Oi Lalokau Henia Tauna ta Ia Mase Neganai

“Egu kakana mero ia mase neganai, lau daradoko. Hua haida murinai, ia lau laloa lou neganai lau lalohisihisi, unai be hegeregere kaia ta ese lau ia gwadaia bamona. Nega haida lau badu danu. Bona lau laloa dahaka dainai egu kakana ia mase? Danu ia do mauri neganai, ia ida lau hebamo momo lasi dainai lau lalohisihisi.”—Vanessa, Australia.

BEMA OI lalokau henia tauna ta ia mase vadaeni, reana oi danu be inai bamona hemami oi abia, hebogahisi, sibona oi noho bona oi daradoko. Reana oi badu, lalohisihisi, bona oi gari danu. Eiava oi laloa mauri be anina lasi.

Namona be oi diba ena be nega daudau oi lalohisihisi, to unai be kerere lasi. Unai ese ia hahedinaraia emu lalokau tauna oi laloa bada. To unai ese emu lalohisihisi ia hamaragia diba, a?

LALOHISIHISI HAHEAUKALAIA DALADIA

Reana do oi mamia emu hisihisi ia ore lasi, to henunai idia noho daladia ese oi do ia durua:

OI LALOHISIHISI BE KERERE LASI

Taunimanima ta ta edia lalohisihisi daladia bona idia lalohisihisi ena daudau be idauidau. To, tai karana ese emu lalohisihisi ia hamaragia diba. Vanessa, matamanai ita herevalaia kekenina, ia gwau: “Egu lalohisihisi hamaragia totona, lau tai sibona.” Sofía, ena tadina kekenina ia mase, be ia gwau: “Ia vara gauna lau laloa lou karana ese lau ia hahisia, unai be hegeregere toto ta oi hagoevaia bamona. Ena hisihisi be bada to unai ese toto ia hanamoa diba.”

EMU LALOHADAI BONA HEMAMI OI GWAURAIA HEDINARAI

Momokani, nega haida do oi ura sibona oi noho. To sibona emu lalohisihisi oi huaia karana be hegeregere gau metauna ta oi huaia bamona. Mauri lagani 17 merona, Jared, ena tamana ia mase, be ia gwau: “Egu hemami be ma haida dekenai lau herevalaia. Lau diba lasi lau herevalaia gaudia idia lalopararalaia o lasi, to egu hemami lau herevalaia dainai lau moale.” Matamanai ita herevalaia hahine, Janice, ma ia gwau: “Ma haida ida herevahereva karana ese lau ia durua bada. Lau mamia ma haida ese egu hemami idia lalopararalaia, bona lau be sibona lau noho lasi.”

HEDURU OI ABIA DAE

Doketa hahinena ta, ia gwau: “Mase dainai idia lalohisihisi taudia be edia turadia bona varavara amo heduru idia abia neganai unai ese idia ia durua edia lalohisihisi idia haheaukalaia totona.” Emu turadia dekenai oi idia durua diba daladia oi hadibaia; reana do idia ura oi idia durua to idia diba lasi edena dala ai heduru do idia henia.—Aonega Herevadia 17:17.

DIRAVA KAHIRAKAHIRA OI LAO

Tina ia gwau: “Egu adavana be kensa gorere amo ia mase neganai, ia dekenai egu hekwakwanai, lalohisihisi bona hemami lau gwauraia diba lasi dainai, Dirava dekenai gau ibounai lau gwauraia! Dina ta ta ai Ia lau noia lau do ia durua totona. Dirava ese dala idauidau ai lau ia durua.” Tarsha, ena mauri lagani be 22 neganai, ena sinana ia mase, ia gwau: “Dina ta ta ai Baibel duahia karana ese lau ia durua, mai anina bada gauna ta lau laloa totona.”

TOREISI LOU NEGANA OI PIKSAIA

Tina ma ia gwau: “Matamanai, toreisi lou helarona ese lau ia hagoadaia lasi badina unai negai egu adavana ena heduru lau ura bada—bona egu natudia memero toi be edia tamana idia reaia. To, hari, lagani foa idia ore murinai, unai helaro ese lau ia hagoadaia. Lau dekenai unai be heduru gauna. Ia do lau itaia lou negana lau laloa, bona unai ese lau dekenai maino bona moale ia henia!”

Reana emu lalokau tauna ta ia mase dainai oi abia lalohisihisi do ia ore haraga lasi. To, Vanessa ena ekspiriens ese oi ia hagoadaia diba. Ia gwau: “Oi laloa emu lalohisihisi do ia ore lasi, to metairametaira emu hemami do ia namo.”

Laloatao, ena be emu lalokau tauna do oi reaia, to oi moale diba. Dirava ena lalokau karana dainai, emu hetura karana ia ida bona emu mauri oi moalelaia diba. Bona kahirakahira Dirava ese mase taudia do ia hatorea isi lou. Ia ura oi ese emu lalokau taudia do oi hedavari henia lou. Bena emu kudouna ai ia noho lalohisihisi be do ia ore momokani!

Oi Idia Durua Diba Baibel Siridia

Dirava ese emu lalohisihisi bona mata ranu ia itaia.

Baibel torea tauna ta be Dirava dekenai ia gwau: “Egu matana ena ranu be oiemu kavabu dekenai do oi udaia. Oiemu buka lalonai idia torea vadaeni, ani?”—Salamo 56:8.

Dirava dekenai emu hemami oi gwauraia diba.

“Egu lalohisihisi bona hekwarahi gaudia, be . . . [Dirava] vairana dekenai lau gwauraia noho. [Iehova] e,a oi dekenai lau tai henia noho.”—Salamo 142:2, 5.

Oi be mai emu helaro.

“Mase taudia dohore idia toreisi lou.”—Kara 24:15.

Dirava ia gwauhamata idia mase vadaeni taudia momo do ia hatorea isi lou, bona ia ura dikadika unai do ia karaia.b—Iobu 14:14, 15.

a Baibel ese ia hahedinaraia Iehova be Dirava ena ladana.

b Toreisi lou herevana dekenai diba ma haida abia totona, Mauri Moalelaia Hanaihanai! bukana ena leseni 30 oi itaia. Ia be Iehova ena Witnes taudia ese idia halasia bona www.jw.org ai oi daonloud diba davana lasi.