Tama Sina Edia Hereva
Bema emu natuna be priskul dekenai, reana metau gaudia haida do oi davaria. Hegeregere, ena tai lolo karana be edena bamona do oi hanamoa? Bona edena dala ai ia oi durua, maoro bona kerere edia idau ia itaia bona sisiba maorona oi henia diba? Mani tama sina haida edia hereva ita itaia.
TAI LOLO KARANA
“Natuna ena mauri lagani be rua neganai, ia ura gau momo ia abia. Emai natuna mero be unai bamona. Bema ia ura gaudia ai henia lasi, gau idauidau ia negea kava. Inai be emai natuna roboana, unai dainai ia tai lolo neganai, ai diba lasi dahaka do ai karaia. Ma haida ese ai idia hamaoroa, unai be vaia natudia edia kara, to unai ese ai ia durua lasi.”—Susan, Kenya.
“Emai natuna kekeni ena lagani be rua neganai, floa dekenai ia hekure, ia tai lolo bona gau idauidau ia kikia kava . . . Unai ese ai ia habadua! Ai ura ia ai hereva henia, to unai ese namo ta ia havaraia lasi. Lau bona egu adavana be ia ai siaia ena daiutu dekenai bona ai hamaoroa ena lalona ia namo neganai, ia do ai hereva henia. Ena hemami ia namo murinai, ai ta be ena daiutu dekenai ai lao bona ia ai durua ia karaia karana ia lalopararalaia totona. Unai ese anina namona ia havaraia. Nega ta ai kamonai Dirava ia guriguri henia, bona ia noia ena kerere ia gwauatao totona. Nega ia hanaia lalonai, ena tai lolo karana ia hadokoa.” —Yolanda, Spain.
“Natudia maragidia idia ura edia tama sina ese edia ura gaudia idia henia sibona. Bema natuna be oi taravatua gauna ta ia karaia bona unai oi koua lasi, unai ese natuna ia hadaradaraia. Ai itaia bema ai kara auka bona emai hereva ai badinaia, natudia idia laloparara edia ura gaudia abia totona idia tai lolo karana be maoro lasi.”—Neil, Britain.
MATAHAKANI
“Bema natuna ta ena mauri lagani be faiv henunai, ai diba namonamo lasi bema ai herevalaia gaudia ia kamonai o lasi. Hadibaia loulou karana be mai anina bada. Nega tausen momo unai gauna oi herevalaia loulou, emu imana oi gaukaralaia bona mai gado rege goadana ida oi hereva henia.”—Serge, France.
“Ena be emai natudia foa be gabu tamona dekenai idia bada, to edia kara be idauidau. Ta ena kara be, bema ia diba ia ese ai ia habadua, do ia tai sibona; ma ta ena kara be ai ia doria ena ura gaudia ai henia totona. Nega haida idia ai raraia auka o ai gwau henidia, to nega haida idia ai panisia.”—Nathan, Canada.
“Namo lasi edia hereva ibounai oi abia dae. To oi kara auka momokani lasi. Nega haida bema natuna be ena kara dainai ia sori momokani, ai laloa unai negai matahakani aukana ai henia lasi.”—Matthieu, France.
“Lau hekwarahi taravatu momo lau atoa lasi totona, to lau karaia vadaeni taravatu do lau haidaua lasi. Egu mauri lagani toi natuna mero ia diba, kamonai lasi karana ena dika be dahaka, bona unai ese ia durua ena kara ia biagua totona. Momokani, lau hesiku neganai, ena kerere lau laloa bada lasi. To egu hereva lau haidaua lasi totona, kara ta lau karaia be namo.” —Natalie, Canada.
EMU KARA O HEREVA HAIDAUA LASI
“Bema tama o sina ta be ena kara eiava hereva ia haidaua, natudia maragidia ese unai idia laloatao diba.”—Milton, Bolivia.
“Nega haida egu natuna ena lalohadai gau ta dekenai be dala idauidau ai ia henanadailaia, badina ia ura diba emai haere do ia tamona eiava lasi. Bema egu haere be iena sinana ena amo ia idau, do ia laloa taravatu korikorina ta be lasi bamona, bona unai ese dala ia kehoa ena ura ia karaia totona.”—Ángel, Spain.
“Lau moale negadiai, egu natuna mero ena kara kerere lau laloa lasi, to lau badu negadiai, ia lau panisia momokani. To gabeai lau laloparara, unai ese ena gwau-edeede karana do ia habadaia sibona.”—Gyeong-ok, Korea.
“Gau badana be natudia maragidia idia laloparara, bema kara ta ia kerere hari, anina be hanaihanai unai kara ia kerere.”—Antonio, Brazil.
“Bema tama sina ese taravatu idia haidaua momo, vadaeni natuna do ia laloa tama bona sina edia lalohadai be idauidau. To bema tama sina ese edia taravatu idia badinaia, natudia do idia diba gau ta ia kerere neganai, anina be hanaihanai do ia kerere. Unai dala amo tama sina idia hahedinaraia edia natudia idia gimaia bona lalokau henia.”—Gilmar, Brazil.
“Natudia idia itaia bema taunimanima haida idia noho, unai be nega namona tama sina amo gau haida idia noia, badina edia ura gaudia do idia abia sibona. Bema egu haere be lasi, matamana amo unai lau gwauraia, bona egu natuna mero dekenai lau hahedinaraia goevagoeva ena noinoi loulou karana do lau abia dae lasi.”—Chang-seok, Korea.
“Gau badana be tama sina idia lalotamona. Bema lau bona egu adavana be gau ta dekenai ai lalotamona lasi, ai sibona ai noho neganai, unai ai herevalaia. Natudia idia diba bema edia tama sina idia lalotamona lasi, bona idia laloa unai be nega namona edia tama sina idia doria edia ura idia abia dae totona.”—Jesús, Spain.
“Bema natuna ia diba ena tama sina idia lalotamona bona idia ia doria diba lasi, unai ese ia do ia gimaia. Kamonai bona kamonai lasi karana ena davana ia diba.”—Damaris, Germany.
“Lau bona egu adavana be emai natuna kekeni dekenai gau namona ta ai gwauhamatalaia neganai, emai gwauhamata ai hagugurua. Unai amo ia diba ai karaia gwauhamatadia ia abia dae diba.”—Hendrick, Germany.
“Bema egu bosi ese hanaihanai egu gaukara ia haidaua, do lau moale lasi. Natudia danu be unai bamona. Do idia noho namo bema idia diba taravatu idia noho bona unai taravatu be idia idau lasi. Danu, namona be idia diba bema idia kamonai lasi, panisi do idia abia bona unai do ai haidaua lasi.”—Glenn, Canada.
[Blurb on page 16]
“Emui Oibe be Oibe bona emui Lasi, be Lasi.”—Iamesi 5:12
[Box/Pictures on page 17]
FAMILI SIVARAINA
Ai Palani Lasi Natuna Havaraia Totona Gau Haida Ai Haidaua
Tom bona Yoonhee Han ese idia sivarailaia
Tom: Lau bona Yoonhee be hua siks sibona ai headava, bena ia rogorogo. Lau ura lasi gari toana lau hahedinaraia, badina lau ura Yoonhee ia diba, ia be lau dekenai heduru bona goada totona ia tabekau diba. To egu lalona ai lau gari!
Yoonhee: Lau lalohisihisi bona lau gari! Lau taitai, badina lau mamia lau hegeregere lasi sina ta ai lau lao totona.
Tom: Bona lau mamia lau hegeregere lasi tama ta ai lau lao! To tama sina ma haida ida ai herevahereva murinai, ai laloparara palani lasi rogorogo be nega momo ia vara. Danu, haida be tama sina ai idia lao ena moale idia herevalaia neganai, unai ese ai ia durua. Metairametaira egu gari bona daradara ia ore bona mai moale ida egu natuna ena vara dinana lau naria.
Yoonhee: Amanda ia vara murinai, hekwakwanai ma haida ai davaria. Hanaihanai ia tai, bona wiki momo lau mahuta namonamo lasi. Lau ura lasi lau aniani dainai, lau hesiku bada. Matamanai, lau ura sibona lau noho. To, gabeai lau laloa unai ese lau do ia durua lasi. Unai dainai lau lao bona sina ma haida ida lau noho hebou. Unai amo idia dekenai egu lalohadai lau herevalaia, bona lau laloparara lau sibona ese unai hekwakwanai lau davaria lasi.
Tom: Lau hekwarahi, unai amo ruma bese ena maduna idauidau do ai huaia noho. Hegeregere, ai be Iehova ena Witnes taudia dainai, ai ura hanaihanai haroro gaukara bona Keristani heboudia dekenai ai lao. Danu, natuna ia vara dainai gau ma haida ai hoia be namo, guna ai laloa lasi gaudia. Ai ura emai moni ai gaukaralaia namonamo, unai amo do ai abitorehai lasi bona ai lalohekwarahi momo lasi.
Yoonhee: Matamanai lau laloa haroro gaukara do lau karaia lasi, badina beibi idia tai momo. To taunimanima be beibi dekenai idia moale. Unai ese lau ia durua haroro gaukara lau karaia bona egu natuna dekenai lalohadai maorona lau abia.
Tom: Baibel ia gwau, natudia be ‘Dirava ena harihari gaudia.’ (Salamo 127:3) Unai amo lau laloparara, natuna be harihari gauna namo hereana. Harihari gauna ta oi abia neganai, abia hidi oi karaia diba: Unai do oi gaukaralaia namonamo eiava do oi negea kava. Lau diba gauna be inai, lau ura egu natuna ia beibi negana amo ela bona ia matamata negana ai, ia lau durua.
Yoonhee: Nega haida, mauri lalonai idia vara gaudia dainai ai hoa, bona ena be ai palani lasi natuna havaraia totona, to unai be hoa gauna namona. Hari Amanda ena mauri lagani be siks, bona ia be mai anina bada egu mauri lalonai.
[Picture]
Tom, Yoonhee bona edia natuna kekeni, Amanda