Elda Taudia E, “Manoka Taudia” Umui Hagoadaia Diba, A?

Angelaa be singul taihu ta bona ena mauri lagani be 30 bamona. Elda taudia be ia do idia vadivadi henia, unai dainai ia gari sisina. Ia laloa, ‘Elda taudia be lau dekenai dahaka do idia herevalaia? Lau diba lau be hebou haida lau reaia, badina egu gaukara gabuna amo ruma dekenai lau giroa neganai, lau hesiku bada.’ To, Angela be ia lalohekwarahi danu badina ena sinana be ia gorere.

Bema oi be elda ta bona Angela do oi vadivadi henia, edena bamona unai “manoka” taihu do oi hagoadaia? (Ier. 31:25) To, oi do vadivadi henia lasi neganai, edena bamona oi hegaegae be namo unai amo ia oi hagoadaia diba?

TADIKAKA TAIHU EDIA HEKWAKWANAI OI LALOA

Nega haida ita be moni gaukara ita karaia o tiokratik maduna idauidau ita huaia dainai ita hesiku. Hegeregere, peroveta tauna Daniela be ia abia matahanai ta ena anina ia lalopararalaia lasi neganai, ia “hesiku.” (Dan. 8:27, NW) Daniela be edena bamona heduru ia abia? Dirava ese aneru ladana, Gabriela ia siaia Daniela dekenai matahanai ena anina ia hahedinaraia, bona ia hamaoroa Iehova be iena guriguri ia kamonai. Danu, aneru ese Daniela ia hamaoroa ia be Iehova ese “ia lalokau henia bada.” (Dan. 9:21-23) Gabeai, aneru ma ta ia hedinarai bona unai bamona hereva namodia amo Daniela ia hagoadaia.—Dan. 10:19.

Unai hegeregerena, ia hesiku o lalometau tadikaka ta oi do vadivadi henia lasi neganai, namona be inai gaudia oi laloa guna: Ia be dahaka hekwakwanai ia davaria? Edena dala ai unai hekwakwanai dainai, ia lalomanoka? Iena kara namodia haida be dahaka? Richard, lagani 20 mai kahana lalonai elda maduna ia huaia tadikaka, ia gwau: “Tadikaka ta lau do vadivadi henia lasi neganai, iena kara namodia lau laloa guna. Unai amo ia lau durua namonamo diba.” Bema elda ma ta ese oi do ia bamoa, namona be ia ida tadikaka ena hekwakwanai umui herevalaia guna.

OI HAHEDINARAIA OI URA IA OI DURUA

Nega haida tadikaka be reana ia hemarai dainai, ena hemami ia gwauraia hedinarai lasi. Edena dala ai oi durua diba ia hemarai lasi totona? Dala namona ta be umui herevahereva matamaia neganai, kiri toana oi hahedinaraia bona hanamoa hereva oi gwauraia. Michael, lagani 40 lalonai elda maduna ia huaia tadikaka, be mamoe vadivadi ena matamanai, ia gwau: “Elda gaukara ena hahenamo ta be ai ese tadikaka taihu be edia ruma dekenai ai vadivadi henia, unai amo idia ai diba namonamo. Lau moale badina hari dina oi ai vadivadi henia diba.”

Emui vadivadi be guriguri amo umui kehoa be namo. Aposetolo Paulo ena guriguri lalonai ena tadikaka edia abidadama, lalokau bona haheauka karadia ia gwauraia. (1 Tes. 1:2, 3) Bema guriguri lalonai tadikaka ena kara namodia oi gwauraia hedinarai, unai ese emui herevahereva karana do ia hanamoa. Danu, emu guriguri ese tadikaka ena lalona do ia hagoadaia. Lo elda ta ladana, Ray ia gwau: “Nega haida ita ese ita karaia kara namodia ita laloaboio, to bema ta ese unai kara namodia ia herevalaia lou, unai ese ita ia hamoalea.”

BAIBEL AMO OI HAGOADAIA

Paulo bamona, emu tadikaka dekenai Baibel siri ta oi duahia neganai, unai be hegeregere “Dirava amo ia mai harihari gauna” ta oi henia. (Roma 1:11) Hegeregere, lalometau tadikaka ta ia laloa ia be anina lasi. Reana ia ida Salamo torea tauna ena sivarai umui duahia diba. Ia danu ia laloa ia be “uaina udaia nanigosi kopina, ia makohia dainai idia negea ore gauna bamona.” Ena be Salamo torea tauna be unai bamona ia mamia, to ia gwau: “Lau ese oiemu taravatu lau laloaboio lasi.” (Sal. 119:83, 176) Tadikaka ida unai siri ena anina umui herevalaia murinai, reana oi hahedinaraia oi diba ia danu be Dirava ena taravatu ia “laloaboio lasi.”

Ia hebou lasi bona haroro lasi taihu ta be edena dala ai Baibel amo oi hagoadaia diba? Reana drekma koini ena haheitalai ese ia durua diba. (Luka 15:8-10) Reana unai koini be siliva koini amo idia karaia ageva ena kahana ta. Taihu ida unai haheitalai umui herevalaia murinai, ia oi durua bena do ia laloparara kongrigeisen ai ia danu be mai anina bada. Unai murinai, taihu oi hamaoroa Iehova ese ia ia laloa bada, badina ia be Iena mamoe maragina ta.

Tadikaka taihu be Baibel dekenai edia lalohadai herevalaia karana idia moalelaia. Unai dainai namo lasi oi sibona oi hereva. Siri ta oi duahia murinai, hereva ta o hereva badadia haida oi abia hidi, bona tadikaka oi nanadaia ena lalohadai ia gwauraia totona. Hegeregere, 2 Korinto 4:16 umui duahia murinai, oi nanadaia: “Edena dala haida ai Iehova ese oi dekenai goada matamata ia henia?” Unai bamona oi karaia neganai, ta ta do umui “hagoadaia heheni.”—Roma 1:12.

Tadikaka oi hagoadaia diba dalana ma ta be, ia ida Baibel sivarai ta oi herevalaia. Ia lalometau tadikaka ena hemami be reana Hana bona Epafrodito edia bamona. Idia danu idia lalometau, to Dirava ese idia ia laloa bada. (1 Sam. 1:9-11, 20; Fili. 2:25-30) Baibel ai idia noho haheitalai namodia momo oi gaukaralaia diba.

OI HAHEDINARAIA IA OI LALOA NOHO

Namona be oi vadivadi henia tadikaka o taihu oi sekea loulou, unai amo oi hahedinaraia ia oi laloa bada. (Kara 15:36) Vadivadi ena dokonai, palani oi karaia umui haroro hebou totona. Lo elda ta ladana, Bernard be guna ia vadivadi henia tadikaka ta ia davaria lou neganai, hemataurai dalanai ia nanadaia, “Hari oi be edena bamona? Gau ibounai idia namo, a?” Unai bamona oi karaia neganai, do oi diba bema tadikaka ese heduru ma haida do ia abia eiava lasi.

Gau badana be inai: Namona be tadikaka taihu idia mamia oi be idia oi laloa bada, edia hemami oi lalopararalaia, bona oi lalokau henidia. (1 Tes. 5:11) Unai dainai, mamoe vadivadi gaukarana oi do karaia lasi neganai, namona be nega oi atoa tadikaka edia hekwakwanai oi laloa namonamo totona. Emu vadivadi totona oi guriguri. Siri maorodia oi abia hidi. Unai amo hereva maorodia do oi gaukaralaia “manoka taudia” oi durua totona!