Sivarai Namona Harorolaia—Iehova Ena Lauma Helaga Ena Heduru Amo
1 Basileia hesiai gaukara lalonai ita kwalimu totona, gau badana be Iehova ese ita ia durua bona iseda gaukara ia hanamoa. Iehova ena lauma helaga ena heduru ita abia totona, gau badana be iseda guriguri amo Iehova ita noia, badina Iesu ese ena hahediba taudia ia hamaorodia, Dirava ese ia idia noia taudia ena lauma helaga do ia henidia.—Luka 11:13.
2 Taunimanima haida dekenai ita haroro gwauraia neganai, reana do ita laloa namona be ita hegaegae namonamo guna. (Korinto Ginigunana 2:1-5 itaia.) To, bema Dirava ena lauma helaga ita noinoilaia, unai lauma helaga ese ita do ia durua hereva momokani ita gwauraia maoromaoro bona goevagoeva totona.
3 Lauma helaga ese ita do ia durua, hereva momokani be “taunimanima ibounai” dekenai gari lasi dekenai do ita gwauraia hedinarai totona. (1 Tim. 2:3, 4; 1 Tes. 2:2) To, ita gari lasi ena anina be taunimanima ita haroro henidia neganai ita hereva auka eiava ita doridia, a? Lasi momokani.
LAUMA HELAGA ENA HUAHUA HAVARAIA
4 Aposetolo Petro ia gwau, ita haroro neganai, namona be “mai hemataurai bona manau danu” ita hereva. (1 Pet. 3:15) Manau be lauma helaga ena huahua ta, bona ruma taudia be ita idia badu henia neganai, unai kara ita hahedinaraia be gau badana. Lauma helaga ena huahua ma haida ese ita do idia durua, hekwakwanai idauidau ita haheaukalaia totona. (Gal. 5:22, 23) Taunimanima ese iseda haroro idia dadaraia neganai, namona be ita diba ita idia dadaraia lasi, to, reana ita gwauraia sivaraina ena namo idia lalo-pararalaia lasi. Unai lalohadai ita abia neganai, heduru do ita abia manau bona hemataurai ita hahedinaraia totona. Ruma tauna ita rakatania neganai, bema dala ia noho, namona be hanamoa herevana ta be ia dekenai ita gwauraia. Reana unai ese badu tauna ena lalona do ia hakerua.—Her. 15:1.
5 Ruma ta ruma ta gaukara ita karaia o dala dekenai ita haroro neganai, taunimanima ese iseda kara idia itaia. Iseda hereva bona kara be nega ibounai idia namo bona taunimanima idia maumauraia diba lasi be gau badana. Taunimanima haida ese iseda haroro gaukara idia dadaraia. Idia momo idia ura lasi idia kamonai. To, namona be ita lalohisihisi lasi. Namona be ita laloatao, mamoe bamona taudia ita tahudia noho. (Mat. 10:12-14) Haroro gaukara ita karaia neganai, namona be iseda kara namo amo Dirava ita hanamoa, iena lauma helaga amo ia mai huahuadia be ita dekenai idia hedinarai dainai. Bema taunimanima ita kara namo henidia bona edia namo ita laloa, reana idia haida edia kudouna do ita hamarerea diba.—2 Kor. 6:3.
6 Bema ruma tauna ia bisi momokani, reana hereva momo ita gwauraia diba lasi. To, unai ruma tauna ita laloa dainai, reana gabeai, Witness tauna ta ia mai haroro neganai, do ia ura kamonai. Dirava ena lauma ese ita do ia durua, lalokau, haheauka, bona hebogahisi ita hahedinaraia totona. Ita moale, badina Dirava ena hebogahisi dainai taunimanima momo ese Bible ena sivarai idia kamonaia diba, bona unai dala amo idia haida be gabeai Bible ena hereva idia abia dae.—1 Kor. 13:4.
7 Bema dala ita kehoa Dirava ena lauma helaga ese iseda gaukara ia biagua totona, Basileia sivaraina ita gwauraia neganai, kudou-maoro taudia, Dirava habadua garina idia gari taudia, do idia kamonai mai edia ura danu. Namona be ita hekwarahi ‘hairai bona mataurai Sivarai Namona dekenai ita havaraia’ totona.
[Questions]
1. (a) Luka 11:13 ena hereva ese Keristen taudia dekenai dahaka ia gwauhamatalaia? (b) Dahaka dainai Dirava ena lauma helaga be gau badana, haroro gaukara ita karaia neganai?
2. (a) Paulo ese Korinto kongregesen ia vadivadi henia neganai, iena lalohadai be dahaka? (b) Bema Iehova ita noia, ita ta ta dekenai dahaka do ia henia?
3. “Taunimanima ibounai” ita haroro henidia neganai, 1 Timoteo 2:3, 4 ena hereva be edena bamona ita ia durua? Bema dubu naria tauna ta o gavamani ena tau badana ta dekenai ita haroro, dahaka dainai ita gari lasi be namo?
4. (a) Taunimanima ese ita idia badu henia neganai, dahaka ese ita do ia durua, manau bona hemataurai ita hahedinaraia totona? (b) Hereva Lada-isidia 15:1 ena sisiba namona be dahaka?
5. (a) Dahaka dainai haroro gaukara ita karaia neganai, taunimanima ita kara namo henidia be namo? (b) Bema taunimanima ese iseda haroro idia dadaraia, dahaka dainai ita lalohisihisi bada lasi be namo? (c) Korinto Iharuana 6:3 ena hereva hegeregerena, dahaka dainai namona be nega ibounai ita hekwarahi kara namodia karaia totona bona hereva namodia gwauraia totona?
6. Hari inai nega lalonai, Iehova ese taunimanima dekenai lalokau bona haheauka be edena dalai ia hahedinaraia?
7. Ita be Keristen taudia dainai, ita hekwarahi dahaka ita karaia totona? Edena bamona ita karaia diba?
This article is repeated in km 10/92.