Mai Kudouna Ibounai ida Boubou Gaudia Henia
“Herevana dahaka umui karaia, mai emui kudouna bona goada ibounai ida do umui karaia, Iehova totona.”—KOL. 3:23.
1-3. (a) Iesu ese ena mauri ia bouboulaia dainai, ita be boubou gaudia do ita henia lasi, a? (b) Edena henanadai ita laloa be namo?
APOSETOLO edia negai, Iehova ese ena taunimanima ia hadibaia Iesu ena mauri davalaia boubouna ese Mose ena Taravatu ia kokia. (Kol. 2:13, 14) Taravatu be hakaua tauna bamona ‘Keriso dekenai idia ia hakaua lao.’ Unai dainai, lagani momo lalonai Iuda taudia ese idia karaia boubou karadia ibounai be unai nega ai ia ore.—Gal. 3:24.
2 To, namo lasi ita gwau Keristani taudia be boubou gaudia idia laloa bada lasi. Badina aposetolo Petero ia gwau: “Dirava ena lauma ena hahekau henunai boubou gaudia umui henia bona Dirava ese Iesu Keriso amo unai boubou gaudia ia abia dae.” (1 Pet. 2:5) Bona aposetolo Paulo ese ia hahedinaraia, Keristani tauna ena mauri be Dirava dekenai ia gwauhamatalaia “boubou gauna bamona.”—Roma 12:1.
3 Iehova ita hesiai henia totona, gau haida ita dadaraia neganai, unai be hegeregere Iehova dekenai boubou gauna ita henia. Vanegai, Israela taudia ese idia karaia boubou gaudia ita stadilaia, to hari Iehova ese iseda boubou gaudia ia abia dae totona dahaka ita karaia be namo?
DINA TA TA ITA KARAIA GAUDIA
4. Dina ta ta ai dahaka ita laloatao be namo?
4 Reana ita laloa dina ta ta ai ita karaia gaudia, hegeregere ruma gaukara, moni gaukara, sikuli, maketi o sitoa ita lao be boubou karadia lasi. Badina idia be Dirava hesiai henia gaukaradia lasi. To, iseda hetura karana Iehova ida ia goada totona, namona be dina ta ta ai ita karaia gaudia do ita laloa namonamo. To, bema emu mauri be Iehova dekenai oi gwauhamatalaia vadaeni, eiava kahirakahira unai do oi karaia, namona be oi laloatao dina ta ta ai oi karaia gaudia ese emu hetura karana Iehova ida ia hanamoa eiava hadikaia diba. Dina ena hora ibounai 24 lalonai ita be Keristani taudia, unai dainai ita karaia gaudia ibounai lalonai Baibel ena hakaua herevadia ita badinaia be badana. Paulo ia gwau: “Herevana dahaka umui karaia, mai emui kudouna bona goada ibounai ida do umui karaia, Iehova totona umui karaia bona taunimanima totona lasi.”—Kolose 3:18-24 duahia.
5, 6. Iseda kara o dabua toana ita laloa neganai, edena henanadai ita lalodia be namo?
5 Momokani, dina ta ta ita karaia gaudia be Dirava hesiai henia gaukaradia lasi. To, Paulo ia gwau ‘herevana dahaka ita karaia, mai eda kudouna bona goada ibounai ida do ita karaia Iehova totona.’ Anina be dina ta ta ai iseda kara ita naria namonamo be gau badana. Edena dala ai unai sisiba ita badinaia diba? Dina ta ta ai iseda kara bona dabua toana amo ita hahedinaraia ita be Keristani taudia, a? Eiava eda kara o dabua ena toana be dika dainai, ita ura lasi ma haida idia diba ita be Iehova ena Witnes taudia, a? Namo lasi unai ita karaia! Ita ura lasi eda kara o dabua toana dainai, haida ese Dirava ena ladana idia gwauraia dika.—Isa. 43:10; 2 Kor. 6:3, 4, 9.
6 Inai stadi lalonai, mai eda kudouna ibounai ida Iehova ita hesiai henia diba daladia do ita herevalaia. Unai ita karaia neganai, namona be ita laloatao, Israela taudia be boubou gaudia namodia sibona Iehova dekenai idia henia.—Eso. 23:19.
KERISTANI MAURI DALANA
7. Dirava dekenai eda mauri ita gwauhamatalaia ena anina be dahaka?
7 Emu mauri oi gwauhamatalaia neganai, oi be abia hidi namona oi karaia. Oi gwau emu mauri ibounai lalonai Iehova do oi hesiai henia. Anina be oi emu mauri ai oi karaia gaudia ibounai lalonai Iehova oi atoa guna. (Heberu 10:7 duahia.) Iehova ena lalohadai oi tahua bona ena ura hegeregerena emu abia hidi oi karaia neganai namo oi davaria. (Isa. 48:17, 18) Oibe, ita helaga bona moale badina ita be eda hadibaia tauna Iehova ita tohotohoa.—Lev. 11:44; 1 Tim. 1:11.
8. Israela taudia be boubou helagadia sibona idia henia karana amo dahaka ita dibaia?
8 Israela taudia ese Iehova dekenai idia henia boubou gaudia be helaga. (Lev. 6:25; 7:1) Heberu herevana idia hahanaia “helaga” anina be parara eiava gau ta be Dirava totona idia atoa siri. Unai dainai, bema ita ura Iehova ese iseda boubou gaudia ia abia dae, namona be tanobada ena miro karadia amo ita parara bona Iehova ese ia inai henia gaudia ita inai henia. (1 Ioane 2:15-17 duahia.) Anina be Dirava ese ia ura henia lasi taudia o karadia ita dadaraia, badina ita ura lasi Dirava ena matanai ita miro. (Isa. 2:4; Apok. 18:4) Danu, matabodaga karadia ita raraia o lalohadailaia lasi.—Kol. 3:5, 6.
9. Dahaka dainai ma haida ita kara henia dalana ita laloa be namo?
9 Paulo ia gwau: “Umui laloaboio lasi, kara namodia do umui karaia noho bona ma haida ida emui kohu do umui haria, badina Dirava ese unai bamona boubou karadia ia moalelaia.” (Heb. 13:16) Unai dainai, bema nega ibounai ma haida ita durua, Iehova ese iseda kara be boubou gaudia bamona do ia abia dae. Bema ma haida ita lalokau henidia, ita hahedinaraia ita be Keristani taudia momokanidia.—Ioa. 13:34, 35; Kol. 1:10.
TOMADIHO DAINAI ITA KARAIA GAUDIA
10, 11. Iehova ese eda haroro bona tomadiho karana be edena bamona ia laloa? Bona edena henanadai ita laloa be namo?
10 Ma haida ita kara namo henia dalana ta be, idia dekenai ‘iseda helaro ita gwauraia hedinarai.’ Nega bona gabu idauidau ai oi haroro, a? Paulo ia gwau namona be hanaihanai “Dirava ita hanamoa. Unai be boubou gauna bamona Dirava dekenai ita henia. Ita ese iseda uduna ita gaukaralaia, ma haida dekenai iena ladana ita gwauraia totona.” (Heb. 10:23; 13:15; Hos. 14:2) Hesiai Hebou ese ita ia durua haroro daladia ita hanamoa, bona haroro horadia ita habadaia totona. Namona be ita laloatao, ruma-ta-ruma-ta gaukara bona nega bona gabu idauidau ai haroro karana be Dirava hanamoa bouboudia bona iseda tomadiho ena kahana ta. Unai dainai, mai iseda kudouna ibounai ida ita karaia be namo. Herevana, iseda noho daladia be idauidau, to bema Iehova hesiai henia karana ita laloa bada, nega bada do ita atoa haroro gaukara ita karaia totona.
11 Ita be nega ibounai ruma dekenai o kongrigeisen heboudia ai Iehova ita tomadiho henia. Ena be Sabati taravatuna ita badinaia lasi bona Ierusalema dekenai aria totona ita lao lasi, to unai taravatu amo gau momo ita dibaia. Herevana ita bisi bada, to Dirava ia ura nega ita atoa Baibel ita stadilaia, ita guriguri, bona hebou ita lao totona. Bona tama be ena ruma bese taudia ida Baibel ia stadilaia be namo. (1 Tes. 5:17; Heb. 10:24, 25) Unai dainai sibona ita nanadaia, ‘Dirava tomadiho henia dalana lau hanamoa diba, a?’
12. (a) Idia gabua bonana namo muramura be hari dahaka ida ita hahegeregerea diba? (b) Edena dala ai guriguri be bonana namo muramura bamona?
12 King Davida ese Iehova ia noia: “Lau ura egu guriguri do oi abia dae, bona ena mamina oi dekenai be namo, muramura mai bonana namona bamona.” (Sal. 141:2) Namona be sibona ita nanadaia: ‘Lau be nega hida Iehova lau guriguri henia bona dahaka lau gurigurilaia?’ Apokalupo bukana ia gwau “helaga taudia edia guriguri” be bonana namo muramura bamona. Ia hahedinaraia Iehova ese ia abia dae guriguri be unai bamona. (Apok. 5:8) Idaunegai Israela ai, idia gabua bonana namo muramura be Iehova ia gwauraia dalana ai idia hegaegaelaia namonamo neganai, Iehova ese ia abia dae. (Eso. 30:34-37; Lev. 10:1, 2) Unai hegeregerena, bema ita laloa guriguri be helaga bona Iehova ese ia gwauraia dalana ai ia ita guriguri henia, ita diba eda guriguri do ia kamonai.
HENIA KARANA BONA ENA HAHENAMO
13, 14. (a) Paulo durua totona, Epafrodito bona Filipi kongrigeisen be dahaka idia karaia? Paulo be dahaka ia laloa? (b) Edena dala ai edia haheitalai ita tohotohoa diba?
13 Tanobada ibounai gaukarana durua totona ita henia monina, herevana ia bada o maragi, be boubou gauna bamona. (Mar. 12:41-44) Aposetolo edia negai, Filipi kongrigeisen ese Epafrodito be Roma dekenai idia siaia Paulo ia durua totona. Bona ia ese kongrigeisen ena harihari monina ia abia lao danu. Filipi tadikaka be nega momo Paulo dekenai unai bamona hariharibada karana idia hahedinaraia. Unai idia karaia badina idia ura lasi Paulo be moni totona do ia lalohekwarahi, to ena haroro gaukara sibona do ia laloa. Paulo ese edia hariharibada karana be edena bamona ia laloa? Ia gwau unai be “bonana namo muramura, boubou gauna namona bamona, bona Dirava ese ia moalelaia.” (Filipi 4:15-19 duahia.) Paulo ese Filipi tadikaka edia hariharibada karana ia laloa bada, bona Iehova ese unai kara ia moalelaia danu.
14 Hari inai negai, tanobada ibounai gaukarana durua totona ita henia moni be Iehova ese ia moalelaia danu. Bona Iehova ia gwauhamata bema Basileia ita tahua guna, ia ese iseda abidadama do ia hagoadaia bona eda dabu gaudia do ia henia.—Mat. 6:33; Luka 6:38.
TANIKIU KARANA OI HAHEDINARAIA
15. Dahaka dainai Iehova oi tanikiu henia be namo?
15 Iehova ita tanikiu henia ena badina be momo. Ita dekenai mauri, aniani, dabua, ruma bona hodahoda namona ia henia. Danu, ita tanikiu henia badina Baibel ena hereva momokani dainai ia ita abidadama henia diba bona ita be mai eda helaro. Namona be Iehova ita tomadiho henia bona ita hanamoa, badina ita totona gau namodia momo ia karaia vadaeni bona gau ibounai ia havaraia.—Apokalupo 4:11 duahia.
16. Edena dala ai ita hahedinaraia Keriso ena mauri davalaia boubou ita laloa bada?
16 Vanegai stadi ai ita dibaia gauna be, Keriso ena mauri davalaia boubouna be Dirava ese taunimanima dekenai ia henia harihari gauna hereadaena. Unai ese Dirava ena lalokau bada karana ia hahedinaraia. (1 Ioa. 4:10) Edena dala ai ita hahedinaraia unai harihari gauna ita laloa bada? Paulo ia gwau: “Keriso ena lalokau ese ai ia hagoadaia, badina be hari ai diba momokani, tau tamona be taunimanima ibounai dainai ia mase. . . . Unai amo idia mauri taudia be sibona totona do idia mauri lasi, to idia dainai ia mase bona ia toreisi lou tauna totona do idia mauri.” (2 Kor. 5:14, 15) Paulo ena hereva ena anina be, bema Dirava ena harihari gauna ita laloa bada, iseda mauri do ita gaukaralaia Ia bona Ena Natuna ita hanamoa totona. Bema mai kudouna ibounai ida Dirava ita kamonai henia bona haroro bona hahediba gaukarana ita karaia, ita hahedinaraia Dirava bona Keriso ita lalokau henidia.—1 Tim. 2:3, 4; 1 Ioa. 5:3.
17, 18. Haida be edena dala ai edia hesiai gaukara idia habadaia? Haheitalai gwauraia.
17 Emu hesiai gaukara oi habadaia diba, a? Haida be Iehova ese idia totona ia karaia gaudia idia laloa bada dainai, edia mauri idia haidaua bona nega bada idia atoa haroro gaukara bona hesiai gaukara ma haida idia karaia totona. Haida be hua tamona eiava haida lalonai idia heduru painia, bona ma haida be regula painia gaukara idia karaia. Bona ma haida be brens opesi, Kingdom Hall, Assembly Hall, bona misinari rumadia haginia gaukarana idia karaia. Unai bamona gaukara amo Iehova ita tanikiu henia diba. Bema Dirava ena kara namodia ita laloa bada, eda hesiai gaukara amo Iehova do ita tanikiu henia bona do ia moale.
18 Keristani taudia momo be unai bamona idia karaia. Hegeregere, Morena be Katolik hahinena ta, to gau momo dekenai ia daradara dainai, Katolik dubu bona Asia tanodia edia tomadiho amo haere ia tahua. To, Iehova ena Witnes taudia ida Baibel ia stadilaia neganai, ena henanadai edia haere ia davaria. Baibel amo ia dibaia gaudia dainai ia moale, bona ia ura Iehova ia tanikiu henia. Unai dainai, ia bapatiso murinai, maoromaoro heduru painia gaukara ia matamaia, bona gabeai regula painia gaukara ia karaia. Lagani 30 idia ore vadaeni bona taihu Morena be ful-taim hesiai gaukara ia do karaia noho.
19. Edena dala ai Iehova dekenai boubou gaudia namodia ita henia diba?
19 Iehova ena abidadama hesiai taudia momo be gau haida dainai idia painia diba lasi. To, herevana dahaka hesiai gaukara ita karaia, ita ibounai be boubou gaudia namodia ita henia diba. Ita be Iehova ena ladana ita abia taudia dainai, namona be iseda kara bona dabua toana be Baibel ena hakaua herevadia hegeregerena. Bona Dirava ita abidadama henia, badina ita diba momokani iena ura be do ia hagugurua. Danu, iseda kara namodia amo ma haida ita durua diba sivarai namona idia abia dae totona. Unai amo ita hahedinaraia Iehova ese ita totona ia karaia gau namodia ita laloa bada. Oibe, namona be mai eda kudouna ibounai ida Iehova dekenai boubou gaudia ita henia noho.
[Blurb on page 25]
Iehova ena kara namodia dainai, oi ura emu haroro gaukara oi habadaia, a?
[Picture on page 23]
Nega bona gabu idauidau ai oi haroro, a?