Bible Stadi Taudia Durudia, Hebou Dekenai Idia Haere Totona
1 Ita moale bada herea, Bible stadi tauna ta be Kingdom Hall dekenai ia haere matamaia neganai! Ita moale badina unai ese ia hahedinaraia unai Bible stadi tauna ese hereva momokani ia goadalaia. Namona be Bible stadi taudia idia diba hebou dekenai idia haere be gau badana. Unai amo edia abidadama idia hahedinaraia diba, bona unai be hahemauri davaria dalana.—Roma 10:10.
2 Iesu ia gwau: ‘Diba tahua tauna ese ia hadibaia tauna danu do ia hegeregere.’ (Luka 6:40) Vadaeni, unai siri ese ia hahedinaraia, hebou dekenai ita haere neganai, unai ese stadi taudia dekenai haere dalana ia hahedinaraia. Namona be ita durudia bena do idia diba bema aonega idia abia guna, gabeai idia haere namonamo diba. Ita hadibadia, namona be stadi amo idia dibaia gaudia be hebou dekenai, haroro gaukara dekenai, bona edia mauri lalonai idia gaukaralaia be namo.
3 Reana stadi matamata taudia haida idia do haere lasi, badina idia laloa haere dalana namona, haida idia karaia hegeregerena, idia do diba namonamo lasi. To, namona be hereva kwadogi maorona ita gwauraia, unai neganai Bible stadi taudia do idia diba, edia haere kwadogidia danu do idia hegeregere. Namona be ita durudia henanadai edia anina idia tahua namonamo totona, paragraf lalonai haere idia davaria totona, bona sibodia edia hereva amo do idia haere totona. Paragraf dekenai idia torea Bible siridia edia anina unai paragraf ena hereva badana dekenai idia dibaia be mai anina bada danu. Namona be ita durudia paragraf dekenai idia torea Bible siridia idia gaukaralaia edia haere hamomokanidia totona. Namona be ita hadibadia hereva badadia idia makaia totona, bona paragraf badinai heduru herevadia idia toredia totona. Ita hadibadia, haere idia henia neganai, idia hereva badabada bona goevagoeva be namo, helai taudia iboudiai idia kamonai bona heduru idia abia totona. Bema idia hegaegae namonamo, haere henia garina do idia gari lasi.
4 Ma dahaka ita karaia diba, stadi matamata taudia ita durudia idia haere totona? Namona be idia badinai ita helai. Reana ita hamaorodia namona be vaira kahana dekenai ita helai, ma gau ta ese edia lalona ia veria garina. Ita hadibadia edena henanadai be haere kwadogina amo idia haerelaia diba totona.
5 Kongregesen Buka Stadi naria tauna ese ena grup dekenai stadi matamata tauna ia dibaia neganai, do ia hamaoroa diba Bible sirina ta ia duahia totona. Stadi murinai, unai tau do ia hanamoa unai siri ia duahia dainai, unai dala amo do ia hagoadaia, buka stadi dekenai ma ia haere lou totona. Bona gabeai hebou ma haida dekenai do ia ura haere danu.
6 Hebou dekenai haere ita henia be kara namona. (Heb. 10:24, 25) Stadi matamata taudia be unai idia diba be namo. Haere idia henia neganai kongregesen taudia iboudiai idia hagoadaia bona idia durudia. Haroro gaukara dekenai, eiava hebou dekenai, ita be Heberu 13:15 ena hereva hegeregerena ita karaia diba, ia gwau: “Dirava do ita hanamoa, Iesu ena ladana dainai. . . . Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.”
[Questions]
1. (a) Dahaka dainai ita moale, Bible stadi tauna be Kingdom Hall dekenai ia haere matamaia neganai? (b) Dahaka ese ia hahedinaraia unai ia karaia be gau badana?
2. (a) Luka 6:40 dekenai hadibaia taudia totona dahaka sisiba ia noho? (b) Bible stadi tauna ita durua ena diba habadaia totona ena badina toi be dahaka?
3. (a) Hadibaia tauna be stadi matamata tauna edena bamona ia durua diba haere ia henia totona? (b) Namona be stadi matamata tauna ese dahaka ia karaia ia stadilaia bukana dekenai? (c) Dahaka dainai stadi tauna ita hadibaia, haere ia henia neganai, namona be ia hereva badabada? Edena bamona unai oi hadibaia diba? (d) Dahaka oi karaia diba haere garina ia gari tauna oi durua totona?
4. Dahaka dainai hebou dekenai emui Bible stadi tauna ida vairana kahanai umui helai be namo?
5. Buka stadi naria tauna be matamata tauna edena bamona ia durua, haere ia henia hamatamaia totona?
6. Heberu 13:15 ena hereva hegeregerena, stadi matamata taudia ita durudia dahaka do idia karaia totona? Haere idia henia neganai, unai be edena bamona ia durudia? Edena bamona ita ia durua?