Headava Tau Eiava Hahine ta Ia Heudahanai Neganai

“Egu tau ia gwau lau do ia rakatania bona kekeni matamata ta do ia adavaia neganai, lau mamia lau ura mase. Ia be sibona ia laloa, to ia totona lau karaia gau namodia ia laloa lasi.”—Maria, Spain.

“Egu hahine be lau ia rakatania neganai, lau mamia egu tauanina ena kahana ta ia mase. Emai palani ibounai idia dika. Nega haida lau laloa egu lalohisihisi ia ore, to gabeai lau lalohisihisi lou.”—Bill, Spain.

HEADAVA tau o hahine ia lalohisihisi diba bema ena adavana be tau o hahine ma ta ida ia heudahanai. Momokani, tau eiava hahine haida be edia adavana ena dika idia gwauatao bona edia headava idia hanamoa lou.a Ena be edia headava idia hanamoa o lasi, to ia heudahanai tau eiava hahine ena adavana be hanaihanai do ia lalohisihisi bada. Unai bamona taudia be edena dala ai edia lalohisihisi idia haheaukalaia diba?

OI IA DURUA DIBA BAIBEL SIRIDIA

Edia adavana idia heudahanai dainai idia lalohisihisi tau eiava hahine momo be Baibel amo heduru idia abia. Idia diba Dirava ese edia taitai ia itaia bona idia dekenai ia hebogahisi.—Malaki 2:13-16.

“Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.”—Salamo 94:19.

Bill ia gwau: “Unai siri lau duahia neganai, lau mamia Iehova be mai lalokau ida hebogahisi tamana ta bamona lau ia hagoadaia.”

“Kara maoromaoro tauna dekenai, kara maoromaoro oi henia noho.”—Salamo 18:25.

Carmen, ena adavana be hua momo lalonai hahine ma ta ida ia heudahanai, ia gwau: “Ena be egu adavana ia heudahanai, to lau abia dae Iehova ese lau do ia durua. Ia ese lau do ia rakatania lasi.”

“Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, . . . Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna . . . do ia gimaia.”—Filipi 4:6, 7.

Sasha ia gwau: “Unai siridia lau duahia loulou. Nega momo lau guriguri dainai, Dirava ese lau dekenai maino ia henia.”

Ataiai ita herevalaia taudia ibounai idia mamia edia mauri be anina lasi. To Iehova Dirava idia abidadama henia bona Baibel duahia karana ese idia ia hagoadaia. Bill ia gwau: “Ena be egu headava ia dika, to egu abidadama karana ese lau ia durua egu mauri lau moalelaia noho totona. Herevana ‘lau be mase ena dibura koura gabuna, dekenai . . . lau raka lao,’ to Dirava be lau ida ia noho.”—Salamo 23:4.

a Tau eiava hahine ese ena adavana do ia gwauatao eiava lasi karana dekenai hereva ma haida dibaia totona, April 22, 1999 Awake! ena atikol ladana, “When a Mate Is Unfaithful” itaia.

Dahaka ese Oi Ia Durua Diba Oi Haheauka Totona?

Oi do ia hagoadaia siridia oi laloa dobu.

Bill ia gwau: “Lau ese Iobu bona Salamo bukana lau duahia, bona lau davaria hekwakwanai ida idia hegeregere herevadia lau makaia. Lau laloparara Baibel idia torea taudia ese lau davaria hisihisi bona lalometau idia mamia danu.”

Miusiki oi kamonai.

Carmen ma ia gwau, “Hanuaboi ai lau mahuta diba lasi neganai, miusiki lau kamonai bona unai ese lau ia durua bada.” Daniel ia gwau: “Lau be gita gadaralaia dalana lau dibaia, bona ena miusiki ese lau ia durua lalomaino lau abia totona.”

Ma haida dekenai emu hemami oi gwauraia hedinarai.

Daniel ia gwau: “Lau manada lasi ma haida dekenai egu hemami lau gwauraia hedinarai totona. To lau be mai egu tura namodia haida bona hanaihanai idia ida lau herevahereva. Revareva bona herevahereva karana amo idia dekenai egu hemami lau gwauraia. Unai ese lau ia durua bada.” Sasha ia gwau: “Egu famili edia heduru ese lau ia durua bada. Egu sinana be hanaihanai ia noho hegaegae lau ia durua totona. Lau ura hereva henia neganai, nega ia atoa bona egu hereva ia kamonai. Danu egu tamana ese lau ia laloa bada, bona lau ia durua egu hekwakwanai lau haheaukalaia totona.”

Hanaihanai oi guriguri.

Carmen ia gwau: “Hanaihanai lau guriguri. Bona lau mamia Dirava be lau ia rakatania lasi, lau ia kamonai henia, bona lau ia durua. Unai nega aukadia lalonai, lau be Dirava kahirakahira lau noho.”