Koikoi Lasi Ena Namo

Baibel ai, Grik herevana amo idia hahanaia “momokani” ena anina be “gau ta be ia namo herea.” Anina ma ta be kara namo hereana ta.

Keristani taudia be mai edia lalona ibounai ida aposetolo Paulo ena hereva idia badinaia, ia gwau: “Ai ura mai momokani ida gau ibounai ai karaia.” Unai ena anina be dahaka?

KUDOUNA ENA URA DADARAIA

Taunimanima momo be gabu ta idia do lao lasi neganai, hevarivari ai sibona idia sekea. Dahaka dainai? Badina idia ura edia toana ia namo. To, iseda huina o dabua edia toana ia hereaia gauna ta ia noho. Oibe, iseda lalonai idia noho gaudia be eda kara amo do idia hedinarai.

Baibel ese ia hahedinaraia ita be kara dika ita karaia diba. Genese 8:21 ia gwau, ita ‘maragi negana dekena amo, eda laloa be dika.’ Ita be goevadae lasi taudia dainai, namona be ita hekwarahi koikoi karadia ita dadaraia. Aposetolo Paulo be kara dika ia dadaraia dalana ia herevalaia, ia gwau: “Lauegu kudouna ai Dirava ena taravatu lau moalelaia momokani. To lau davaria, egu tauanina lalonai taravatu ma ta ia noho, bona unai taravatu be egu lalona ai ia noho taravatuna ia tuari henia, bona inai kara dika ena taravatu ese igui hesiai tauna bamona lau ia hakaua.”​—Roma 7:22, 23.

Hegeregere, bema eda kudouna ese ita ia doria ita kara dika bona koikoi totona, namona be eda kudouna ena ura ita badinaia lasi. Bema lalohadai dikadia ita dadaraia, ita be hanaihanai do ita honest o kara momokani, herevana momo be unai bamona idia karaia lasi.

KOIKOI KARADIA DADARAIA

Ita koikoi lasi totona, gau badana be kara maoromaoro taravatudia ita badinaia. To madi, momo be edia ‘dabua ena toana’ sibona idia laloa bada bona edia kara idia laloa lasi. Unai dainai, idia laloa koikoi karana be kerere lasi. Buka ladana, The (Honest) Truth About Dishonesty, ia gwau: “Momokani, bema koikoi karadia ita habadaia ela bona ita manada, do ita laloa ita be ita koikoi lasi.” Dahaka ese ita do ia durua bena ita diba koikoi karana be maoro eiava lasi?

Tanobada ai taunimanima milioni momo idia davaria Baibel ese ita ia durua diba. Baibel ena kara maoromaoro taravatudia be gau ta ida ita hahegeregerea diba lasi. (Salamo 19:7) Baibel ese iseda ruma bese maurina, moni gaukara, iseda kara, bona Dirava tura henia karana dekenai hakaua herevadia namodia ia henia. Nega aukadia lalonai ita ia gimaia. Iena taravatu bona hakaua herevadia be bese idauidau, iduhu idauidau bona taunimanima ibounai totona. Baibel ita duahia, laloa dobu, bona ena sisiba ita badinaia neganai, ita do ia durua eda kudouna ai do ita koikoi lasi bona kara maoromaoro do ita badinaia.

To, koikoi karana ita dadaraia totona, Baibel ena diba maoromaoro ita abia sibona be hegeregere lasi. Inai tanobada dikana ese eda lalona ia veria diba, koikoi karadia ita karaia totona. Unai dainai namona be Dirava ena heduru totona ita guriguri. (Filipi 4:6, 7, 13) Unai dala amo kara maoromaoro do ita karaia bona gau iboudiai lalonai do ita koikoi lasi.

KOIKOI LASI ENA NAMO

Matamanai ita herevalaia tauna, Hitoshi, be koikoi lasi ida gaukara ia karaia dainai namo ia davaria. Hari ia gaukara kampani dekenai iena bosi ese iena kara momokani ia moalelaia. Hitoshi ia gwau: “Lau moale badina lau abia gaukarana ese egu lalomamina goevana ia hadikaia lasi.”

Haida dekenai unai bamona ia vara danu. Baibel ena hakaua herevana, “mai momokani ida gau ibounai ai karaia,” idia badinaia taudia edia haheitalai mani oi laloa.

• Lalomamina Goevana

  

  “Egu mauri lagani be 13 neganai, sikuli lau rakatania bona henaohenao taudia ida lau gaukara. Unai dainai egu moni, 95 pesen bamona, be koikoi karana amo lau abia. Gabeai, lau headava, bona egu adavana ida Iehova ena Witnes taudia danu Baibel ai stadilaia matamaia. Stadi karana amo ai diba Iehovaa Dirava be koikoi karadia ia inai henia, unai dainai emai mauri dalana ai haidaua. Lagani 1990 ai, Iehova dekenai emai mauri ai gwauhamatalaia bona bapatiso ai abia, bena Iehova ena Witnes taudia ai ai lao.”​—Aonega Herevadia 6:16-19.

  “Guna, egu ruma be henaohenao kohudia amo ia honu to hari idia noho lasi dainai, egu lalomamina be ia goeva. Egu mauri gunana lau laloa lou neganai, Iehova lau tanikiu henia badina lau ia hebogahisi henia. Hari lau mahuta namonamo diba, badina lau diba Iehova ese lau ia lalonamo henia.”​—Cheryl, Ireland.

  

  “Egu bosi ia kamonai lau be kastoma ta ena lalona veria moni lau abia dae lasi neganai, lau dekenai ia gwau: ‘Oi tomadiho henia Diravana be momokani! Lau moale badina inai kampani dekenai oi gaukara.’ Mai momokani ida gau ibounai lau karaia dainai, Iehova Dirava vairanai lalomamina goevana lau abia. Bona unai ese dala ia kehoa egu famili bona ma haida lau durua unai bamona idia karaia totona.”​—Sonny, Hong Kong.

• Lalomaino

  

  “Lau be intanesinol banika ta ena bosi ena durua tauna ta. Unai gaukara ai momo be moni abia totona koikoi karadia idia karaia. Momo ese idia laloa bada herevana ta be inai; ‘Moni momo abia totona koikoi sisina oi gwauraia be dika lasi.’ To lau be mai momokani ida lau gaukara dainai lalomaino lau davaria. Egu lalona lau hadaia do lau koikoi lasi, herevana dahaka hekwakwanai idia vara. Egu gaukara taudia idia diba idia do lau koia lasi o idia totona do lau koikoi lasi.”​—Tom, United States.

• Sibona Matauraia

  

  “Egu bosi be lau ia doria do lau koikoi bona gaukara gabunai idia boio kohudia do lau ripotilaia lasi, to unai lau dadaraia. Henaohenao taudia idia davaria murinai, egu bosi be lau ia tanikiu henia badina lau koikoi lasi. Ena be tanobada ai koikoi karadia be bada, to namona be ita gini goada. Unai bamona ita karaia neganai, ma haida ese ita do idia abidadama henia bona matauraia.”​—Kaori, Japan.

Bema ita koikoi lasi, lalomamina goevana bona lalomaino do ita davaria bona sibona do ita matauraia​—unai ese idia hahedinaraia koikoi lasi karana be mai ena namo. Unai oi abia dae, a?