RAU 1 AMO | MASE TAUDIA DO IDIA TOREISI LOU, A?
Mase Murinai Dahaka Ia Vara?
“Lau laloa ta ia mase neganai, ia be gabu toi dekenai ia lao: guba, hel, o pegatori.a Lau diba lau be hegeregere lasi guba do lau lao, eiava kara dika badadia lau karaia lasi dainai hel dekenai lau lao be anina lasi. To, lau diba lasi pegatori dekenai dahaka ia vara. Baibel dekenai unai hereva lau itaia lasi. Ia be taunimanima edia lalohadai sibona.”—Lionel.
“Lau maragi neganai lau dibaia gauna be, taunimanima idia mase neganai guba dekenai idia lao, to unai lau abia dae lasi. Lau laloa mase be gau ibounai ena dokona, anina be mase taudia totona helaro be lasi.”—Fernando.
Reana nega ta oi laloa: ‘Ta ia mase neganai dahaka ia vara? Iseda lalokau mase taudia be gabu ta dekenai idia hisihisi, a? Idia do ita itaia lou, a? Edena bamona do ita hamomokania?’ Mani Baibel ena hereva ita itaia. Ginigunana be, Baibel ese mase be edena bamona ia herevalaia. Bona do ita itaia Dirava ena Hereva, Baibel, ese mase taudia edia helaro be edena bamona ia herevalaia.
Mase taudia dekenai dahaka ia vara?
BAIBEL ENA HAERE: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi, bona taunimanima ese mase taudia idia laloaboio momokani. Oiemu imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.”b—Hadibaia Tauna 9:5, 10.
Inai hereva Mase Taudia Edia Gabu be taunimanima idia mase neganai ita guria gabuna ia herevalaia; unuseniai tau ta be gau ta ia lalohadailaia diba lasi eiava gau ta ia karaia diba lasi. Abidadama tauna Iobu ese Mase Taudia Edia Gabu be edena bamona ia laloa? Dina tamona lalonai ena kohu ibounai ia haboioa bona ena natuna ibounai idia mase, bena toto dika hereana ese ena tauanina ia hadikaia. Dirava ia noia ia gwau: “Lau ura mase gabuna dekenai [“hel lalonai” Catholic Douay Version] lau do oi hunia. Mani lau do oi hunia.” (Iobu 1:13-19; 2:7; 14:13) Oibe, Iobu ia laloa lasi Mase Taudia Edia Gabu be lahi gabuna eiava hisihisi do ia abia hanaihanai gabuna. To ia diba unai be laga-ani gabuna.
Mase taudia dekenai idia vara gaudia ita dibaia dalana ta be, Baibel lalonai mase amo idia toreisi lou taudia eit edia sivarai ita duahia. Maua ladana “Baibel ese Ia Gwauraia Toreisi Lou Sivaraidia Eit” itaia.
Unai taunimanima eit amo ta ia gwau lasi ia be guba dekenai ai lao o hel dekenai hisihisi ia abia. Bema idia be unai bamona gabu ta dekenai idia lao, taunimanima dekenai unai do idia gwauraia, ani? Bona Baibel lalonai do idia torea, unai amo ita ibounai ese ita duahia diba, ani? Baibel lalonai unai bamona sivarai ta ia noho lasi. Idia toreisi lou taudia eit ese guba eiava hel idia herevalaia lasi. Dahaka dainai? Badina idia be gau ta idia diba lasi, idia mahuta mase bamona. Danu, nega haida Baibel ese mase be mahuta ida ia hahegeregerea. Hegeregere, abidadama tauna Davida bona Stefano be “mase lalonai [idia] mahuta.”—Kara 7:60; 13:36.
Mase taudia totona dahaka helaro ia noho? Mahuta amo idia toreisi lou diba, a?
a Taunimanima idia abia dae inai gabu ai mase taudia be nega sisina lalonai hisihisi idia abia guna edia kara dika dainai, unai amo idia goeva bona guba dekenai do idia daekau.
b Inai hereva “Mase Taudia Edia Gabu” ena anina be Heberu herevana “Sheol” bona Greek herevana “Hades” amo idia abia. Baibel haida ai “Hel” idia gaukaralaia o mase tauna be lahi ese ia gabua, to unai lalohadai be Baibel ena hereva hegeregerena lasi.