Disasta Ia Vara Neganai

“Matamanai ai mamia ai be helaro lasi. Medu dainai ororo amo tano ia moru bona abata ese emai kohu ibounai ia hadikaia.”—Andrew, Sierra Leone.

“Lai-gubana ia ore murinai emai ruma dekenai ai giroa lou. Gau ta ia noho lasi. Ai hoa bada! Egu natuna kekeni be ia tui diho bona ia tai.”—David, Virgin Islands.

BEMA OI be disasta ta amo oi roho mauri vadaeni, reana disasta amo idia roho mauri taudia edia hemami do oi lalopararalaia: idia hoa, ia vara gauna idia abia dae lasi, idia daradara, idia lalohisihisi, bona nihi dikadia idia abia. Idia roho mauri taudia momo be idia lalohisihisi bona edia mauri idia moalelaia lasi.

Bema emu mauri ai disasta ia vara dainai emu kohu ibounai oi haboioa, reana oi danu be unai hisihisi do oi haheaukalaia lasi. Do oi mamia emu mauri be anina lasi. To, Baibel ese ia hahedinaraia emu mauri be mai ena anina bona vaira negai helaro namona do oi moalelaia.

BAIBEL AI IDIA NOHO HEREVA MOMOKANI ESE HELARO IA HENIA

Hadibaia Tauna 7:8 ia gwau: “Kara ta ena dokona ese unai kara ena hamatamaia ia hereaia noho.” Bema disasta amo ia vara gauna oi laloaboio haraga lasi, do oi mamia emu mauri be anina lasi. To bema mai haheauka ida oi gaukara goada, emu mauri do oi moalelaia lou.

Baibel ia peroveta nega ta “do [ita] taitai lasi, bona lalohisihisi ena boiboi ta do [ita] kamonai lasi.” (Isaia 65:19) Dirava ena Basileia ena lohia henunai tanobada be paradaiso ai ia lao neganai, unai peroveta herevana do ia guguru. (Salamo 37:11, 29) Disasta do idia vara lou lasi. Disasta dainai idia vara lalohisihisi be do idia ore vaitani, badina Siahu ibounai Diravana ia gwauhamata: “Kara gunadia be do idia laloa lou lasi, do idia laloaboio momokani.”—⁠Isaia 65:17.

Mani oi laloa: Havaraia tauna be dala ia karaia “unai amo vaira nega namona bona helaro do [ita] davaria”—⁠Dirava ena lohia henunai mauri namona do ita noholaia. (Ieremia 29:11) Unai hereva momokani oi dibaia karana ese oi ia durua diba emu mauri oi moalelaia totona, a? Sally, matamanai ita herevalaia hahine ia gwau, “Dirava ena Basileia ese vaira negai ita totona do ia karaia gau namodia oi laloa lou neganai, unai ese oi do ia durua oi dekenai idia vara gaudia oi laloaboio bona emu mauri oi moalelaia totona.”

Oi ura Dirava ena Basileia ese taunimanima totona do ia karaia gaudia dekenai diba ma haida oi abia, a? Bema oibe, do oi abia dae diba herevana disasta dainai oi lalohisihisi, to disasta do ia vara lou lasi negana oi naria noho lalonai emu mauri do oi moalelaia diba. To hari, Baibel ena hakaua herevadia ese oi idia durua diba disasta ai oi davaria hisihisi oi haheaukalaia totona. Mani haheitalai haida ita herevalaia.

Oi Idia Durua Diba Baibel Siridia

Oi mahuta namonamo.

“To sedira aniani sisina sibona mai laga-ani danu ena namo ese hekwarahi bada, bona lai lulua kava kara ena namo ia hereaia noho.”—Hadibaia Tauna 4:6.

Tahua gaukara idia karaia taudia idia gwau: “mahuta namonamo lasi karana . . . ese emu lalometau ia habadaia diba bona do ia auka emu hemami oi biagua totona.” Unai dainai, mahuta namonamo karana be mai anina bada.

Emu hemami oi gwauraia hedinarai.

“Laloa metau ese oiemu moale do ia koua, to hereva namodia ese oi idia hamoalea diba.”—Aonega Herevadia 12:25.

Emu famili memba ta eiava emu turana namona ta oi hereva henia. Idia dekenai emu hemami oi gwauraia neganai do idia kamonai namonamo, oi do idia hagoadaia bona durua.a

Vaira nega namona oi laloa.

“[Dirava ena] gwauhamata hegeregerena, ita ese guba matamata bona tanobada matamata ita naria noho, bona unuseniai kara maoromaoro sibona do ia noho.”—2 Petero 3:13.

a Nega daudau lalonai lalohisihisi ia haheaukalaia eiava gau haida dainai ia lalohekwarahi tauna ese doketa edia heduru ia abia be namo.