Gima Kohorona bona Noga! Edia Heduru

¹ Idia ese Bible ena peroveta hereva hamomokania gaudia idia gwauraia. Idia be tanobada dekenai idia vara gaudia edia anina idia hahedinaraia. Idia ese Bible idia abia isi bona hari idia vara hekwakwanai ita haheaukalaia dalana idia gwauraia. Bona mai anina bada gauna be inai, idia ese ita idia hagoadaia Iehova be Dirava momokanina tamona ita abidadama henia totona, bona tanobada dekenai iena orea momokanina idia hahedinaraia. Unai idia karaia gaudia be Gima Kohorona bona Noga! magasin. Unai magasin edia heduru herevadia oi tahua namonamo, a?

ITA IDIA DURUA DALANA

² Ita siboda eda magasin sabskripsen ita abia neganai, ita diba unai magasin do ita abia haraga, bona unai neganai magasin edia hereva ita tahua namonamo guna diba bena gabeai haroro gaukara dekenai do ita hariharilaidia. Unai magasin be nega korikori dekenai idia siaia, hua ta ta iboudiai magasin rua rua idia siaia, unai dainai lauma aniani be hanaihanai ia noho, bona nega ia noho oi duahidia totona. Bema sabskripsen oi do abia lasi, namona be oi laloa namonamo bona hari pura lalonai oi abia.

³ Oiemu sabskripsen ena magasin ta ta idia mai neganai, oi ura diba dahaka sivarai idia noho. To dahaka do oi karaia? Unai magasin ena hereva badadia bona laulaudia sibona oi itaia, eiava maoromaoro oi helai bona ena sivarai tamona eiava rua oi duahia, bona emu nega ia hegeregere neganai sivarai oredia do oi duahia, a?

⁴ Nega haida Gima Kohorona magasin lalonai lalohadai matamatana ta, kara idauna, eiava kongregesen ena kara matamatana ta idia torea hedinarai. Mai anina bada herevadia be magasin ena stadi herevana sibona lalonai lasi, to magasin ena sivarai ma haida lalonai danu. Hereva matamatana ta eiava hereva badana ta oi itaia neganai, oi makaia gabeai do oi davaria diba totona, a? Unai magasin ta ta iboudiai oi haboudia oiemu laiberi lalonai oi atodia totona, a? Bema unai bamona oi karaia, unai ese ia hahedinaraia oi ese Gima Kohorona bona Noga! magasin edia hagoadaia herevadia oi laloa bada.

⁵ Papua New Guinea dekenai Gima Kohorona magasin be gado toi dekenai idia karaia bona edia kala be hani, bona tanobada ibounai hegeregerena idia halasia hebou. Unai dainai namona be nega ibounai dala ita tahua taunimanima iboudiai dekenai ita hariharilaidia totona. Danu, namona be kongregesen taudia iboudiai ese sibodia edia Gima Kohorona magasin idia abia bona Gima Kohorona stadi totona idia hegaegaelaia. Stadi lalonai natudia maragi danu be sibodia edia magasin idia abia be heduru gauna idia dekenai. Gima Kohorona ena laulau ese tama sina bona natudia danu idia durudia. Badina unai laulau ese magasin ena hereva badadia idia hahedinaraia.

⁶ Magasin ta ta iboudiai ita gaukaralaidia namonamo be gau badana. Bema edia namo ita laloa bada, bona edia sivarai iboudiai ita duahidia, mai iseda lalona ibounai bona mai iseda moale danu taunimanima dekenai do ita henidia toho. Tanobada ena magasin iboudiai amo Gima Kohorona bona Noga! magasin sibodia ese mauri dalana idia hahedinaraia.