Hahine Idia Davaria Hekwakwanai

ZAHRA ena hereva ese ia hahedinaraia, hari tanobada hegegemadai momo ese hahine bona kekeni idia laloa bada lasi bona dagedage henidia. Idia vara gaudia mani oi laloa.

• Hahine idia ura henia lasi. Asia ai, tama sina momo be natuna memero idia ura henia to kekeni idia ura henia lasi. United Nations ena 2011 ripoti ese ia hahedinaraia, Asia ena popiuleisen lalonai hahine 134 milioni bamona be lasi, badina sina ese bogana lalonai natuna ia hamasea o idia havaraia bena idia hamasea, o idia naridia lasi.

• Edukeisen. Tanobada hegegemadai, hahine bona kekeni 60 pesen bamona be idia sikuli namonamo lasi o reana lagani foa sibona idia sikuli.

• Tau ese hahine ia fosia idia mahuta hebou totona. Hahine 2.6 bilioni mai kahana idia noho tanodia ai, tatau ese edia adavana idia fosia idia mahuta hebou totona, bona unai kara idia taravatua lasi.

• Helt. Ogogami tanodia ai, medikol heduru be lasi dainai, rogorogo hahine be miniti rua rua lalonai ia mase o beibi ia havaraia lalonai ia mase.

• Tano o ruma biagua ena maoro (o rights). Ena be tano momo ai hahine ese aniani hadoa gaukarana idia karaia, to maoro idia henia lasi tano o ruma idia biagua totona.

Dahaka dainai hahine dekenai unai maoro idia henidia lasi? Tano haida ai taunimanima be tomadiho o kastom karadia idia badinaia dainai, idia laloa hahine hahisia o dagedage henia karana be maoro. French niuspepa ta ese India loea ta, Chandra Rami Chopra, ena hereva ia halasia, ia gwau: “Tomadiho momo ese idia abia dae lalohadai badana be, hahine be anina lasi.”

Unai lalohadai oi abia dae danu, a? Oi laloa Baibel be tomadiho buka haida bamona, hahine laloa bada lasi karana ia herevalaia, a? Haida idia laloa Baibel ena siri haida be unai ia hamomokania. To Baibel ia havaraia Diravana ese hahine be edena bamona ia lalodia? Ena be momo edia lalohadai be idauidau, to bema Baibel ita stadilaia namonamo haere maorodia ita davaria diba.