Babalau Bona Meamea Edia Dika be Dahaka?

Barbaraa ia matamata negana amo, ia matahanai, gado haida ia kamonai, bona ia laloa ia be mase taudia ida ia herevahereva. Ia bona ena adavana, Joachim, be babalau bona meamea bukadia bona tarot kasi idia duahia. Unai kasi ese idia hahedinaraia idia be moni momo do idia abia, bona unai ia vara. Dina ta, kasi ese idia hahedinaraia taunimanima dikadia be edia ruma dekenai do idia mai, bona edena bamona sibodia do idia gimaia.

ENA be babalau bona meamea karadia be sene taudia ese idia karaia karana, to hari momo be babalau bona meamea karadia idia karaia. Tanobada hegegemadai momo be toni idia atoa, Ouija bodi idia gaukaralaia, bona babalau taudia idia itaia, edia vaira negana idia dibaia o sibona gimaia totona. German magasin ladana Focus ena atikol ta “Laptop and Lucifer” ia gwau: “Intanet ese babalau bona meamea karadia ia hahedinaraia.”

Baibel ese babalau bona meamea karadia ia herevalaia. Reana ena hereva dekenai do oi hoa.

Babalau Bona Meamea Karadia Dekenai Baibel be Dahaka Ia Gwau?

Dirava ese Israela besena dekenai ia henia taravatuna ia gwau: “Meamea kara do umui karaia lasi, puripuri bona vada danu do umui karaia lasi. Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi. Lohiabada, emui Dirava ese unai bamona kara bodaga idia karaia taudia ia badu henia noho.” (Deuteronomi 18:10-12) Dahaka dainai Iehova ese unai taravatu ia atoa?

Matamanai ai gwauraia ekspiriens ese ia hahedinaraia bamona, momo idia laloa mauri taudia be mase taudia ida idia herevahereva diba bona babalau taudia amo idia abia hereva be mase taudia amo idia mai. Dubu momo ese unai idia hahedibalaia, idia gwau taunimanima idia mase neganai idia be lauma taudia edia gabu ai idia noho. To, Baibel ia gwau: “Mase taudia be gau ta idia diba lasi.” (Hadibaia Tauna 9:5) Bona ia gwau mase taudia be idia mahuta bamona, idia vara gaudia idia diba lasi.b (Mataio 9:18, 24; Ioane 11:11-14) Bema unai bamona, reana do oi henanadai, Edena dala ai taunimanima be lauma taudia ida idia herevahereva? Dahaka dainai lauma taudia ida idia herevahereva?

Lauma Taudia ida Herevahereva Karana

Evanelia bukadia ese idia hahedinaraia Iesu be tanobada ai ia noho neganai, lauma taudia ida ia herevahereva. Mareko 1:23, 24 ai “lauma dikana” ese Iesu ia hamaoroa: “Lau diba momokani oi be daika.” Lauma dikadia be oi idia diba danu. To idia oi diba, a?

Dirava ese taunimanima ia do karaia lasi neganai, aneru milioni momo ia karaia. (Iobu 38:4-7) Aneru edia goada ese taunimanima edia goada ia hereaia. (Heberu 2:6, 7) Edia diba bona siahu be bada, bona Dirava ese idia ia karaia ena ura idia hagugurua totona. Salamo torea tauna ia gwau: “Lohiabada ena aneru ibounai e, umui be mai emui goada badana. Umui ese Lohiabada ena hereva umui badinaia noho, bona emui taiana umui kehoa noho Lohiabada ena hereva dekenai. Lohiabada ena ladana do umui hanamoa bada.”​—⁠Salamo 103:20.

Baibel ese ia hahedinaraia, aneru haida be Dirava ese ia abia dae lasi dalanai taunimanima idia hereva henia. Aneru ginigunana ese Heva ia koia, bena Heva bona Adamu be edia Havaraia Tauna amo ia hakaudia siri. Unai bamona ia karaia neganai, ia sibona be Satani Diabolo ai ia halaoa, ia ese Dirava ena ladana ia hadikaia bona ia gwau-edeede henia.​—⁠Genese 3:1-6.

Gabeai, aneru ma haida be guba ai “edia gabu maorona idia rakatania,” taunimanima ai idia lao bona kekeni hairaidia idia adavaia. (Iuda 6; Genese 6:1, 2) Unai gwau-edeede anerudia bona edia natudia badadia ese taunimanima idia hahisia bada, unai dainai “edia dika be gabu ibounai dekenai” ia lao. Noa ena negai Dirava ese Abata amo kara dika taudia ia hamasea ore sivaraina be reana Baibel amo oi duahia vadaeni.​—⁠Genese 6:3, 4, 11-13.

Abata ia vara neganai, unai aneru be edia tauanina idia haidaua bona guba dekenai idia giroa lou. Dirava ese idia ia koua dainai “edia gabu maorona” dekenai idia giroa lou lasi, to “dibura masemase gurina dekenai ia atodia.” (2 Petero 2:4, 5) Baibel ese unai gwau-edeede anerudia ia gwauraia “demoni.” (Iamesi 2:19) Idia ese babalau bona meamea karadia idia durua.

Demoni be Dahaka Idia Ura?

Lauma dikadia idia ura taunimanima edia lalona idia veria, bena Dirava momokanina, Iehova, do idia tomadiho henia lasi. Meamea taudia ese idia abia siahuna amo taunimanima idia koua Dirava idia dibaia bona tura henia lasi totona.

Demoni edia ura gauna ma ta be, edia biaguna Satani ese Iesu ia tohoa karana amo ita dibaia. Satani ese Iesu dekenai “tanobada ena basileia ibounai bona edia hairai ia hahedinaraia.” Satani be dahaka ia ura? Iesu dekenai ia gwau: “Oi tui diho bona nega tamona sibona lau oi tomadiho henia.” Oibe, Satani bona demoni idia ura taunimanima ese idia tomadiho henidia. To, Iesu ese unai hahetoho ia dadaraia bona Dirava bona tomadiho momokani ia badinaia.​—⁠Mataio 4:8-10.

Hari, lauma dikadia be taunimanima dekenai unai bamona idia karaia lasi. To idia ese kristal bolo, ti rauna, tarot kasi, bona hisiu stadilaia babalau karadia amo taunimanima edia lalona idia veria. Namo lasi unai bamona karadia ese umui idia koia! Unai gaudia amo lauma taudia ita hereva henia diba lasi. Lauma dikadia be babalau bona meamea taudia idia gaukaralaia taunimanima idia tarapua bona Iehova do idia tomadiho henia lasi. Bema lauma dikadia edia ura ia guguru lasi, idia ese unai babalau bona meamea idia karaia taudia idia hagaria bona hahisia bada. Bema oi dekenai unai ia vara, dahaka oi karaia unai gaudia oi rakatania totona?

Babalau Bona Meamea Dadaraia Dalana

Namona be inai oi diba, taunimanima idia hereva henia laumadia be Dirava ese ia inai henidia, bona do ia hadikadia ore. (Iuda 6) Taunimanima idia koia bona idia gwau idia be mase taudia edia lauma. Bema oi davaria emu turana ese oi ia koia badina ia ura lasi heduru oi abia, emu hemami be edena bamona? Bema oi davaria Intanet amo oi tura henia tauna be matabodaga karadia ia karaia, dahaka do oi karaia? Demoni ida gaukara hebou karana ese dika bada ia havaraia diba. Unai dainai, namona be oi hekwarahi lauma dikadia oi dadaraia totona. Edena dala ai?

Idaunegai Efeso taudia haida ese Baibel ena hereva babalau bona meamea karadia dekenai idia dibaia neganai, edia meamea bukadia ibounai idia haboua bona “taunimanima ibounai vairanai idia gabua,” ena be unai buka edia davana be bada. (Kara 19:19, 20) Hari, babalau bona meamea taudia ese buka, toni, Ouija bodi, Intanet bona unai bamona gaudia ma haida idia gaukaralaia. Unai bamona gaudia ibounai oi dadaraia be namo.

Joachim bona Barbara mani oi laloa. Edia tarot kasi amo idia diba taunimanima dikadia be edia ruma dekenai do idia mai, to namo lasi edia hereva idia kamonai o idia amo gau ta idia abia. Gabeai, Iehova ena Witnes hahine rua, Connie bona Gudrun be Joachim bona Barbara edia ruma dekenai idia lao bona idia gwau idia be Dirava ena sivarai namona idia herevalaia neganai, idia ese idia abia dae. Idia ese babalau bona meamea karadia idia herevalaia danu, bona Connie bona Gudrun ese Baibel amo unai idia hahedinaraia. Bena Baibel stadi idia hamatamaia.

Daudau lasi murinai, Joachim bona Barbara ese demoni edia gaukara idauidau idia rakatania. Unai Witnes hahine rua ese idia hamaoroa, idia karaia karana dainai demoni do idia moale lasi. Momokani, demoni ese Joachim bona Barbara idia hahisia bada. Hanuaboi momo idia gari dainai, ruma ma ta dekenai idia lao bona unai ese idia ia durua. Unai hekwakwanai idia haheaukalaia neganai, Filipi 4:13 ese idia ia hagoadaia, ia gwau: “Lau dekenai siahu ia henia tauna amo goada lau abia gau ibounai lau karaia totona.” Iehova ese edia hekwarahi ia hanamoa, bona lauma dikadia ese idia hahisidia lou lasi. Hari, Joachim bona Barbara be mai moale ida Dirava momokanina, Iehova, idia tomadiho henia.

Iehova ena hahenamo idia ura abia taudia ibounai dekenai, Baibel ia gwau: “Dirava henunai umui noho, to Diabolo umui inai henia, bona ia be umui amo do ia heau siri. Dirava kahirakahira do umui lao bona ia be umui kahirakahira do ia mai.” (Iamesi 4:7, 8) Bema oi ura demoni oi dadaraia, Iehova be oi ia durua diba. Joachim bona Barbara be babalau bona meamea karadia idia rakatania dalana idia laloa lou neganai, mai edia kudouna ibounai ida Salamo 121:2 ena hereva idia abia dae, ia gwau: “Lohiabada be egu durua Tauna.”

[Footnotes]

[Blurb on page 19]

Babalau bona meamea karadia ese taunimanima idia koua Dirava idia tura henia lasi totona

[Blurb on page 20]

“Dirava kahirakahira do umui lao bona ia be umui kahirakahira do ia mai.”​—⁠IAMESI 4:8