Dirava Ena Basileia​—Dahaka Dainai Iesu ese Ia Laloa Bada?

Atikol ginigunana ese ia hahedinaraia, Iesu be ena mauri lalonai ‘Basileia ena sivarai namona harorolaia’ gaukarana ia atoa guna. (Luka 8:1) Kilomita handred momo ia raka, unai amo Israela taudia dekenai Dirava ena Basileia ia hadibaia. Evanelia Bukadia foa lalonai Iesu ena haroro gaukara sivaraidia idia noho, bona inai hereva, Basileia, be nega 100 ia hedinarai. Unai be Iesu ena hereva lalonai ia gwauraia, to unai ese Dirava ena Basileia ena kahana ta sibona ia hahedinaraia!​—Ioane 21:25.

Iesu be tanobada ai ia noho neganai, dahaka dainai Basileia ia laloa bada? Badina Iesu ia diba Dirava ese unai Basileia ena Lohia ai ia halaoa. (Isaia 9:6; Luka 22:28-30) To Iesu be dagi o ladana bada abia karana ia laloa lasi. (Mataio 11:29; Mareko 10:17, 18) Danu, sibona ena namo totona Basileia ia harorolaia lasi. To, Iesu be Dirava ena Basileiaa ia laloa bada, badina unai ese iena lalokau taudia​—iena guba Tamana bona abidadama taudia dekenai namo do ia mailaia.

BASILEIA ESE IESU ENA TAMANA TOTONA DO IA KARAIA GAUNA

Iesu be ena guba Tamana ia lalokau henia bada. (Aonega Herevadia 8:30; Ioane 14:31) Iena Tamana ena kara namodia, hegeregere lalokau, hebogahisi, bona hahemaoro goeva karana ia ura henia. (Deuteronomi 32:4; Isaia 49:15; 1 Ioane 4:8) Oibe, Iesu ia ura lasi ena Tamana dekenai idia gwauraia koikoi herevadia ia kamonai, hegeregere Dirava ese taunimanima edia hisihisi ia laloa lasi bona ia ura idia hisihisi. Unai dainai, Iesu ia ura bada “Basileia ena sivarai namona ia harorolaia”​—ia diba unai Basileia ese nega maorona ai ena Tamana ena ladana do ia hahelagaia. (Mataio 4:23; 6:9, 10) Edena bamona do ia vara?

Iehova ese Basileia amo kara badadia do ia karaia taunimanima durua totona. Ia ese abidadama taudia edia “mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.” (Apokalupo 21:3, 4) Dirava ese Basileia amo taunimanima edia hisihisi ibounai do ia haorea.b

Unai dainai Iesu ia ura taunimanima dekenai Basileia ia herevalaia! Ia diba unai ese ena Tamana ena siahu bona hebogahisi do ia hahedinaraia. (Iamesi 5:11) Danu, ia diba Basileia ese abidadama taudia do ia hanamoa.

BASILEIA ESE ABIDADAMA TAUDIA TOTONA DO IA KARAIA GAUNA

Iesu be tanobada ia do mai lasi neganai, ena Tamana ida guba dekenai ia noho. Tamana ese Natuna amo gau ibounai ia havaraia, hegeregere guba mai ena hisiu bona galaksi momo, bona iseda tanobada mai ena tubutubu gaudia bona animal idauidau. (Kolose 1:15, 16) Unai ibounai amo, Iesu ese taunimanima ia moalelaia.​—Aonega Herevadia 8:31.

Iesu ia haroro badina taunimanima ia lalokau henia. Matamana amo ia hahedinaraia, tanobada ia mai badina ia ura taunimanima dekenai “sivarai namona” ia harorolaia. (Luka 4:18) Iena hereva amo sibona lasi, to hanaihanai kara amo iena lalokau ia hahedinaraia. Hegeregere, hutuma be Iesu kamonai henia totona idia mai neganai, “idia ia hebogahisi henia bona gorere taudia ia hanamoa.” (Mataio 14:14) Lepera tauna ta ia abia dae momokani bema Iesu ia ura ena gorere ia hanamoa, do ia karaia diba. Iesu ese ena gorere ia hanamoa, bona mai hebogahisi ida ia gwau: “Lau ura, harihari oi goeva.” (Luka 5:12, 13) Iesu ia itaia ena turana Maria be iena tadikaka Lasaro totona ia taitai neganai, “ena lalona ia hisihisi bada bona ia lalohekwarahi,” bona “ena mata ranu ia diho.” (Ioane 11:32-36) Bena hoa karana ia karaia​—Lasaro, dina foa ia mase vadaeni tauna, ia hatorea isi lou!​—Ioane 11:38-44.

Iesu ia diba unai negai ia karaia heduru be do idia noho daudau lasi. Edia gorere ia hanamoa taudia be gabeai idia gorere lou, bona ia hatorea isi lou taudia be gabeai idia mase lou. To, Iesu ia diba Dirava ena Basileia ese unai hekwakwanai do ia haorea vaitani. Unai dainai hoa karadia ia karaia sibona lasi, to danu “Basileia ena sivarai namona” ia harorolaia goadagoada. (Mataio 9:35) Iena hoa karadia amo Dirava ena Basileia ese tanobada hegegemadai do ia karaia gaudia ia hahedinaraia. Baibel ena gwauhamata unai nega dekenai mani oi itaia.

• 

  Gorere be lasi.

  “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” Danu ‘ta do ia gwau lasi, “Lau be gorere.”’​—Isaia 33:24; 35:5, 6.

• 

  Mase be lasi.

  “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29.

  “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”​—Isaia 25:8.

• Mase taudia do idia toreisi lou.

  “Guria gabuna lalonai idia noho taudia ibounai ese ena gadona do idia kamonai, bona do idia raka-lasi.”​—Ioane 5:28, 29.

  “Do idia toreisi lou.”​—Kara 24:15.

• 

  Ruma bona moni gaukara ena hekwakwanai be lasi.

  “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi. . . . Bona lauegu abia hidi taudia ese, edia imana gaukara dekenai idia karaia gaudia do idia moalelaia.”​—Isaia 65:21, 22.

• 

  Tuari be lasi.

  “Tuari be Dirava ese ia hadokoa noho, tanobada kahana ibounai dekenai.”​—Salamo 46:9.

  “Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.”​—Isaia 2:4.

• 

  Aniani be momo herea.

  “Tano ena anina idia vara namonamo, badina be, Dirava, iseda Dirava ese ita ia hanamoa.”​—Salamo 67:6.

  “Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”​—Salamo 72:16.

• Ogogami be lasi.

  “Gau lasi taudia, be Dirava ese ia laloaboio lasi.”​—Salamo 9:18.

  “Ogogami taudia be ia dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria. Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria.”​—Salamo 72:12, 13.

Unai gwauhamata idauidau oi laloa neganai, oi laloparara dahaka dainai Iesu ese Dirava ena Basileia ia laloa bada, ani? Tanobada ai ia noho neganai, ia ura bada kamonai taudia dekenai Dirava ena Basileia ia herevalaia, badina ia diba unai Basileia ese hari idia vara hekwakwanai do ia haorea.

Baibel ena gwauhamata herevadia Basileia totona oi ura henia, a? Bema oibe, edena dala ai diba ma haida oi abia diba? Bona dahaka oi karaia diba unai hahenamo oi moalelaia totona? Atikol ginigabena ese unai henanadai do ia haerelaia.