Henanadai Mauana

◼ Pablik tok ena seamani ese edena bamona dala ia badinaia be namo?

Pablik tok ena seamani ena gaukara be helai taudia ia welkam henidia bona ia hanamodia bona program ena heau namonamo dalana ia naria. Unai dainai, unai gaudia ia gwauraia namonamo totona iena hereva ia hegaegaelaia guna be namo. Hereva kwadogina ia gwauraia be gau badana. Welkam hereva kwadogina murinai, nega momo ane idia abia, unai murinai be guriguri. Nega momo seamani ese guriguri ia henia be maoro, to bema tadikaka ta ese do ia henia, namona be ia idia hadibaia guna be namo. Bena seamani ese pablik tok ena hereva kwarana bona hereva henia tauna ia gwauraia hedinarai. Hebou idia mai taudia idia diba unai be tomadiho ena hebou ta dainai, hereva ia henia tauna be Iehova ena Witnes tauna, bona ia be hesiai tauna ta dainai, ia be “Tadikaka ———” bamona idia gwauraia hedinarai be maoro. Bema hereva henia tauna be vadivadi tauna, seamani ese unai tadikaka ia lao henia kongregesen ia gwauraia diba. Hereva ia henia tauna ena diba, bona hereva ia henia ena daudau ia gwauraia be anina lasi. Gau badana be, hereva ena sinado ia gwauraia hedinarai goevagoeva be namo, unai amo helai taudia ese idia lalo-pararalaia namonamo diba.

Pablik tok ia ore murinai, seamani ena hereva danu ia kwadogi be namo. Vaira pura ena pablik tok ena sinado ia gwauraia diba bona helai taudia ia boiria danu idia mai lou totona. Bema pablik tok murinai be Gima Kohorona stadi, stadi herevana ena sinado ia gwauraia bona kamonai taudia ia hagoadaia do idia noho bona unai idia moalelaia.

Seamani ena hereva ia kwadogi, unai amo hereva henia tauna ena hamatamaia herevana bona hereva dokona edia anina ia haidaua lasi eiava ena hereva hegeregerena ia hereva lasi. Helai taudia be pablik tok henia tauna ena hereva idia kamonai totona idia mai, bona seamani ena hereva ese hebou ena ore negana ia hanaia lasi.