RAU 1 AMO | DAHAKA DAINAI ITA KOIKOI LASI?

Koikoi Karana ese Dika Ia Havaraia

“Nega momo hekwakwanai badadia ita hamaoromaoroa totona ita koikoi sisina be namo.”—Samantha, South Africa.

Unai hereva dekenai oi lalotamona, a? Samantha hegeregerena, ita danu nega haida hekwakwanai badadia ita davaria. Unai bamona hekwakwanai haida ese ita idia doria ita koikoi totona, bona ita karaia abia hidi ese do idia hahedinaraia ita be dahaka ita laloa bada. Hegeregere, bema ita ura lasi sibona ita hahemaraia dainai ita koikoi, unai ese ia hahedinaraia ita abia dae koikoi karana be kerere lasi. Danu, bema gabeai haida idia diba oi koikoi, unai ese dika ia havaraia diba. Mani inai oi laloa.

KOIKOI ESE BADINAIA KARANA IA HADIKAIA

Headava ia goada totona badinaia karana be mai anina bada. Bema headava taudia be idia badinaia heheni, do idia mamia edia headava ia namo bona ia goada. To, badinaia karana be ia vara kava lasi. Badinaia karana ia goada totona, namona be umui gaukara hebou, mai momokani ida umui herevahereva, bona ta ta ena namo umui laloa bada. To, koikoi karana ese badinaia karana ia hadikaia diba. Bona bema unai ia vara do ia auka ita hagoadaia lou totona.

Nega ta emu turana namona ta ese oi ia koia, a? Bema oibe, emu hemami be edena bamona? Momokani, oi lalohisihisi. Unai be vaia ia vara gauna. Ita diba momokani koikoi karana ese hetura karana namona ia hadikaia diba.

KOIKOI BE MA TA DEKENAI IA HANAIA DIBA

University of California ai, taunimanima edia mauri dalana ia stadilaia profesa, Robert Innes, ese ena tahua karana amo ia davaria, “koikoi karana be ma ta dekenai ia hanaia diba.” Ia be daihanai gorerena ta bamona—koikoi tauna oi bamoa momo neganai, iena koikoi karana be oi dekenai ia “hanaia” diba.

Edena dala ai koikoi karana ena tarapu oi hanaia diba? Baibel ese oi ia durua diba. Mani Baibel ena hakaua herevadia haida oi laloa.

Koikoi Daladia Idauidau

Koikoi herevadia

ANINA BE DAHAKA? Ta dekenai ia momokani lasi gauna gwauraia karana. Danu, haida hakaua kerere o koia totona hereva momokani hagagevaia, mai anina bada herevadia hunia, bona sivarai momokanina ta dekenai koikoi herevadia gwauraia karana.

BAIBEL IA GWAU: “[Iehova] ese kara gagevagageva taudia, ia ura henia lasi momokani, to kara maoromaoro taudia be ia ese ia abidadama henia noho.” (Aonega Herevadia 3:32) “Koikoi karana umui atoa siri vadaeni dainai, umui ta ta ese emui dekena tauna dekenai hereva momokani do umui gwauraia.”—Efeso 4:25.

Ma haida ladana hadikaia karana

ANINA BE DAHAKA? Ma ta ena ladana hadikaia totona koikoi herevadia gwauraia karana.

BAIBEL IA GWAU: “Laloa kerere tauna ese heai ia havaraia noho, bona hadikaia hereva kava gwauraia tauna ese, turana korikori taudia edia turana dala ia hamakohia noho.” (Aonega Herevadia 16:28) “Bema au be lasi neganai, lahi be ia bodo noho, bona bema hadikaia hereva be lasi neganai, heai be do ia doko.”—Aonega Herevadia 26:20.

Koikoi dalanai moni abia karana (fraud)

ANINA BE DAHAKA? Ta be koikoi dalanai ma ta ena lalona ia veria ena moni o kohu ia abia totona.

BAIBEL IA GWAU: “Davana abia totona ia gaukara ogogami tauna ena kohu be koikoi dalana amo umui abia lasi.” (Deuteronomi 24:14, 15, NWT) “Ogogami tauna ia koia tauna be iena Havaraia Tauna ia hereva dika henia, to ogogami taudia ia hebogahisi henia tauna ese Ia ia hanamoa.”—Aonega Herevadia 14:31, NWT.

Henaohenao

ANINA BE DAHAKA? Haida amo gwaumaoro abia lasi bena edia kohu abia karana.

BAIBEL IA GWAU: “Namo lasi henaoa tauna ia henaohenao lou, to namona be ia gaukara goada bona iena imana amo gaukara namona ia karaia, unai amo ia dabu tauna dekenai gau ta ia henia diba.” (Efeso 4:28) “Umui sibona do umui koia lasi: . . . Mataganigani taudia, inuinu kekero taudia, hereva dika taudia, bona henaohenao taudia be Dirava ena Basileia do idia abia lasi.”—1 Korinto 6:9, 10.