Henanadai Mauana

● Ruma bese ena Baibel stadi eiava gwauhamata Keristani taudia edia bapatiso lasi natudia ida stadi ita karaia neganai, ripoti dekenai dahaka do ita torea?

Gwauhamata Keristani tama sina ese edia natudia dekenai Iehova ena dala idia hadibaia ena maduna idia huaia totona edia nega bona goada bada do idia gaukaralaia. (Deut. 6:​6, 7; Ef. 6:4) Herevana unai nega ibounai be ripoti dekenai idia torea eiava lasi, to tama sina edia maduna be bada.

Kongregesen ena haroro gaukara ena ripoti idia gogoa ena badina be haroro gaukara bona hereva momokani be gwauhamata bona bapatiso lasi Witnes taudia dekenai ita hadibaia gaukarana idia heau dalana ia hahedinaraia totona. (Mat. 24:14; 28:​19, 20) To, bema gwauhamata Keristani tama eiava sina ese hanaihanai ruma bese ena Baibel stadi ia karaia bona bapatiso lasi natudia idia noho, ia be pura ta ta lalonai hora tamona bona lou henia tamona ia torea diba, bona hua dokona dekenai Baibel stadi tamona ia torea diba. Ena be pura tamona lalonai stadi ena nega be hora tamona ia hanaia eiava stadi be nega haida idia karaia, to ripoti dekenai hora tamona bona lou henia tamona sibona ia torea. Ena be natudia dekenai stadi ma haida idia karaia eiava nega idia atoa natudia ta ta idia hadibaia totona, to unai be ripoti dekenai idia torea lasi, badina tamana o sinana ta be unai ia karaia ena badina be mai momokani ida ia ura natudia dekenai Dirava badinaia dalana ia hadibaia.​—Aon. 22:6.

Bema tama sina be heduru idia tahua, edia natudia ese edia kudouna dekenai hereva momokani idia abia dae totona, dahaka idia karaia be namo? Idia ese ma haida edia heduru idia tahua diba. Bema idia ura ma pablisa ta ese unai bamona heduru ia henia, namona be kongregesen ena gunalaia tauna eiava haroro naria tauna ida unai idia herevalaia. Bema tama sina be matamata hereva momokani lalonai eiava badina ma ta dainai heduru idia abia bona pablisa ta ese edia natudia ida Baibel stadi ia karaia be namo, unai idia karaia diba. Unai neganai, bema natudia be bapatiso lasi taudia, stadi naria tauna be hora, lou henia, bona stadi be ripoti dekenai ia torea diba.​—Iseda Basileia Gaukara, February 1980, rau 10, “Emu Ruma Bese Lalonai Oi Sibona be Hereva Momokani Lalonai Oi Noho, A?” itaia.