‘Dirava Ena Mamoe Oreana Umui Naria’
“Dirava ena mamoe oreana, emui henari henunai idia noho be do umui naria. Ta ese umui ia doria dainai lasi, to sibona emui ura dainai do umui karaia.”—1 PET. 5:2.
1. Dahaka dainai Petero be ena revareva ginigunana lalonai, tadikaka taihu ia hagoadaia?
ROMA dekenai Nero ese Keristani taudia ia do dagedage henidia lasi neganai, aposetolo Petero be ena revareva ginigunana ia torea. Ia ura ena tadikaka taihu ia hagoadaia. Badina Diabolo “ia raka loaloa” Keristani taudia ia hadikaia ore totona. Unai dainai ‘do idia laloa maoromaoro’ bona ‘Dirava ena imana goadana henunai idia sibona idia hamanaua,’ unai amo Diabolo idia dadaraia diba. (1 Pet. 5:6, 8) Namona be mai lalotamona ida idia noho hebou danu. Namo lasi idia “heatu heheni,” badina unai kara amo ‘ta ta idia hadikaia ore’ garina.—Gal. 5:15.
2, 3. Daika ita heatu henia be namo, bona dahaka gaudia haida do ita herevalaia?
2 Hari, ita danu be unai bamona hekwakwanai ita davaria. Diabolo be dala ia tahua ita ia hadikaia ore totona. (Apok. 12:12) Bona kahirakahira “hisihisi badana do ia vara, tanobada ena matamaia negana amo, . . . unai bamona hisihisi ta ia vara lasi.” (Mat. 24:21) Keristani taudia ginigunadia be heai momo karana dekenai idia naria namonamo, bona ita danu be unai bamona ita karaia be namo. Unai bamona ita karaia totona, namona be tau badadia mai edia diba amo heduru ita tahua.
3 Elda taudia ese ‘Dirava ena mamoe oreana’ naria karana idia laloa bada dalana, mani ita laloa. (1 Pet. 5:2) Unai murinai, mamoe naria gaukarana idia karaia namonamo dalana do ita laloa. Bona stadi gabena ai, kongrigeisen taudia ese mamoe oreana naria totona ‘idia gaukara goada’ taudia idia matauraia dalana, do ita herevalaia. (1 Tes. 5:12) Unai gaudia ita laloa dobu karana ese ita do ia durua, iseda Inai Tauna badana ita dadaraia, badina ita laloparara ita be ia ita heatu henia noho.—Efe. 6:12.
Dirava Ena Mamoe Oreana Naria
4, 5. Tau badadia ese mamoe oreana be edena bamona idia laloa be namo? Haheitalai gwauraia.
4 Petero be Keristani taudia ginigunadia huanai idia noho tau badadia ia hagoadaia, namona be Dirava ena lalohadai hegeregerena, ia henia mamoe oreana do idia laloa. (1 Petero 5:1, 2 duahia.) Ena be Petero be kongrigeisen gunalaia tauna ta, to ena hereva dalana amo elda taudia ia matauraia. Bona ia ida idia gaukara hebou taudia bamona idia ia hagoadaia. (Gal. 2:9) Petero bamona, hari Hakaua Oreana ese kongrigeisen elda taudia ia hagoadaia, namona be idia hekwarahi Dirava ena mamoe oreana naria gaukara badana idia karaia totona.
5 Aposetolo Petero ese tau badadia ia hamaoroa, ‘Dirava ena mamoe oreana, edia henari henunai idia noho do idia naria.’ Gau badana be idia laloparara, mamoe oreana be Iehova bona Iesu Keriso edia. Elda taudia be Dirava ena mamoe idia naria dalana hegeregerena, edia gaukara ena badina do idia gwauraia hedinarai. Reana emu turana ta ese oi ia hamaoroa, ia be gabu ta dekenai do ia lao dainai ena natudia oi naria. Idia do oi naria bona ubua, ani? Bema idia ta ia gorere, ia totona medikol heduruna do oi tahua, ani? Unai hegeregerena, elda taudia ese ‘Dirava ena kongrigeisen idia hakaua. Unai kongrigeisen be ia sibona ena Natuna ena rara amo ia hoia.’ (Kara 20:28) Namona be idia laloatao, unai mamoe ta ta be Keriso Iesu ena dava bada rarana amo ia hoidia. Elda taudia be edia gaukara do idia gwauraia hedinarai dainai, idia ese mamoe oreana idia ubua, gimaia, bona naria.
6. Idaunegai mamoe naria taudia korikoridia edia gaukara be dahaka?
6 Baibel negadiai, mamoe naria taudia korikoridia edia gaukara mani ita laloa. Ena be dina ia siahu bona hanuaboi ia keru, to idia hekwarahi edia mamoe idia gimaia totona. (Gen. 31:40) Mamoe totona edia mauri idia haboioa diba. Mamoe naria merona, Davida ese dagedage animal idauidau amo ena mamoe ia hamauria, laiona bona bea amo danu. Ia ese dagedage animal ta ta edia ‘huina ia dogoatao, ia botaia, bona ia alaia mase.’ (1 Sam. 17:34, 35) Ia gari lasi! Unai dagedage animal kahirakahira momokani ia lao! Oibe, dala idauidau ia tahua ena mamoe ia hamauria totona.
7. Laulau dalanai, elda taudia ese edena dala ai Satani ena uduna amo mamoe idia hamauria diba?
7 Diabolo be laiona bamona dagedage karadia ia havaraia dainai, hari elda taudia ese unai bamona karadia dekenai idia naria namonamo. Unai idia karaia totona idia gari lasi be namo, unai amo laulau dalanai Diabolo ena uduna amo mamoe idia hamauria diba. Tadikaka haida idia naria namonamo lasi bona Satani ena tarapu lalonai idia moru, unai dainai elda taudia ese unai bamona tadikaka idia durudia be namo. (Iuda 22, 23 duahia.) Momokani, elda taudia be Iehova ena heduru dainai edia gaukara idia hagugurua. Bero ia davaria mamoe be mai hebogahisi ida idia rosia, ena bero idia kumia, bona Dirava ena Hereva amo idia hagoadaia.
8. Elda taudia ese mamoe oreana be edeseni idia hakaua lao, bona edena dala ai?
8 Danu, mamoe ia naria tauna ese ena mamoe be rei bona ranu gabuna namona dekenai ia hakaua lao. Unai hegeregerena, elda taudia ese mamoe oreana be kongrigeisen dekenai idia hakaua lao bona idia hagoadaia kongrigeisen ena hebou idia lao hanaihanai, unai amo “nega korikori ai edia aniani” do idia abia. (Mat. 24:45) Namona be elda taudia ese nega idia atoa manoka taudia idia durua, Dirava ena Hereva amo idia mai lauma aniani idia abia dae totona. Reana ia boio mamoe ia ura orea dekenai ia giroa lou. Elda taudia ese unai tadikaka idia hagaria lasi, to mai lalokau ida ia dekenai Baibel ena hakaua herevadia idia gwauraia bona ena mauri lalonai unai do ia badinaia daladia idia hahedinaraia.
9, 10. Edena dala ai elda taudia ese manoka tauna idia laloa bada be namo?
9 Oi gorere neganai, oi ura edena bamona doketa oi itaia? Nega sisina lalonai oi ia kamonai henia bona muramura ia henia haraga, unai amo gorere tauna ma ta ia itaia doketa do oi itaia, a? Eiava oi ia kamonaia, emu gorere ena badina ia gwauraia, bona muramura maorona ia henia doketa do oi itaia, a?
10 Unai hegeregerena, elda taudia ese manoka tauna idia kamonai henia namonamo bona idia durua, unai be hegeregere “Iehova ena ladanai dehoro amo ia . . . idia horoa.” (Iamesi 5:14, 15 duahia.) Gileada dekenai ia noho dehorona bamona, Dirava ena Hereva ese manoka tauna ia durua diba. (Ier. 8:22; Ese. 34:16) Bema Baibel ena hakaua herevadia ia badinaia, unai ese ia do ia durua Iehova ia hesiai henia lou totona. Oibe, elda taudia ese manoka tauna ia gwauraia gaudia idia kamonai bona ia ida idia guriguri hebou, unai ese namo bada do ia havaraia.
Ta ese Idia Ia Doria Dainai Lasi, To Sibodia Edia Ura Dainai
11. Dahaka dainai elda taudia idia ura Dirava ena mamoe oreana idia naria?
11 Petero ese tau badadia dekenai mamoe naria gaukarana lalonai idia karaia bona idia karaia lasi gaudia ia herevalaia. Elda taudia ese Dirava ena mamoe oreana idia naria, ‘ta ese idia ia doria dainai lasi, to sibodia edia ura dainai idia karaia.’ Dahaka dainai elda taudia be sibodia edia ura dainai tadikaka idia durua? Dahaka dainai Petero ese Iesu ena mamoe ia naria bona ubua? Badina ia ese Lohiabada ia lalokau henia. (Ioa. 21:15-17) Lalokau dainai, elda taudia be ‘sibodia totona idia mauri lasi, to idia dainai ia mase bona ia toreisi lou tauna totona idia mauri.’ (2 Kor. 5:14, 15) Unai lalokau bona Dirava bona edia tadikaka lalokau henia karana ese elda taudia ia veria, edia goada, kohu, bona nega idia henia mamoe oreana idia naria totona. (Mat. 22:37-39) Mai edia ura ida sibona idia henia, unai bamona idia karaia totona.
12. Edena dala ai aposetolo Paulo be sibona ia henia?
12 Edena dala ai elda taudia be sibodia idia henia? Mamoe oreana naria karana dekenai, idia ese aposetolo Paulo idia tohotohoa, ia ese Iesu ia tohotohoa bamona. (1 Kor. 11:1) Paulo bona ia idia bamoa taudia be Tesalonika taudia idia lalokau henia dainai, idia dekenai ‘sivarai namona idia harorolaia sibona lasi, to mai moale ida edia mauri danu idia henia’ Tesalonika taudia idia durua totona. Unai bamona idia karaia neganai, idia ‘kara auka lasi, to idia be ena natudia ia ubua bona naria sina ta bamona idia kara.’ (1 Tes. 2:7, 8) Paulo ese natuna ia ubua sina ta ena hemami ia lalopararalaia. Sina be ena natuna totona gau ibounai ia karaia, hanuaboi momokani danu ia toreisi unai natuna ia ubua totona.
13. Edena dala ai elda taudia ese laloa namonamo karana idia hahedinaraia diba?
13 Namona be elda taudia ese mamoe naria gaukarana bona edia ruma bese ena maduna idauidau idia laloa namonamo. (1 Tim. 5:8) Nega haida, elda taudia be edia ruma bese ida do idia gaukaralaia negana be kongrigeisen totona idia gaukaralaia. Elda taudia ese unai maduna rua idia huaia hebou namonamo totona, dala ta be inai: Nega haida edia Ruma Bese Ena Tomadiho dekenai ma haida idia boiria. Idia hanaia laganidia lalonai, Japan ai ia noho elda ta, Masanao be headava lasi taudia bona tamadia be orea lalonai idia noho lasi ruma besedia ia boiria, ena famili stadi dekenai idia helai totona. Gabeai, Masanao ese ia durua taudia haida be elda taudia ai idia lao bona iena haheitalai namona idia tohotohoa.
Koikoi Dalanai Lasi, To mai Ura Bada ida Mamoe Oreana Naria
14, 15. Dahaka dainai elda taudia ese ‘koikoi dalanai kohu abia’ karana dekenai idia naria namonamo? Bona edena dala ai unai kara dekenai Paulo idia tohotohoa diba?
14 Petero ese elda taudia ia hagoadaia danu, mamoe oreana idia naria neganai, ‘koikoi dalanai kohu abia totona do idia karaia lasi, to mai edia ura bada ida idia karaia.’ Elda taudia edia gaukara dekenai nega bada idia haorea, to edia gaukara ena davana idia tahua lasi. Petero ia itaia, ia ida idia gaukara hebou tau badadia ia sisiba henia be namo, “koikoi dalanai kohu abia totona” mamoe oreana idia naria lasi. “Babulonia Badana” ena tomadiho gunalaia taudia be koikoi dalanai kohu momo idia abia, to taunimanima momo be ogogami maurina idia noholaia. (Apok. 18:2, 3) Badina namona dainai, hari elda taudia be unai kara dekenai do idia naria namonamo.
15 Paulo be elda taudia dekenai haheitalai namona ia hahedinaraia. Ia be aposetolo tauna dainai, Tesalonika Keristani taudia dekenai maduna metau ia henia diba, to unai bamona ia karaia lasi bona ‘aniani ia ania kava lasi.’ Ia be ‘dina bona hanuaboi ia gaukara bona ia hekwarahi.’ (2 Tes. 3:8) Hari idia noho elda taudia bona loaloa naria taudia be unai bamona idia karaia danu. Ena be tadikaka taihu edia heabidae karana idia abia dae, to tadikaka taihu ‘dekenai metau idia henia lasi idia naridia totona.’—1 Tes. 2:9.
16. Elda taudia be ‘mai edia ura bada ida’ mamoe oreana idia naria ena anina be dahaka?
16 Elda taudia be ‘mai edia ura bada ida’ mamoe oreana idia naria. Sibona edia ura dadaraia karana amo unai idia hahedinaraia, idia ura mamoe idia durudia. To lalokau elda taudia ese mamoe oreana idia doria lasi Iehova idia hesiai henia, eiava ma haida idia hagoadaia lasi do idia kara helulu Dirava idia hesiai henia totona. (Gal. 5:26) Elda taudia idia laloparara mamoe ta ta edia kara be idauidau. Bona mai ura bada ida edia tadikaka idia durudia Iehova idia hesiai henia totona.
Mamoe Oreana Biagua Auka Lasi, To Haheitalai Namona Hahedinaraia
17, 18. (a) Dahaka dainai nega haida aposetolo taudia ese manau karana idia hahedinaraia be auka? (b) Aposetolo taudia dekenai ia vara gauna amo dahaka ita dibaia?
17 Ita herevalaia vadaeni bamona, namona be elda taudia idia laloatao, idia naria mamoe ta ta be Dirava ena, idia edia lasi. Unai dainai, ‘Dirava ese idia dekenai ia henia taudia do idia biagua auka lasi.’ (1 Petero 5:3 duahia.) Nega haida, Iesu ena aposetolo taudia be lalohadai kererena idia abia dainai, ladana bada idia tahua. Idia be bese idauidau edia lohia taudia bamona, idia ura ladana bada idia abia.—Mareko 10:42-45 duahia.
18 Hari inai negai, bema tadikaka idia ura ‘naria tauna ena maduna idia abia,’ vadaeni unai maduna idia ura abia ena badina idia laloa namonamo be namo. (1 Tim. 3:1) Hari elda gaukara idia karaia taudia be mai momokani ida sibona idia nanadaia, ‘Aposetolo taudia bamona, lau be dagi o ladana bada abia totona elda gaukara lau karaia, a?’ Bema aposetolo taudia idia hekwarahi unai kara idia dadaraia, vadaeni elda taudia idia gaukara goada ma haida biagua auka karana idia dadaraia totona.
19. Elda taudia ese mamoe idia gimaia totona, dahaka idia laloatao be namo?
19 Elda taudia ese “dagedage uda sisia” amo mamoe idia gimaia totona, nega haida edia siahu idia gaukaralaia sisiba aukana idia henia. (Kara 20:28-30) Paulo ese Tito ia hamaoroa ‘mai siahu ida taunimanima do ia hadibaia bona do ia sisiba henia’ totona. (Tito 2:15) To, elda taudia ese ta idia sisiba auka henia o hahemaoro komiti idia karaia neganai, kerere tauna idia matauraia. Elda taudia ese ta idia hereva henia auka lasi, to mai manau ida idia kara henia, badina idia diba nega momo unai ese ta ia durua, dala maorona ia badinaia totona.
20. Edena dala ai elda taudia ese Iesu idia tohotohoa diba?
20 Keriso ena haheitalai namona ese elda taudia ia durua mamoe idia lalokau henia totona. (Ioa. 13:12-15) Ia ese haroro bona hahediba taudia halaoa gaukarana dekenai, ena hahediba taudia ia hadibaia dalana ita duahia neganai, unai ese ita ia durua. Iena manau karana ese ena hahediba taudia edia lalona ia veria, unai dainai idia manau bona ‘idia laloa ma haida ese idia ia hereaia.’ (Fili. 2:3) Unai hegeregerena, hari elda taudia be Iesu ena haheitalai idia tohotohoa, bona idia ese ‘mamoe oreana dekenai haheitalai namona idia hahedinaraia.’
21. Elda taudia be dahaka hahenamo idia naria?
21 Petero ena sisiba herevana tau badadia dekenai ia hadokoa neganai, vaira nega ena gwauhamata namona ta ia herevalaia. (1 Petero 5:4 duahia.) Horoa elda taudia be Keriso ida guba dekenai “ia boio diba lasi hairai korona” do idia abia. To, “mamoe ma haida” amo idia mai elda taudia be tanobada dekenai “mamoe naria tauna badana” ena lohia henunai Dirava ena mamoe oreana do idia naria. (Ioa. 10:16) Stadi gabena ai, kongrigeisen taudia ese gunalaia taudia idia durua daladia do ita herevalaia.
Riviu
• Dahaka dainai Petero ese elda taudia ia sisiba henia Dirava ena mamoe oreana idia naria totona?
• Edena dala ai elda taudia ese manoka taudia idia durua be namo?
• Dahaka dainai elda taudia ese Dirava ena mamoe oreana idia naria be namo?
[Picture on page 21]
Baibel negadiai mamoe naria taudia bamona, hari elda taudia ese idia naria “mamoe” idia gimaia be namo