Duahia Taudia Idia Henanadai . . .

Tanobada Do Ia Ore, A?

▪ Haida idia laloa October 21, 2011 ai, tanobada do ia ore. To ia vara lasi. Unai ese U.S. ena reidio ai hereva halasia tauna, Harold Camping ena hereva ia hakoikoia, badina ia gwau May 21, 2011 ai Kota Badana Dinana do ia ginidae​—⁠tanobada ibounai dekenai tano mareremarere do ia vara bona hua faiv murinai, October 21 ai tanobada do ia ore vaitani.

To, tanobada do ia ore lasi. Bona Havaraia Tauna ia ura lasi unai ia vara. Baibel ia gwau: “Oi ese tanobada oi karaia, bona ia gini goada noho.”​—⁠Salamo 119:90.

To, Baibel idia duahia taudia haida idia laloa, inai tanobada be lahi ese do ia hadikaia ore. Idia ese 2 Petero 3:7, 10 amo unai lalohadai idia hamomokania. Ia gwau: “Unai hereva tamona amo hari idia noho guba bona tanobada be lahi ese ia araia totona idia naria noho, oibe, do idia noho ela bona hahemaoro negana, unai negai Dirava idia badinaia lasi taudia be do idia ore momokani. . . . Iehova ena dina be henaohenao tauna bamona do ia mai, unai nega ai guba be mai rege bada ida do ia ore haraga, to guba bona tanobada gaudia be do idia siahu momokani bona do idia veve, bona tanobada bona ia lalonai idia noho gaudia be lahi ese do ia araia ore.” Aposetolo Petero be tanobada bona guba korikoridia ia herevalaia, a?

Lasi. Unai siri edia anina lalopararalaia totona, Petero ese ena revareva lalonai ia gwauraia gaudia be Baibel ena hereva ma haida ida oi hahegeregerea be namo. Bema Petero ese tanobada bona guba korikoridia ia herevalaia, anina be iunives ibounai​—⁠hisiu bilioni momo bona gau ma haida​—⁠be lahi ese do ia araia ore, badina kara dika taudia idia noho. Oi laloa ta ese pitopito hamasea totona ena ruma ibounai do ia gabua, a? Lasi. Unai hegeregerena, ta ena gwau-edeede karana dainai Iehova ese iunives ibounai do ia haorea lasi.

Danu, unai lalohadai be Iesu Keriso ena hereva hegeregerena lasi. Iesu ia gwau: “Manau taudia be idia moale, badina idia ese tanobada do idia abia.” (Mataio 5:5; Salamo 37:29) Lalokau tamana ta be ena famili totona ruma namona ta ia haginia murinai, do ia gabua, a? Lasi. (Salamo 115:16) Iehova be Havaraia Tauna sibona lasi, to lalokau Tamana danu.​—⁠Salamo 103:13; 1 Ioane 4:8.

Petero ese ia herevalaia “tanobada” be kara dika taudia ia laulaulaia. Laloatao, Petero be Noa ena negai ia vara Abata ia herevalaia danu. (2 Petero 3:5, 6) Unai negai, kara dika taudia sibona idia ore, to tanobada ia ore lasi, bona kara maoromaoro tauna Noa bona ena famili be idia roho mauri. Unai hegeregerena, Petero ese ia herevalaia “guba” be Dirava badinaia lasi lohia taudia ia laulaulaia. Unai dainai, helalo-kerehai lasi kara dika taudia bona gavamani dikadia be do idia ore, bona Dirava ena Basileia ese tanobada do ia lohiaia.​—⁠Daniela 2:44.

Vadaeni, tanobada do ia ore, a? Lasi. To kara dika taudia sibona do idia ore. Tanobada bona Dirava idia badinaia taudia be do idia noho ela bona hanaihanai.​—⁠Aonega Herevadia 2:21, 22.