“Dirava ese mai Momokani ida Ia Idia Tahua Taudia Edia Davana Do Ia Henia”

Iehova be ia idia tomadiho henia taudia edia hekwarahi ia laloa bada, a? Reana haida idia gwau, Dirava be ita ia laloa lasi. To, unai bamona hereva ese Dirava ena ladana ia hadikaia. Baibel ese taunimanima edia koikoi herevadia ia hamaoromaoroa, bona ita ia hadibaia Iehova be ia idia tomadiho henia taudia edia hekwarahi ia laloa bada. Heberu 11:6 ai aposetolo Paulo ena hereva ita laloa.

Edena dala ai Iehova do ita hamoalea? Heberu 11:6 ai Paulo ia gwau: “Bema tau ta be abidadama lasi, ia ese Dirava ia hamoalea diba lasi.” Aposetolo Paulo ia gwau abidadama lasi tauna ese Dirava ia hamoalea diba lasi. Ita gwau diba, Dirava hamoalea totona abidadama be mai anina bada.

Edena bamona abidadama amo Iehova ita hamoalea? Dirava ita abidadama henia daladia be rua. Namba 1: Ita “abia dae be namo Dirava be ia noho.” Baibel ma ta ia gwau, ita ese “Dirava do [ita] abidadama henia guna, Dirava be ia mauri noho.” To, bema ita laloa Dirava be ia noho lasi, ia ita hamoalea diba lasi. Anina be, abidadama ita hahedinaraia sibona be hegeregere lasi, badina demoni danu idia abia dae Iehova ia mauri noho. (Iamesi 2:19) Namona be ita abia dae momokani Dirava be ia mauri noho, bena kara haida ita karaia, anina be Dirava ia moalelaia daladia ita badinaia amo ita hamomokania ita be mai eda abidadama.​—Iamesi 2:20, 26.

Namba 2: Ita “abia dae be namo Dirava be” “davana do ia henia.” Abidadama momokani tauna ia diba momokani bema Dirava ia moalelaia daladia ia badinaia, ena hekwarahi be hekwarahi kava lasi. (1 Korinto 15:58) Bema ita laloa Iehova be eda davana o harihari gauna do ia henia lasi, edena bamona ia ita hamoalea diba? (Iamesi 1:17; 1 Petero 5:7) Bema ta ia gwau Dirava be ita ia laloa bada lasi, o ita karaia gaudia ia moalelaia lasi, o harihari gaudia do ia henia lasi, unai bamona tauna be Baibel ese ia sivarailaia Diravana ia diba lasi.

Iehova be daidia dekenai harihari gauna o davana do ia henia? Paulo ia gwau: “Mai momokani ida ia idia tahua taudia.” Baibel idia hahanaia taudia edia buka ta ia gwau, Grik herevana idia hahanaia “mai momokani ida [Dirava] idia tahua taudia,” ena anina be, haida be Dirava idia tahua o stadilaia sibona lasi, to idia gaukara goada Dirava idia tomadiho henia totona. Diksenari ma ta ia gwau, unai Grik herevana ena anina be, haida be mai edia goada bona lalona ibounai ida Dirava idia tomadiho henia. Oibe, bema ta be mai ena abidadama dainai, mai kudouna ibounai ida Iehova ia lalokau henia bona tomadiho henia, Dirava ese ena davana do ia henia.​—Mataio 22:37.

Edena dala ai Iehova ese ia idia tomadiho henia taudia edia davana do ia henia? Ia gwauhamata edia davana be, vaira negana ai tanobada Paradaisona dekenai do idia mauri hanaihanai​—unai ese ia hahedinaraia Ia be hariharibada bona lalokau Diravana. (Apokalupo 21:3, 4) To hari danu, mai momokani ida Iehova idia tahua taudia be hahenamo momo idia abia. Iena lauma helaga ena heduru bona Baibel ai aonega namona idia abia dainai, mauri namona idia moalelaia.​—Salamo 144:15; Mataio 5:3.

Momokani, Iehova Dirava be ia idia tomadiho henia taudia edia hesiai gaukara ia laloa bada. Unai dainai, oi ura Ia kahirakahira oi lao, a? Bema oibe, vadaeni abidadama oi hahedinaraia daladia ma haida oi diba be namo, badina Iehova ese unai bamona abidadama taudia edia davana do ia henia.