Mauri Lalonai Hekwakwanai Ta Ia Vara Neganai

Hegeregere, United States ai ia noho hahine ladana Sally,a be lai-gubana (hurricane) ai ena kohu momo ia haboioa, ia gwau: “Nega momo lau mamia egu lalohisihisi lau haheaukalaia be auka.”

Mauri ai ia vara hekwakwanai ma ta be iseda lalokau tauna ta ia mase. Australia ai ia noho hahine ladana, Janice, ia gwau: “Egu natuna memero rua idia mase neganai, lau lalohisihisi bada bona unai be hegeregere egu mauri ai gau ta ia makohia maragimaragi bona hanamoa dalana be auka. Dirava lau guriguri henia bona lau hamaoroa: ‘Inai hisihisi lau haheaukalaia diba lasi! Lau mase be namo. Lau ura lasi lau mauri noho.’”

Danu, Daniel ena adavana be tau ma ta ida ia heudahanai neganai, ia lalohisihisi bada. Ia gwau: “Egu adavana ia gwau ia be tau ma ta ida ia heudahanai neganai, unai be hegeregere kaia ta ese egu kudouna ia gwadaia bamona. Lau mamia lalohisihisi be kaia ta ese lau ia gwadaia loulou bamona, bona hua haida lalonai unai bamona lau mamia.”

Inai Gima Kohorona ai do ita itaia dahaka dainai mauri be mai anina bada ena be

• Disasta ia vara

• Lalokau tauna ta ia mase

• Headava tau eiava hahine ta be ia heudahanai

• Gorere badana ta oi abia

• Emu mauri oi moalelaia lasi

Ginigunana be, edena dala ai disasta ia vara neganai ita haheauka diba?