Inai be Iseda Keristani Ahuna

1. Iehova be ita ia durua totona dahaka ia henia?

IEHOVA be noho hanaihanai Diravana, bona mauri hanaihanai abia dalana be ita dekenai ia hadibaia. Idaunega amo ema bona hari, Iena hahediba herevadia be idia idau lasi. Baibel ia gwau: “Iehova ena hereva ia noho ela bona hanaihanai.” (1 Pet. 1:23-25) Namona be ita moale, badina Iehova ese Baibel bona ena hereva badadia be ita dekenai ia henia.

2. Dirava ia ura ita be dahaka do ita dibaia?

² bDirava ia ura ita ibounai ese iena ladana do ita dibaia. Baibel ese Dirava be guba bona tanobada ia karaia ena sivarai ia herevalaia neganai, unai be nega ginigunana Iehova ena ladana ia gaukaralaia. (Gen. 2:4, 5, BHḡ) Dirava ese Mose dekenai Taravatu Ten ia henia neganai, hoa dalanai ena ladana be nadi palakadia rua ai ia torea. Hegeregere, taravatu ginigunana be inai hereva amo ia matamaia: “Lau be inai Iehova, emu Dirava.” (Eso. 20:1-17, BHḡ) Ena be Diabolo ia ura Baibel ia hadikaia ore, unai amo ita be Dirava bona Iena ladana do ita dibaia lasi, to Iehova ese unai ia koua.​—⁠Sal. 73:28.

3. Dirava ia ura ita ese Baibel amo dahaka ita dibaia?

³ bBaibel lalonai, Iehova ese hereva momokani ia gimaia. Ena be tanobada hegegemadai tomadiho koikoi edia hahediba herevadia be momo, to Dirava ita tanikiu henia badina ia ese ita dekenai hereva momokani bona ena diari ia henia! (Salamo 43:3, 4 duahia.) Oibe, ena be momo be dibura lalonai idia raka, to ita be hereva momokani ena diari lalonai ita noho.​—⁠1 Ioa. 1:6, 7.

ITA BE MAI EDA AHUNA NAMONA

4, 5. Lagani 1931 ai edena hahenamo ita abia?

⁴ bVaia, hanua taudia be lagani momo lalodiai edia kara, kastom bona mauri dalana be edia natudia bona tubudia dekenai idia hadibaia. Ita gwau diba unai be edia ahuna. Ita Iehova ena Witnes taudia danu be mai eda ahuna. Hegeregere, Iehova ese ita ia durua Baibel, iena sivarai bona iena ura ita lalopararalaidia totona. Danu, ia ese ita ia abia hidi iena ladana ai do ita raka.

⁵ bIta ese unai ladana be lagani 1931 ai Columbus, Ohio, U.S.A., ena hebouhebou ta ai ita abia. Inai leta rua “JW” be hebouhebou ena program ai idia printaia. Taihu ta ia gwau: “Momo be unai leta rua dekenai idia daradara.” Guna, iseda orea taudia idia gwauraia Bible Student taudia. To Sunday July 26, 1931 ai gwaubou ta idia karaia, bona inai ladana Iehova ena Witnes taudia (English gado ai be Jehovah’s Witnesses) idia abia dae. Unai be moale bada negana, badina iseda ladana matamatana be Baibel amo ita abia. (Isaia 43:12 duahia.) Tadikaka ta ia gwau: “Lau be tadikaka idia boiboi badabada bona edia imana idia patapataia karana do lau laloaboio lasi.” Tanobada hegegemadai tomadiho oreana ta ia ura lasi Dirava ena ladana ia abia. To, ita moale badina lagani 80 mai kahana lalonai ita be inai ladana, Iehova ena Witnes taudia ita gaukaralaia.

6. Iseda ahuna ena kahana ma ta be dahaka?

⁶ bIseda ahuna ena kahana ma ta be, Baibel lalonai guna idia vara sivarai korikoridia idia noho. Hegeregere, Aberahamo, Isako bona Iakobo dekenai idia vara gaudia edia sivarai idia noho. Reana idia be nega momo edia famili ida, Iehova ia ura henia mauri dalana idia herevalaia. Unai bamona herevahereva karana ese reana Iosepa ia durua, Potifara ena adavana ida ia heudahanai lasi totona. (Gen. 39:7-9) Aposetolo edia negai danu, Keristani taudia ese Dirava ena hereva be ta ta dekenai idia herevalaia. Hegeregere, Paulo be Iesu ese ia hadibaia hegeregerena, kongrigeisen ta ta dekenai Lohiabada ena Anibou karaia dalana ia hadibaia. (1 Kor. 11:2, 23) Baibel lalonai unai sivarai idia noho, bona ita idia durua dala maorona ai Dirava ita tomadiho henia totona. (Ioane 4:23, 24 duahia.) Oibe, ita Iehova ena hesiai taudia be Baibel ita laloa bada, badina Baibel ese taunimanima ibounai ia durua diba.

7. Edena gwauhamata be iseda ahuna ena kahana ta?

⁷ bIseda negai, Iehova ese ena taunimanima ia durua danu. (Sal. 118:7) Ita ia gimaia daladia be iseda buka bona magasin ai ita duahia diba. Unai dainai herevana dagedage ita davaria, to ita gari lasi. Dirava ena gwauhamata be inai: “‘Oi hadikaia totona idia karaia tuari gauna ta ese anina do ia havaraia diba lasi. Bona oi idia samania gwauraia taudia, be oi ese idia edia hereva ibounai do oi koua diba. Inai be Iehova ena hesiai taudia edia ahuna, bona kwalimu be idia dekenai do lau henia.’ Iehova be unai bamona ia hereva.” (Isa. 54:17, BHḡ.) Momokani, Satani ese ita do ia hahisia hanaihanai lasi.

8. Inai stadi bona wiki vaira ena stadi ai, edena point toi do ita stadilaia?

⁸ bSatani ia ura Baibel ia hadikaia, Baibel amo Iehova ena ladana ia kokia, bona hereva momokani ia hunia, to ia kwalimu lasi. Inai stadi bona wiki vaira ena stadi ai, ita be Dirava ese (1) Baibel, (2) ena ladana, bona (3) hereva momokani ia gimaia dalana do ita stadilaia.

IEHOVA ESE BAIBEL BONA ENA HEREVA BADADIA IA GIMAIA

9-11. Edena dala ai Iehova ese Baibel ia gimaia?

⁹ bDala momo ai taunimanima ese Baibel idia hadikaia toho, to Iehova ese ia gimaia. Katolik tomadiho ese taunimanima ia koua Baibel idia duahia lasi totona. Lagani 1229 ai, France dekenai dubu ena kaunsolo taudia ese taravatu ta idia atoa, bona idia gwau taunimanima ese edia gado korikori ai Baibel idia duahia be kerere. Lagani 1234 ai, Spain dekenai unai bamona taravatu ta idia atoa danu. Gabeai, lagani 1559 ai Pope Paul Namba 4 ia gwau, bema ta be dubu amo gwaumaoro ia abia lasi, ia ese Baibel do ia printaia bona duahia be kerere.

¹⁰ bEna be taunimanima idia ura Baibel do idia hadikaia ore, to Iehova ese ia gimaia. Lagani 1382 ai, John Wycliffe ese English gado Baibel ginigunana ia hahanaia. Gabeai, William Tyndale danu be English gado Baibel ta ia hahanaia, bona unai dainai lagani 1536 ai idia hamasea. Au ta dekenai idia tauadae neganai, ia boiboi ia gwau: “Lohiabada e, England ena king ena matana oi kehoa.” Bena ena aiona idia gigia, bona ena tauanina idia gabua.

¹¹ bLagani 1535 ai, Miles Coverdale ese Baibel be English gado ai ia hahanaia danu. Coverdale ese ena hahanaia gaukara lalonai, Tyndale ena Baibel amo hereva haida ia abia, bona kahana ma haida be Latin gado Baibel bona Martin Luther ena German gado Baibel amo ia hahanaia. Iseda nega ai, New World Translation of the Holy Scriptures (Nega Matamata Baibel) ita gaukaralaia. Ita moale badina unai Baibel be idia hahanaia namonamo, ena hereva idia hedinarai goevagoeva, idia maoro, bona haroro gaukara ai ita gaukaralaia be auka lasi. Oibe, Satani eiava taunimanima be hegeregere lasi Baibel idia hadikaia totona.

IEHOVA ESE ENA LADANA IA GIMAIA

12. Edena dala ai Nega Matamata Baibel ese Dirava ena ladana be taunimanima dekenai ia hahedinaraia?

¹² bIehova Dirava be ena ladana ia gimaia dainai, Baibel iboudiai amo idia kokia lasi. Nega Matamata Baibel idia hahanaia neganai, tadikaka idia ura Dirava ena ladana, Iehova be Baibel toretore ginigunadia ai idia torea gabudia ibounai dekenai idia atoa lou. Heberu Toretoredia lalonai Dirava ena ladana be nega 6,973 bona Keristani Grik Toretoredia ai nega 237 ia hedinarai. Hari, Nega Matamata Baibel be gado 116 mai kahana ai idia hahanaia, bona kopi 178,545,862 mai kahana idia printaia vadaeni.

13. Edena bamona ita diba matamana negana amo, taunimanima be Dirava ena ladana idia diba?

¹³ bMatamanai, Adamu bona Heva be Dirava ena ladana idia diba bona idia gaukaralaia. Noa danu be unai ladana ia gaukaralaia, ia gwau: “Iehova, Sema ena Dirava, ita hanamoa.” (Gen. 4:1; 9:26, BHḡ) Guna, Dirava ese taunimanima ia hereva henia neganai, ena ladana ia gwauraia. Ia gwau: “Lau be Iehova, egu ladana be unai. Egu hairaina be dirava ta dekenai do lau henia lasi.” Ma ia gwau: “Lau be Iehova, dirava idauna ta ia noho lasi. Dirava ta be lasi, lau sibona.” (Isa. 42:8; 45:5, BHḡ) Iehova ese ena ladana ia gimaia, unai amo taunimanima ibounai ese iena ladana idia dibaia diba. Namona be ita moale badina ita be Iehova ena ladana ita gaukaralaia, bona ita be iena Witnes taudia! Baibel ese unai ia herevalaia, ia gwau: “Dirava ena ladana dainai, aiemai pepe do ai abia isi.”​—⁠Sal. 20:5.

14. Dirava ena ladana be edeseniai ia hedinarai danu?

¹⁴ bDirava ena ladana be Baibel lalonai sibona ia hedinarai lasi, to gabu haida ai ia hedinarai danu. Hegeregere, Moaba Nadina ai ia hedinarai. Unai nadi be Dead Sea ena ist kahana ai ia noho siti ladana Dhiban (Dibon) ai idia davaria. Unai siti ena daudau Dead Sea amo be kilomita 21. Unai nadi ai Israela ena King Omeri ena sivarai, bona Moaba ena King Mesa ese Israela ia tuari henia ena sivarai ia noho danu. (1 Kin. 16:28; 2 Kin. 1:1; 3:4, 5) Moaba Nadina ai Dirava ena ladana be Heberu leta foa YHWH ai idia torea. Unai leta foa be Lakisi Revarevadia ai idia torea danu. Unai revareva be Israela ai idia davaria uro haida ai idia hedinarai.

15. Septuagint Baibel be dahaka, bona dahaka dainai idia torea?

¹⁵ bLagani 2000 mai kahana gunanai, Heberu Toretoredia be Grik gado ai idia hahanaia bona Septuagint Baibel idia halasia. Dahaka dainai Grik gado ai idia hahanaia? Iuda taudia be lagani 70 lalonai Babulonia ai igui hesiai taudia bamona idia noho. To, lagani 537 B.C.E. ai idia ruhadia neganai, haida be Babulonia ai idia noho. Gabeai, Iuda taudia momo be Aigupito ena siti Alesandria dekenai idia lao. Unuseniai, taunimanima be Grik gado idia gaukaralaia. Unai dainai, Iuda taudia idia laloa Heberu Toretoredia be Grik gado ai idia hahanaia be namo. Grik Septuagint Baibel edia kopi haida lalonai, Dirava ena ladana be Heberu gado ai idia torea.

16. Bay Psalm Book lalonai Dirava ena ladana be edena bamona idia torea?

¹⁶ bEngland ese ia biagua America tanodia ai idia halasia buka ginigunana be Salamo Bukana, bona unai buka lalonai Dirava ena ladana ia noho. Ia be Heberu gado amo idia hahanaia English gado dekenai, bona ena ladana be Bay Psalm Book. Ena kopi ginigunana be lagani 1640 ai idia printaia. Unai buka lalonai Salamo 1:1, 2 ai, Dirava ena ladana be inai bamona idia torea, “Iehovah.” Ia gwau, “hahenamo ia abia tauna” be dika taudia edia sisiba ia abia dae lasi, “to Iehovah ena taravatu, ia moalelaia.” Dirava ena ladana dekenai diba ma haida oi abia totona, buklet ladana The Divine Name That Will Endure Forever oi itaia diba.

IEHOVA ESE HEREVA MOMOKANI IA GIMAIA

17, 18. (a) Hereva momokani be dahaka? (b) “Sivarai namona ena hereva momokani” ena hahediba herevadia haida be dahaka?

¹⁷ bIta be mai moale ida “Iehova, hereva momokani ena Dirava” ita hesiai henia. (Sal. 31:5, NW) Hereva momokani be dahaka? Ia be gau ta idia hamomokania herevadia. Baibel be Heberu gado ai idia torea neganai, inai hereva “hereva momokani” idia hahanaia totona idia gaukaralaia herevadia ese idia hahedinaraia, gau ta be ia momokani, ia maoro bona ita abidadama henia diba.

¹⁸ bIehova be hereva momokani ia gimaia dainai, ita ese ita dibaia. Bona ita ia durua noho eda diba hereva momokani dekenai ita habadaia totona. (2 Ioa. 1, 2) Aonega Herevadia 4:18 ia gwau: “Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.” Danu, Iesu be Dirava ia guriguri henia, ia gwau: “Oiemu hereva be momokani.” (Ioa. 17:17) Baibel lalonai “sivarai namona ena hereva momokani” ia noho. Unai be Keristani taudia ese idia abia dae hahediba herevadia ibounai. (Gal. 2:14) Unai hahediba herevadia haida be dahaka? Idia haida be Iehova ena ladana, ena lohia dalana, Iesu ena mauri davalaia boubouna, toreisi lou bona Basileia. Hari, do ita itaia edena dala ai Dirava ese hereva momokani ia gimaia, unai amo Satani ese ia mogea diba lasi.

IEHOVA ESE HEREVA MOMOKANI HUNIA KARANA IA KOUA

19, 20. Nimiroda be daika, bona ena lohia negana ai, taunimanima be dahaka idia karaia?

¹⁹ bAbata murinai, labana tauna goadana ta ladana Nimiroda be Iehova ia inai henia. (Gen. 10:9) Nimiroda be Iehova Dirava ia inai henia dainai, ia be Satani ena hesiai tauna, bona gabeai iena kara be Dirava ena Natuna idia inai henia taudia ese idia hahedinaraia danu. Iesu be idia dekenai ia gwau: “Umui be emui tamana, Diabolo amo, bona umui ura emui tamana ena ura umui karaia. Matamana amo ia be . . . hereva momokani ia badinaia lasi.”​—⁠Ioa. 8:44.

²⁰ bNimiroda be Babela bona Euperate bona Taigarisi sinavaidia huanai idia noho siti haida ia lohiaia danu. (Gen. 10:10) Reana ia ese lagani 2269 B.C.E ai, Babela ena kohoro badana ia haginia. Iehova ia ura lasi taunimanima be gabu tamona dekenai idia noho, to Babela idia haginia taudia idia gwau: “Hanua badana ta ita karaia be namo, iena kohoro be guba dekenai do ia kamokau. Unai dekena amo iseda ladana do ia bada, tanobada kahana kahana ibounai dekenai do ita loaloa kava noho garina.” To unai kohoro idia haorea lasi, badina Dirava ese “edia gado ia haidaua.” Unai dainai, taunimanima be Babela idia rakatania. (Gen. 11:1-4, 8, 9) Satani ia ura unai negai tomadiho momokani ia haorea, unai amo taunimanima ibounai ese ia do idia tomadiho henia. To, Iehova ese tomadiho momokani ia gimaia, bona hari momo be ia idia tomadiho henia noho.

21, 22. (a) Dahaka dainai idaunega amo ema bona hari, hereva momokani be gau ta ese ia hadikaia lasi? (b) Wiki vaira ena stadi ai dahaka do ita herevalaia?

²¹ bIdaunega amo ema bona hari, tomadiho koikoi ese tomadiho momokanina ia hadikaia diba lasi. Dahaka dainai? Badina iseda Hadibaia Tauna Badana, Iehova ese Baibel, ena ladana, bona hereva momokani ia gimaia. (Isa. 30:20, 21) Dirava ena ura dalanai ia ita tomadiho henia neganai, moale korikori do ita davaria. To, namona be hereva momokani sibona ita abia dae, bona lauma helaga ena hakaua dalana ita badinaia.

²² bWiki vaira ena stadi ai, dubu haida ese hahediba hereva koikoidia idia hadibaia matamaia karana do ita herevalaia. Do ita itaia unai hahediba herevadia be Baibel lalonai idia noho lasi. Bona do ita itaia Iehova ese ita ia hanamoa, badina ia ita dibaia totona ia ese hereva momokani be ita dekenai ia hadibaia. Unai gaudia ibounai be iseda Keristani ahuna.