RAU 1 AMO | DIRAVA ENA BASILEIA—DAHAKA DAINAI OI LALOA BADA?

Dirava Ena Basileia—Dahaka Dainai Oi Laloa Bada?

Reana atikol ginigunadia amo oi itaia, Iehova ena Witnes taudia be Dirava ena Basileia idia laloa bada. Bona vaira neganai Basileia ena hahenamo edia sivarai oi duahia dainai, reana oi hoa. Danu, reana oi laloa inai gaudia do idia vara momokani eiava lasi.

Aonega karana be oi kamonai gaudia oi laloa namonamo guna. (Aonega Herevadia 14:15) Emu kara be idaunegai Berea taudia edia kara bamona.a Nega ginigunana Basileia ena sivarai namona idia kamonai neganai, idia moalelaia, to idia abia dae haraga lasi. To, Toretore Helagadia idia tahua namonamo, unai amo idia itaia “bema idia kamonai herevadia be momokani eiava lasi.” (Kara 17:11) Ita gwau diba, Berea taudia ese sivarai namona be Baibel ena hereva ida idia hahegeregerea. Unai amo idia abia dae sivarai namona be Baibel lalonai ia noho.

Iehova ena Witnes taudia be oi idia noia unai bamona do oi karaia danu. Emai davana lasi Baibel stadi kosi amo dala ai kehoa, Baibel ena hadibaia hereva be Iehova ena Witnes taudia ese idia abia dae herevana, Dirava ena Basileia unai, ida oi hahegeregerea totona.

Danu, Baibel stadi amo Dirava ena Basileia oi dibaia neganai, oi do ia durua inai henanadai edia haere oi dibaia.

Ita be edeseni amo ita mai?
Dahaka dainai ita mauri?
Dahaka dainai Dirava ese hisihisi ia koua lasi?
Mase taudia dekenai dahaka ia vara?
Tanobada do ia ore, a?
Dahaka ese ruma bese ia hamoalea diba?

Baibel stadi karana ese oi do ia durua ‘Dirava kahirakahira do oi lao.’ (Iamesi 4:8) Dirava kahirakahira oi lao neganai, Dirava ena Basileia ese hari bona vaira negana ai do ia karaia gaudia do oi lalopararalaia. Iesu be guriguri amo ena Tamana ia hamaoroa: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.”—Ioane 17:3.

Iehova ena Witnes taudia be inai buka amo emu Baibel stadi idia karaia diba.

Davana lasi Baibel stadi totona, Iehova ena Witnes ta oi noia o www.jw.org/ho ai fom oi hahonua (Web sait ai BAIBEL STADI NOIA oi itaia)

a Berea be idaunegai Makedonia ena siti ta.

Dirava Ena Basileia Ia Ura Henia Ena Badina

Vanegai, mauri lagani 10 kekeni ta ladana, Folake be sikuli ai essay ta ia torea bona ladana be, “What I Love Most in This World.” Folake ese mai moale ida haida dekenai Dirava ena Basileia ia herevalaia ena badina ia torea.

Folake ia gwau: “Dirava ena Basileia be gavamani korikorina ta. To oi itaia diba lasi, herevana mata-galasi oi karaia!”

Folake ese Basileia ena hahenamo idauidau, ia ura ia itaia gaudia ia torea. Ia be Basileia ese do ia haorea gaudia haida ia herevalaia: “Ruma lasi taudia be dala ai idia mahuta bona tano haida ai natudia be hitolo dainai idia mase lau itaia neganai, lau hebogahisi.” Ma ia gwau: “Isaia 65:21 (BHḡ) lau duahia neganai, lau moale lou.” Dirava ena Basileia henunai do idia noho taudia dekenai unai siri ena gwauhamata be inai: “Ruma do idia haginidia bona do idia noholaia; vain umadia do idia hadoa, bena anidia do idia ania.”

Folake ia gwau, ia moale danu badina kahirakahira Dirava ena Basileia ese gorere ibounai do ia haorea. Iena essay lalonai Apokalupo 21:4 ena hereva ia torea, ia gwau Dirava “ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.” Dokonai ia gwau: “Lau ura henia gauna badana be, Iehova bona ena Basileia lau herevalaia.” Folake ia hahedinaraia goevagoeva, ia be Dirava ena Basileia ia ura henia bada!