hakaua” bona “lauma helaga ena hakaua dalana hegeregerena [idia] noho.” (Gal. 5:16, 18, 25) Unai hereva idauidau ese idia hahedinaraia lauma helaga ena siahu be iseda mauri ia haidaua diba. Dina ta ta lalonai, namona be Iehova ita noia lauma helaga ena heduru amo iseda lalohadai, hereva bona kara do ita hanamoa. (Salamo 143:10 duahia.) Dirava ena lauma ita abia dae neganai, ita ia durua kara namodia ita hahedinaraia, unai amo ma haida ita hagoadaia bona unai ese Dirava ia hanamoa.
3. (a) Dahaka dainai lauma helaga ese ita ia hakaua be namo? (b) Edena henanadai edia haere do ita tahua?
3 Dahaka dainai lauma helaga ese ita ia hakaua be gau badana? Badina “tauanina ena ura dikadia” be mai ena siahu ita ia biagua totona bona ia be Lauma helaga ena ura ida ia hegeregere lasi. Oibe, ita be Adamu ena natudia dainai, ita goevadae lasi bona kara dikadia ita karaia. (Galatia 5:17 duahia.) To, Dirava ena lauma be ita ia hakaua totona dahaka ita karaia be namo? Gau haida ita karaia diba tauanina ena ura dikadia ita koua totona, a? Hari ita ese “lauma helaga ena huahua” siks, “boga-auka, hebogahisi, kara namo, abidadama, manau, bona sibona biagua karana” do ita stadilaia bona unai henanadai edia haere do ita tahua.—Gal. 5:22, 23.
Boga-Auka Bona Manau ese Maino Ia Havaraia
4. Edena dala ai kongrigeisen lalonai boga-auka bona manau karana ese maino ia havaraia?
4 Kolose 3:12, 13 duahia. Kongrigeisen lalonai boga-auka bona manau karadia ese maino idia havaraia. Unai huahua rua ese ita idia durua ma haida ita kara namo henidia totona. Hegeregere, ita ia habadua tauna ida maino ita karaia bona ita ia kara dika henia o hereva dika henia tauna ena dika davana ita haloua lasi. Bema ita bona Keristani tadikaka ta huanai hekwakwanai ta ia vara ita badu heheni lasi, to mai manau ida ita hekwarahi iseda tadikaka ida maino ita karaia totona. Dahaka dainai kongrigeisen lalonai boga-auka bona maino ita hahedinaraia be gau badana? Badina ita ibounai be goevadae lasi taudia.
5. Paulo bona Banaba huanai dahaka ia vara, bona edia sivarai amo dahaka ita dibaia?
5 Mani Paulo bona Banaba huanai ia vara gauna ita laloa. Idia ruaosi be lagani momo lalodiai sivarai namona harorolaia gaukarana idia karaia hebou. Idia ta ta be mai edia kara namodia. To, nega ta “hepapahuahu badana ia vara, bona idia parara.” (Kara 15:36-39) Unai sivarai ese ia hahedinaraia Dirava idia hesiai henia taudia goadadia huanai danu nega haida hepapahuahu idia vara. Bema kongrigeisen lalonai tadikaka ta be ma ta dekenai ia badu, hepapahuahu ia vara lasi totona, dahaka ia karaia be namo?
6, 7. (a) Iseda Keristani tadikaka ida ita hepapahuahu lasi totona, edena Baibel sisiba ita badinaia be namo? (b) ‘Ita kamonai haraga, to hereva haraga lasi, bona badu haraga lasi’ ena namo be dahaka?
6 Baibel haida idia gwau Paulo bona Banaba be ta ta dekenai idia badu dikadika. Bema Keristani tadikaka ta be tadikaka ma ta ida hekwakwanai ta idia herevalaia lalonai, badu mamina ia daekau, namona be Iamesi 1:19, 20 ena sisiba ia badinaia, ia gwau: “Lauegu lalokau tadikaka e, inai umui diba. Namona be taunimanima ibounai be idia kamonai haraga, to idia hereva haraga lasi, bona idia badu haraga lasi, badina taunimanima ta ena badu ese Dirava ena kara maoromaoro ia havaraia diba lasi.” Bema ia itaia ena tadikaka ena toana be ia moale lasi, reana do ia gwau unai hekwakwanai be gabeai idia herevalaia, bona ma gau idauna ta idia herevalaia diba, o hepapahuahu ia vara lasi totona ia raka siri be namo.—Aon. 12:16; 17:14; 29:11.
7 Unai sisiba ita badinaia neganai dahaka namo do ita davaria? Bema Keristani tauna be ia manau, hekwakwanai ia gurigurilaia, bona ena tadikaka do ia hereva henia dala maorona ia lalohadailaia, ia hahedinaraia Dirava ena lauma ena hakaua dalana ia abia dae. (Aon. 15:1, 28) Lauma helaga ena siahu ese ia biagua neganai, ia be manau bona boga-auka karadia ia hahedinaraia. Unai amo ia be Efeso 4:26, 29 ena sisiba ia badinaia, ia gwau: “Umui badu neganai, umui kara dika lasi. . . Namo lasi hereva bodagadia umui gwauraia, to hereva namodia umui gwauraia, unai amo emui hereva idia kamonai taudia do umui hagoadaia.” Oibe, manau bona boga-auka karadia ita hahedinaraia neganai, ita be kongrigeisen lalonai maino bona lalotamona karadia ita habadaia.
Ruma Bese Lalonai Hebogahisi Bona Kara Namo Hahedinaraia
8, 9. Hebogahisi bona kara namo be dahaka? Bona edena dala ai ruma bese maurina idia hanamoa diba?
8 Efeso 4:31, 32; 5:8, 9 duahia. Siahu negana ai lai namona bona ranu keruma ese ita hamoalea hegeregerena, hebogahisi bona kara namo be ruma bese lalonai ita hahedinaraia neganai, ibounai do idia moale. Ta be hebogahisi karadia ia karaia badina ia be ma haida edia namo ia atoa guna, bona iena kara bona hereva amo ma haida ia durua. Kara namo be hebogahisi karana bamona. Ta be kara namo ia hahedinaraia anina be kara ta ia karaia ma haida ia durua totona. Heabidae karana be kara namona ta. (Kara 9:36, 39; 16:14, 15) To, kara namo ena anina ma ta ia noho.
9 Kara namo ia karaia tauna be kara maoromaoro ia laloa bada tauna. Kara namodia ese iseda kudouna ai idia noho gaudia idia hahedinaraia, bona unai be mai anina bada. Ia be hegeregere au huahua ta bamona, ia mage bona toana be namo herea bona oi utua neganai, ena lalona ibounai danu ia mage namo herea, bona kahana ta ia bodaga lasi. Unai hegeregerena, lauma helaga ese ia havaraia kara namo be Keristani tauna ena kara ibounai dekenai ia hedinarai.
10. Dahaka ese Keristani ruma bese taudia ia durua diba lauma helaga ena huahua idia hahedinaraia totona?
10 Keristani ruma bese lalonai, dahaka ese do ia durudia ta ta dekenai hebogahisi bona kara namo idia hahedinaraia totona? Mai anina bada gauna be, Dirava ena Hereva do ita diba maoromaoro. (Kol. 3:9, 10) Tama haida be pura ta ta ai Ruma Bese ena Tomadiho idia karaia neganai, lauma helaga ena huahua ta idia stadilaia. Unai karaia totona be auka lasi. Oiemu gado ai idia noho buka haida oi gaukaralaia diba lauma helaga ena huahua ta ta umui stadilaia totona. Reana pura ta ta ai paragraf haida umui duahia diba, unai amo lauma helaga ena huahua ta be pura haida lalonai umui stadilaia. Paragraf lalonai idia noho siri umui duahia bona herevalaia danu. Umui stadilaia gaudia umui badinaia bona Iehova umui noia emui kara ia hanamoa totona. (1 Tim. 4:15; 1 Ioa. 5:14, 15) Unai bamona stadi karana ese ruma bese lalonai ta ta kara henia dalana ia hanamoa diba.
11, 12. Keristani headava taudia ese hebogahisi karana idia stadilaia dainai dahaka namo idia davaria?
11 Headava matamata taudia rua idia ura edia headava maurina idia moalelaia dainai, abia hidi idia karaia lauma helaga ena huahua ta ta do idia stadilaia. Dahaka namo idia davaria? Hahine ia gwau: “Emai stadi amo ai dibaia hebogahisi do ai hahedinaraia anina be matabodaga karadia do ai dadaraia. Bona unai ese ai ia durua bada ema bona hari. Ai dibaia gauna ta be do ai manau bona ta ta emai dika do ai gwauatao. Bona ai dibaia, ta ta dekenai ‘tanikiu’ bona ‘lau sori’ herevana ai gwauraia be mai anina bada.”
12 Ma Keristani headava taudia rua idia gwau, edia headava lalonai hekwakwanai idia davaria neganai, idia laloparara ta ta dekenai hebogahisi idia hahedinaraia lasi. Abia hidi idia karaia hebogahisi karana do idia stadilaia hebou. Dahaka namo idia davaria? Tau ia gwau: “Hebogahisi karana ai stadilaia neganai, ai laloparara namona be ta ta dekenai lalohadai kereredia ai abia lasi, to emai kara namodia do ai laloa bada bona ta ena namo do ai atoa guna. Egu adavana dekenai hebogahisi lau hahedinaraia anina be, ia do lau noia ena lalohadai ia gwauraia hedinarai totona bona do lau badu henia lasi. Danu, lau hekokoroku lasi be namo. Ta ta dekenai hebogahisi karana ai hahedinaraia neganai, ai hepapahuahu momo lasi bona ai moale.” Emu ruma bese be lauma helaga ena huahua stadilaia karana amo namo ia davaria diba danu.
Sibona Oi Noho Neganai Kara Dika Dadaraia
13. Dahaka gaudia ese iseda hetura karana Iehova ida ia hadikaia diba?
13 Keristani taudia be taunimanima vairadiai bona sibona idia noho negadiai, Dirava ena lauma ena hakaua dalana idia badinaia be namo. Hari Satani ena tanobada ai, moale karadia lalonai hemataurai lasi bona matabodaga karadia momo idia hedinarai. Unai gaudia ese iseda hetura karana Iehova ida ia hadikaia diba. Keristani tauna be dahaka ia karaia be namo? Baibel ia gwau: “Kara mirodia ibounai bona vaia idia vara momo kara dikadia do umui atoa siri, bona mai manau ida Dirava ese emui lalona ai ia hadoa herevana umui abia dae, unai ese umui ia hamauria diba.” (Iam. 1:21) Mani ita tahua, edena dala ai lauma helaga ena huahua ta, abidadama, ese ita ia durua Iehova ena matanai ita goeva noho totona.
14. Bema ta ia laloa Dirava ia noho lasi, dahaka ia vara diba?
14 Abidadama ena anina be ita abia dae Iehova be ia noho momokani. To bema ita laloa Dirava be ita ia itaia lasi, kara dika do ita karaia. Mani, idaunegai Dirava ena taunimanima ese idia karaia gauna ita laloa. Iehova ese peroveta tauna Esekiela dekenai ia hahedinaraia Israela taudia be sibona idia noho negadiai, kara dika idia karaia. Ia gwau: “Tanobada tauna e, oi itaia, a? Israela tau badadia ese hunia dekenai idia karaia noho gauna oi itaia, a? Idia ese dirava koikoi edia laulaudia momo idia noho daiutu lalonai idia tomadiho noho. Idia gwau, ‘Lohiabada ese ai do ia itaia lasi, ia ese Israela ia rakatania vadaeni.’ ” (Ese. 8:12) Oi laloparara dahaka dainai unai hekwakwanai ia vara, a? Idia laloa Iehova be ia noho lasi bona idia karaia gaudia ia itaia diba lasi.
15. Dirava abidadama henia karana ese edena dala ai ita ia gimaia diba?
15 To, mani Iosepa ena haheitalai ita laloa. Ena be sibona ia noho, bona ena ruma bese bona Israela taudia ese ia idia itaia diba lasi, to Iosepa ia ura lasi Potifara ena adavana ida ia heudahanai. Dahaka dainai? Iosepa ia gwau: “Dirava ena vairana dekenai inai bamona do lau kara dika be edena bamona?” (Gen. 39:7-9) Oibe, ia abia dae momokani Iehova be ia noho bona ia karaia gaudia ia itaia diba. Bema ita abia dae momokani Dirava be ia noho, matabodaga laulaudia do ita itaia lasi bona sibona ita noho neganai, Dirava ese ia inai henia karadia do ita dadaraia. Ita be Salamo torea tauna bamona do ita gwau: “Egu ruma dekenai do lau noho namonamo, mai egu kerere ta lasi. Lau ese kara dika ta do lau ura henia lasi, lasi momokani.”—Sal. 101:2, 3.
Emu Kudouna Oi Gimaia —Sibona Biagua Karana Hahedinaraia
16, 17. (a) ‘Eregabe tauna mai ena laloa kavakava’ be dahaka hedibagani dekenai ia moru? (b) Rau 26 ena laulau bamona, ena be ita be matamata o buruka, to edena dala ai ‘eregabe tauna mai ena laloa kavakava’ bamona ita moru diba?
16 Sibona ita biagua karana be lauma helaga ena huahua ginigabena. Ita ia durua Dirava ia ura henia lasi gaudia ita dadaraia totona. Danu, ita ia durua iseda kudouna ita gimaia totona. (Aon. 4:23) Mani Aonega Herevadia 7:6-23 dekenai ia noho sivaraina ita laloa. Ia hahedinaraia “eregabe tauna ta . . . mai ena laloa kavakava” be ariara hahinena ena hegahusi herevadia dainai ia moru. Ia “be hahine ta ia noho rumana kahirakahira, ia raka noho, ariara ena kona dekenai.” Reana ia ura ena toana sibona do ia itaia dainai, unai gabu dekenai ia lao. To, ia laloparara lasi ariara hahinena ena hegahusi herevadia dainai “ena mauri be ia dika vadaeni.”
17 Edena dala ai unai eregabe tauna ese unai kara dika ia dadaraia diba? Bema inai sisiba ia badinaia: “Unai bamona hahine ena dala dekenai, do umui raka lao lasi.” (Aon. 7:25) Ita dibaia gauna be inai: Bema ita ura Dirava ena lauma ese ita ia hakaua, ita idia hamorua diba hedibagani ita dadaraia be namo. Dala haida ai ta be ‘eregabe tauna mai ena laloa kavakava’ bamona ia karaia diba, hegeregere ia ese TV ena program idauidau o Internet ena Web sait idauidau ia itaia. Reana matabodaga laulaudia ia tahua lasi, to unai gaudia idia hedinarai neganai, ia raraia sibona. Metairametaira, iena kudouna dekenai ponografi laulaudia itaia urana do ia goada, ena lalomamina do ia hamiroa bona ena hetura karana Dirava ida ia hadikaia diba. Oibe, ena mauri ia haboioa diba.—Roma 8:5-8 duahia.
18. Keristani tauna be iena kudouna ia gimaia totona, edena dala ai sibona biagua karana ia hahedinaraia diba?
18 Oibe, TV dekenai mahuta hebou laulau idia hedinarai neganai, sibona biagua karana ita badinaia bona TV ita koua haraga be namo. To matamanai, aonega karana be unai bamona laulau ita itaia lasi! (Aon. 22:3) Namona be sibona ita biagua bona taravatu ita atoa bona badinaia. Hegeregere, kompiuta be ibounai ese idia itaia gabuna ai ita atoa karana ese ita ia gimaia diba. Haida idia gwau idia ia durua gauna be, ma haida idia noho negana sibona ai, kompiuta idia gaukaralaia o TV idia itaia. Haida be edia lalona idia hadaia Internet do idia gaukaralaia lasi. (Mataio 5:27-30 duahia.) Namona be ita bona iseda ruma bese ita gimaia totona, taravatu haida ita atoa, unai amo “iseda lalokau be kudou goevana amo, lalomamina namona amo, bona abidadama momokanina amo ia vara.”—1 Tim. 1:5.
19. Lauma helaga ena siahu ese ia havaraia huahua ese dahaka hahenamo idauidau ia mailaia?
19 Lauma helaga ena siahu ese ia havaraia huahua be hahenamo momo idia mailaia. Manau bona boga-auka karadia ese kongrigeisen lalonai maino ia havaraia. Hebogahisi bona kara namo ese ruma bese lalonai moale ia havaraia. Abidadama bona sibona biagua karana ese ita idia durua Iehova kahirakahira ita noho bona ita goeva noho totona. To, unai sibona lasi, Galatia 6:8 ia gwau: “Dirava ena lauma hegeregerena ia hadoa tauna be Dirava ena lauma amo, mauri hanaihanai do ia abia.” Oibe, Keriso ena boubou gauna dainai, Iehova ese lauma helaga ena siahu amo ena hakaua dalana idia badinaia taudia dekenai mauri hanaihanai do ia henia.
Edena Bamona Do Oi Haere?
• Edena dala ai manau bona boga-auka karadia ese kongrigeisen lalonai maino ia havaraia?
• Dahaka ese Keristani tauna ia durua diba ena ruma dekenai hebogahisi bona kara namo ia hahedinaraia totona?
• Edena dala ai abidadama bona sibona biagua karana ese Keristani tauna ena kudouna ia gimaia?
[Picture on page 24]
Edena dala ai hepapahuahu karana oi dadaraia diba?
[Picture on page 25]
Lauma helaga ena huahua stadilaia karana ese ruma bese ia durua diba
[Picture on page 26]
Abidadama bona sibona biagua karana ita badinaia neganai, dahaka hahetoho ita dadaraia diba?