Lou-Henia Karaia Namonamo amo Taunimanima Hagoadadia Noho
1 Kamonai taudia durudia noho totona, taunimanima ita lou henidia loulou lauma aniani idia dekenai ita henia hanaihanai totona be gau badana. Ita lou henidia loulou neganai ita durudia diba lauma dalanai idia goada idia lao totona. (1 Kor. 3:6-9) To, iseda lou-henia gaukara do ia namo totona, gau badana be ita durua tauna ita laloa namonamo, bona dala ita hegaegaelaia ita durua totona.
2 Guna Pepapepa Ta Ita Henidia Taudia Ita Lou Henidia: Reana nega ginigunana ruma tauna ita hereva henia neganai Mauri mai Mainona Tanobada Matamatana Lalonai pepapepana ita henia.
Guna ita kikilaia herevana ita riviulaia murinai, reana inai bamona ita henanadai diba:
◼ “Edena gavamani ese unai kara do ia havaraia diba? [Naria do ia haere totona.] Reana oi danu be inai bamona gabu namona dekenai oi ura noho. Edena bamona unai gabu namona dekenai do ita noho diba?” Murinai, sinado maragina “Inai Dala amo Do Oi Abia Diba” henunai ia noho sivaraina oi kikilaia diba. Bema ia ura kamonai noho, namona be Mauri Hanaihanai bukana ita kehoa karoa 15 ai, ena ladana be “Dirava ena Gavamani Henunai Oi Noho Totona.” Namona be paragraf ginigunadia rua do ita kikilaidia, bena murinai inai henanadai do ita gwauraia: “Dirava dekenai diba ita abia dainai, dahaka ita karaia be namo?” Unai henanadai haerelaia totona bona unai karoa ena hereva ma haida do umui kikilaia totona, lou-henia ena nega do umui hegaegaelaia.
3 “Dirava ese Ita Ia Laloa Eiava?” buklet ita henidia taudia ita lou henidia neganai, reana inai bamona ita hereva diba:
◼ “Guna lau mai neganai, taunimanima ese idia davaria hekwakwanai be momo bona Dirava ese dahaka do ia karaia ia gwauhamatalaia sivaraidia ita kikilaia. To, dahaka dainai Dirava ese hisihisi ia do koua lasi? Haere ita davaria diba ita itaia buklet ena kahana 6 dekenai.” Bema ia hegeregere, ruma tauna oi hamaoroa iena buklet do ia abia totona. Paragraf haida umui kikilaia murinai, reana inai bamona ita hereva diba: “Dirava ena gwauhamata hereva amo namo ita davaria totona, dahaka do ita karaia be namo?” Kahana 11, “Tanobada Matamatana Ena Badina be Hari Ia Karaia Noho,” rau 28-31 ai, ia noho sivaraina oi herevalaia sisina, bona do oi lou henia neganai unai hereva do oi habadaia.
4 Guna Magasin Ita Henidia Taudia Ita Lou Henidia: Bema guna magasin dekena amo ruma tauna ia ura henia sivaraina ta umui kikilaia, oi lou henia neganai, namona be unai sivarai amo hereva ma haida umui kikilaia; namona be ia gwauraia Baibel siri tamona ena anina unai hereva dekenai umui kikilaia. Bema ia ura kamonai noho, namona be magasin edia namo idauidau oi hahedinaraia. Danu, bema gabeai do ia mai magasin ma ta dekenai unai sivarai dekenai hereva ma haida do ia herevalaia, unai do oi hahedinaraia. Eiava, ena lalona oi veria unai sivarai be Mauri Hanaihanai buka eiava Memero Kekeni Edia Henanadai buka dekenai do ia itaia totona, bena unai sivarai do umui kikilaia totona lou-henia ena nega do umui hegaegaelaia.
5 Taunimanima dekenai lou-henia namodia ita karaia neganai, unai ese ia hahedinaraia taunimanima bona Iehova ita lalokau henidia. (Ioane 13:34, 35) Namona be lou-henia namodia ena gaukara ita karaia noho, bona unai amo iseda teritori lalonai taunimanima edia lalona ita veria noho lauma dalanai do idia goada idia lao totona.
[Questions]
1. (a) Kamonai taudia be edena bamona do ita durudia diba? (b) Lou-henia ta ita do karaia lasi neganai, dahaka ita karaia be namo?
2. Mauri mai Mainona Tanobada Matamatana Lalonai pepapepana ia abia tauna ita lou henia neganai dahaka ita hereva diba?
4. Guna, bema ruma tauna dekenai magasin ena sivarai ta umui kikilaia, do oi lou henia neganai, edena bamona unai sivarai oi habadaia diba?
5. Iseda teritori lalonai, lou-henia namodia ita karaia neganai, unai ese dahaka ia hahedinaraia?