Mamoe Naria Keristani Taudia ese Oi Idia Durua Dalana

TANO momo lalodiai mamoe naria taudia ese edia mamoe oreadia idia naria dalana be taunimanima ese idia itaia diba. Mamoe idia hakaudia, idia gimadia, bona idia durudia. Unai be mai anina Keristani elda taudia dekenai, badina be edia gaukara lalonai tadikaka idia vadivadi henidia, idia durudia totona. Momokani, edia maduna ta be ‘Dirava ena ekalesia do idia ubua’ bona ‘mamoe orea ibounai do idia naria namonamo.’​—⁠Kara 20:28.

Bema oi be Keristani kongregesen tauna ta, lauma dalanai mamoe naria taudia ese oi be edena bamona idia durua diba? Oi idia durua toho neganai, edena bamona oi kara be namo? Badina be dahaka kongregesen ese edia heduru ia abia be namo?

Dahaka amo Idia Gimadia?

Idaunegai, laiona bona uda boromadia ma haida ese mamoe oreadia idia hagaria bona mamoe ta ta idia anidia. Unai dainai mamoe naria taudia ese idia gimadia. (1 Samuela 17:34, 35) Vadaeni, Satani Diabolo be “laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:⁠8) Ia ese Iehova ena orea tanobada ai ia tuari henia mai ena badu ida bona Dirava ena hesiai taudia ta ta danu. Satani ena ura be dahaka? Ia ura Iehova ena orea taudia edia lalona do ia hamanokaia bona “Dirava ena taravatu idia badinaia momokani” dalana bona “Iesu ena hereva momokani idia gwauraia hedinarai” dalana do ia koua.​—⁠Apokalupo 12:17.

Iehova ese idaunegai Israelana ena gunalaia taudia ia samania, ia gwau iena mamoe idia naridia lasi dainai, idia be “uda sisia bona laiona edia aniani gauna idia lao vadaeni.” (Esekiela 34:⁠8) To, Keristani elda taudia idia ura bada kongregesen taudia idia gimaia, bena ta do ia boio lasi, idia naria lasi dainai, eiava Satani, o tanobada, o “uda sisia dikadia,” hereva momokani idia negea taudia unai, edia lalo-ani dainai. (Kara 20:29, 30) Mamoe naria taudia ese edia orea taudia iboudiai be edena bamona idia durua, do idia laloa namonamo bona do idia gima totona? Dala ta be Baibel herevadia, idia hegaegaelaia namonamo herevadia, be Kingdom Hall ena platfom amo idia harorolaia. Ma ta be hebou negadia vairanai bona murinai, hahegoada herevadia namodia be tadikaka ida idia herevaherevalaia. Anina namona ia havaraia dalana ma ta be “mamoe” be edia ruma dekenai idia vadivadi henidia. (Salamo 95:7 itaia.) Mamoe naria gaukarana ai, vadivadi karana ena anina be dahaka? Unai bamona vadivadi dalana be dahaka? Daidia do idia vadivadi henidia be namo?

Mamoe Naria Gaukarana ai, Vadivadi Karana Ena Anina be Dahaka?

Mamoe naria gaukarana ai, vadivadi karana be kiki kava totona hebamo karana lasi. Elda tauna ta ia gwau: “Pablisa taudia momo be Baibel sirina ta duahia karana o Baibel ese ia sivarailaia tauna ta herevalaia karana idia moalelaia bada. Momokani, elda tauna sibona do ia hereva be namo lasi. Basileia harorolaia tauna, elda tauna ese ia vadivadi henia tauna, ese sibona ena lalohadai Baibel ena hereva dekenai herevalaia karana ia moalelaia, bona unai amo sibona ena abidadama ia hagoadaia. Reana elda tauna ese Gima Kohorona o Noga! magasin ta do ia laohaia, ia amo hahegoada herevana ta do ia herevalaia totona. Lauma gaudia idia herevalaia dainai, ita gwau mamoe naria gaukarana ai vadivadi karana be idau, kiki kava totona hebamo heheni karana hegeregerena lasi.”

Elda tauna ma ta mai ena diba be ia gwau: “Elda tauna ese do ia vadivadi henia pablisa tauna durua dalana ia laloa namonamo guna, unai murinai ia vadivadi henia. Dahaka ese unai pablisa tauna do ia hagoadaia diba? Mamoe naria gaukarana ai, gau badana be ia vadivadi henia tauna ena kara namo ta dainai ia hanamoa mai ena momokani ida, badina be unai ese do ia durua, do ia haheauka totona.” Oibe, mamoe naria gaukarana ai, vadivadi karana be hebamo totona vadivadi karana sibona lasi; kongregesen taudia iboudiai be unai totona idia vadivadi diba.

Badina be Dahaka Mamoe Naria Tauna ta ese Oi Ia Vadivadi Henia?

Elda tauna ta ese ruma taudia ia vadivadi henidia neganai, ia hegaegae vadaeni iena orea taudia do ia hagoadaia bona do ia durua, abidadama ai do idia gini goada totona. (Roma 1:​11) Vadaeni, elda tauna ta eiava rua idia ura oi do idia vadivadi henia neganai, edena bamona oi kara? Sekit naria tauna ta ia gwau: “Bema elda taudia be hekwakwanai idia vara negadia sibodia ai idia vadivadi, idia ese ta do idia hamaoroa do idia vadivadi henia neganai, reana do ia gwau, ‘Lauegu kerere be dahaka?’ ” Lauma dalanai mamoe idia naria taudia mai edia lalokau ese Iehova ena kara idia tohotohoa. Ia ese salamo torea tauna ia naria bona nega ibounai ‘iena lauma ia hagoadaia lou,’ bona lalohisihisi bona dabu negadia ai unai bamona ia durua bada.​—⁠Salamo 23:​1-4.

Mamoe naria gaukarana ai, tadikaka ia vadivadi henidia, “haginia totona, hadikaia totona lasi.” (2 Korinto 13:⁠10) Idia vadivadi henia tauna ena haheauka, ena lalo-goada, bona ena kamonai karana dainai bema idia hanamoa, unai ese ia hagoadaia momokani. Elda tauna ta ia gwau: “Mamoe naria gaukarana ai, namo lasi elda tauna ese ena hereva o ena kara amo ia hahedinaraia ia mai hekwakwanai do ia tahudia bona do ia herevalaidia totona. Momokani, reana pablisa tauna ia ura hekwakwanai ta do ia herevalaia. Bona, bema mamoe ta ia raka namonamo lasi eiava mamoe oreana amo ia raka siri, namona be elda tauna ese ia durua.”

Mamoe naria Keristani taudia ese inai bamona taudia do idia naria namonamo: “Idia boio vadaeni mamoedia be [lau Iehova] do lau tahua, bona loaloa kava gaudia be do lau hakaua lou. Bero mamoedia edia bero do lau kumia, bona mai edia gorere gaudia be do lau hanamoa.” (Esekiela 34:⁠16) Oibe, reana mamoe haida do idia tahua, o do idia hakaua lou, o edia bero do idia kumia, o do idia hagoadaia be namo. Israela ena mamoe naria taudia ese unai gaukara idia karaia lasi. Unai bamona gaukaradia karaia totona, namona be mamoe naria tauna be mamoe ta kahirakahira dekenai ia lao bona ena dabu hegeregerena ia durua. Hari inai negai, mamoe naria gaukarana ai, vadivadi karana ena anina be unai.

Mamoe Goadadia Idia Naridia be Namo

Bema ita laloa lauma dalanai mamoe naria taudia hari inai negai ese mamoe goadadia idia durua be anina lasi, unai be maoro a? Bema mamoe korikorina ta ese ena naria tauna ia manadalaia vadaeni, ia hekwakwanai neganai naria tauna ese ia durua be haraga. Buka ta ia gwau: “Mamoe edia kara korikori be taunimanima idia gari henidia, bona ta ese edia lalona ia veria do idia manadalaia totona be auka.” Unai buka ia gwau mamoe edia lalona veria dalana ta be inai: “Mamoe oi hereva henidia loulou. Emu gadona do idia manadalaia, bona unai ese edia lalona do ia hagoadaia. Edia aniani gabuna ai idia dekenai oi lao loulou.”​—⁠Alles für das Schaf. Handbuch für die artgerechte Haltung (Gau Iboudiai Mamoe Totona. Naridia Namonamo Dalana Ia Sisibalaia Bukana).

Mamoe ese naridia tauna do idia abidadama henia totona, namona be idia ta ta ia hereva henidia loulou. Unai be momokani Keristani kongregesen lalonai danu. Elda tauna ta ia gwau: “Bema kongregesen taudia idia diba elda tauna ta be vaia ena kara mamoe ia vadivadi henidia loulou, idia ta be mai ena hekwakwanai neganai, ia vadivadi henia be auka lasi.” Unai dainai, lauma dalanai mamoe naria taudia ese mamoe be Kingdom Hall sibona ai idia ubua bona idia naria be namo lasi. Bema mai dalana, namona be mamoe naria gaukarana ai, elda taudia ese mamoe be edia ruma ai idia vadivadi henidia, unai amo do idia dibadia diba. Keristani tauna ta ia gwau, guna, elda dagina ia abia matamata neganai, kongregesen gunalaia tauna ese ia rini henia bona ia noia tadikaka ta do ia vadivadi henia, ena lalona hagoadaia totona, badina be ena natuna kekenina be nega sisina sibona gunanai ia mase, motuka ese ia bampaia dainai. Unai elda be ma ia gwau: “Unai neganai egu lalona ia hisihisi bada, badina be unai tadikaka be guna nega ta lau vadivadi henia lasi, bona ena ruma lau diba lasi! Lo elda tauna ta ese lau ia hamaoroa do ia bamoa neganai, egu lalo-hekwarahi ia ore.” Oibe, mamoe naria gaukarana ai elda taudia idia vadivadi neganai idia heduru heheni.

Mamoe naria gaukarana ai elda tauna ta be pablisa taudia haida vadivadi henidia totona ia hegaegae neganai bona ia vadivadi neganai, hesiai tauna ta, elda ena “dagi namona” ia tahua tauna, ese ia bamoa diba. (1 Timoteo 3:​1, 13) Mamoe naria gaukarana ai elda tauna ese ia vadivadi henidia neganai ia durudia dalana be hesiai tauna ese ia itaia neganai, unai ia laloa bada! Unai dala amo elda taudia bona hesiai taudia ese kongregesen taudia iboudiai idia tura henidia diba, bona Keristani lalokauna bona lalo-tamona ai idia guilaidia hebou varodia idia ha-aukaia diba.​—⁠Kolose 3:​14.

Nega Idia Atoa Vadivadi Totona

Elda edia orea ta ese mamoe naria gaukarana ai pablisa vadivadi henidia madunana be Kongregesen Buka Stadi naria taudia idia henidia neganai, idia haida ese hua 6 lalonai edia grup taudia iboudiai idia vadivadi henidia, to haida ese ta idia vadivadi henia lasi. Unai dainai elda tauna ta ia gwau: “Toana be elda taudia haida be mamoe naria gaukarana ai pablisa taudia vadivadi henidia karana idia goadalaia, to haida ese unai do idia karaia totona, elda taudia ma haida ese idia hagoadadia be namo.” Unai dainai elda edia orea haida ese nega idia gwauraia hidi, unai nega lalonai mamoe naria taudia ese pablisa taudia iboudiai do idia vadivadi henidia.

Momokani, elda tauna ta eiava pablisa tauna ma ta ese kongregesen tauna ta ia vadivadi henia diba, herevana unai be elda edia orea ese ia gwauraia hidi negana lasi. Elda tauna ta ena kara be, mamoe naria gaukarana ai ta ia vadivadi henia gwauraia neganai, ia rini henia guna bona ia gwau: “Hua ta ta iboudiai lau ese famili ta lau vadivadi henia. Bema hua vairai hora tamona lalonai lau ese umui do lau vadivadi henia, unai be namo a? Edena nega be namo umui dekenai?”

Vadivadi Karana Ena Hahenamo

Inai tanobada dikana dainai hekwarahi idia momo idia lao lalonai, naria taudia mai edia hebogahisi ese tadikaka hagoadaia totona idia vadivadi henidia karana be mai ena namo bada. Mamoe naria gaukarana ai mamoe iboudiai be hagoadaia bona durua totona idia vadivadi henidia neganai, idia ta ta iboudiai be mamina idia abia edia noho ia namo bona dika do idia davaria lasi.

Tadikaka ta ese kongregesen ta ia gwauraia, ia lalonai mamoe naria taudia ese Basileia harorolaia taudia iboudiai idia vadivadi henidia loulou; ia gwau: “Mamoe naria gaukarana ai vadivadi karana be pablisa taudia ese idia ura henia bada. Nega momo pablisa tauna ta ese elda tauna ta ia nanadaia edena negai do ia vadivadi henia lou, badina be ena vadivadi gunana ia moalelaia, lalona hagoadaia herevadia ia gwauraia dainai. Mamoe naridia gaukarana dekenai vadivadi henidia karana dainai, kongregesen ia goada ia lao.” Ripoti ma haida ese idia hahedinaraia, mamoe naria taudia mai edia lalokau be unai bamona idia kara neganai, kongregesen be lalokau, lalo-tamona, bona ura-heni ai ia tubu daekau diba. Hahenamo badana unai!

Mamoe naria Keristani taudia ese mamoe idia vadivadi henidia, lauma dalanai idia hagoadaia totona. Elda taudia idia ura edia kongregesen taudia idia hagoadaia. Bema elda tauna ta ese ia vadivadi henia tauna ese hekwakwanai badana ta ia gwauraia hedinarai, bona ia dainai sisiba ia abia be namo, reana namona be elda tauna ese dala ia karaia nega idauna ta ai do idia herevalaia totona, bona bema hesiai tauna ese ia bamoa, unai bamona ia karaia be gau badana. Herevana dahaka ia vara, vadivadi be guriguri amo ia hadokoa be namo.

Mamoe naria Keristani tauna ta ia ura kahirakahira oi do ia vadivadi henia, a? Bema ia ura, ena hahegoada herevadia oi naria mai emu moale ida. Do ia mai, oi do ia durua bona do ia hagoadaia, mauri ia lao henia dalana do oi rakalaia noho totona.​—⁠Mataio 7:​13, 14.

[Box on page 26]

Mamoe Naria Gaukarana Ai Vadivadi Dalana Sisibalaia Herevadia

◻ Vadivadi negana gwauraia hidi: Dala namona be elda tauna ese ta ia vadivadi henia gwauraia negana ia hadibaia guna. Bema ia ura hekwakwanai badana ta do ia tahua, namona be pablisa tauna ia hadibaia guna.

◻ Hegaegae: Oi vadivadi henia tauna ena lalona bona ena noho oi laloa. Ena kara namona ta dainai oi hanamoa mai emu momokani ida. “Lauma Helaga ena hanamoa” do oi henia dalana oi tahua; iena lalona bona ena abidadama hagoadaia herevana unai.​—⁠Roma 1:​11, 12.

◻ Do oi laohaia tauna: Elda tauna ma ta eiava lo hesiai tauna ta.

◻ Vadivadi negana lalonai: Namona be elda tauna ia kara haragaharaga lasi, lalokau bona lalo-goada ia hahedinaraia, bona ena lalona be hegeregere gau idauidau do ia herevalaia. Ruma bese edia namo bona ma gau haida ia henanadailaia be namo. Ia hakala namonamo. Bema hekwakwanai badana ta idia gwauraia hedinarai, reana ia ese dina ma ta do ia gwauraia hidi be namo, do ia lou mai unai gau tahua totona.

◻ Vadivadi negana ena daudau: Umui gwauraia hidi guna negana ai oi ginidae, bona ruma tauna ese emu vadivadi ia do moalelaia lalonai oi rakatania.

◻ Vadivadi ena dokona ai: Oi guriguri be namo bona oi vadivadi henia tauna ese unai do ia moalelaia bada.​—⁠Filipi 4:​6, 7.

[Picture on page 24]

Mamoe naria Keristani taudia ese lauma dalanai idia gimadia

[Pictures on page 26]

Mamoe naria gaukarana ai, vadivadi karana amo lauma dalanai idia hagoadadia diba