Kongregesen Heboudia ese Iseda Natudia Idia Durudia
1 Dirava ese inai hahegani be Israel besena ia henia: “Taunimanima oi haboudia, tatau bona hahine bona maragidia . . . idia kamonai bona idia diba totona.” (Deut. 31:12) Oibe, memero kekeni, natu maragidia danu, be Israel taudia edia tomadiho heboudia dekenai idia lao. Unai hegeregerena, hari inai negai, Iehova ena Witness taudia edia hebou ese natudia idia durudia danu.—Sal. 148:1, 12.
2 Momokani, gau momo ese natudia edia matana idia veria haraga diba. Namona be tama sina ese hereva kamonai henia namonamo dalana be natudia dekenai idia hadibaia. Danu, hebou lalonai idia gwauraia herevadia haida idia auka dainai, namona be heduru idia abia unai hereva dekenai do idia lalo-parara totona. Henunai heduru herevadia ai torea natudia be kongregesen heboudia amo heduru idia abia totona.
HEBOU HEGAEGAELAIA
3 Bema tama sina be ruma dekenai edia natudia idia hadibaia namonamo, natudia do idia diba, ma taunimanima haida ida idia hebou Iehova do idia tomadiho henia totona be hahenamo badana ta. Namona be tama sina ese edia natudia idia durudia, do idia lalo-parara, kongregesen ena hebou dekenai idia lao be Dirava ena ura, bona bema Dirava idia kamonai henia, namo do idia davaria. Ena be natuna ia maragi momokani, to tama sina ese idia durua, bena do ia lalo-parara kongregesen ena hebou be ia totona danu.—Sal. 133:1; Isa. 48:17; Mat. 19:14.
4 Bema natuna ta ese sibona ena stadi lalonai hebou totona ia hegaegae, hebou do ia moalelaia bada. Natudia be sibodia edia Bible, ane buka, bona stadi bukadia ma haida idia abia be namo. Namona be tama sina ese edia natudia idia durua, hebou negadia iboudiai hereva haida do idia hegaegaelaia totona. (Heb. 10:23) Tamadia bona sinadia ese edia natudia be unai bamona idia durudia neganai, namona be natudia edia diba hegeregerena idia karaia. Namona be ruma bese taudia iboudiai, natudia danu, ese nega idia atoa, hebou ena hereva do idia hegaegaelaia totona.—Heb. 13:15.
5 Tama sina ese gaukara haida be edia natudia idia henia neganai, unai ese natudia ia durudia. Bema idia maragi sisina, pepa dekenai Dirava ena ladana, eiava Basileia, eiava Bible ena hereva ma ta be hebou lalonai idia gwauraia o idia herevalaia negadia iboudiai idia torea diba, bona unai amo do idia moale. Idia bada sisina natudia be hebou lalonai idia duahia eiava idia gwauraia Bible siridia iboudiai be lisi dekenai idia torea diba. Herevana tama sina ese edia natudia dekenai dahaka gaukara idia henidia, to bema natudia idia gaukara goadagoada namona be idia hanamodia, unai ese do ia durudia bada. Reana, gabeai, tama sina ese edia natudia do idia noia, hebou lalonai idia dibaia gaudia do idia herevalaia, eiava do idia gwauraia hedinarai hebou ena hereva badadia be edena bamona idia moalelaia.
6 Namona be duahiduahi idia diba natudia iboudiai idia hagoadadia bona idia durudia, sediual do idia karaia bena sibona idia noho neganai Society ena buka, buklet bona magasin do idia duahia. Natuna ena diba hegeregerena, reana ena sediual lalonai nega do ia atoa, Lau Egu Bible Sivarai Buka, Hadibaia Tauna Badana bukana, Tau Hereadaena bukana, Memero Kekeni bukana bona magasin edia hereva haida do ia duahia totona. Unai bamona sediual ese memero kekeni do ia durudia Society ena buka, buklet, bona magasin matamatadia do ia duahia haraga totona.
DABUA BONA KARA
7 Keristen heboudia dekenai idia vadivadi taudia momo ese iseda memero kekeni edia dabua bona edia kara idia itaia neganai idia moale. Natuna be hebou dekenai ia mai neganai, bema dabua namodia ia karaia, hebou dekenai hemataurai do ia hahedinaraia. To, bema ena dabua idia namo momokani lasi, hebou lalonai reana do ia gwau-edeede. Society ena branch opesi dekenai ita vadivadi neganai, namona be natudia bona taunimanima badadia danu ese dabua namodia idia karaia, hebou dekenai idia karaia dabuadia hegeregerena.
8 Hebou dekenai iseda natudia edia kara idia namo neganai, unai ese Iehova ena ladana ia abia isi bona ia hanamoa. Unai dainai namona be tama sina idia lalo-parara, hebou dekenai edia natudia idia biagua namonamo be gau badana. Mai edia aonega tamadia bona sinadia ese dala do idia karaia, ruma bese taudia be hebou lalonai do idia helai hebou totona, bona nega ibounai edia natudia ese hemataurai karana do idia hahedinaraia totona. Heduru hereva ma haida do idia abia totona, namona be edia natudia idia biagua namonamo tamadia bona sinadia ida do idia herevahereva hebou.
9 Ita ura iseda natudia be Keristen hebou lalodiai do idia vareai momokani bona taunimanima ‘ta ta dekenai durua henia daladia do idia laloa noho. Unai bamona lalokau dekena amo kara namodia do idia karaia.’ (Heb. 10:24) Iehova Dirava ena orea lalonai, kongregesen ena hebou ese natudia danu idia durudia.
[Questions]
1. (a) Deuteronomi 31:12 ena hereva hegeregerena, daidia be hebou dekenai idia lao be gau badana? (b) Salamo 148:1, 12 ena hereva hegeregerena, daidia ese Iehova idia hanamoa be namo? Hebou lalonai unai be edena bamona ita karaia diba?
2. Gau momo ese natudia edia matana idia veria haraga diba dainai, tama sina be edena bamona edia natudia idia durua diba?
3. (a) Namona be edena negai bona edena gabu dekenai natudia idia hadibaia kongregesen heboudia be mai anina bada? (b) Dirava ena ura natudia dekenai be dahaka?
4. (a) Heberu 13:15 ena hereva hegeregerena, tamadia, sinadia, bona maragidia ese dahaka do idia karaia be namo? Edena negai unai idia karaia be namo? (b) Hebou edia heduru ibounai do idia abia totona, namona be natudia ta ta iboudiai ese dahaka idia abia, sibodia edia?
5, 6. Dahaka kara dainai, tama sina ese edia natudia idia hanamoa be namo?
7. Natudia be hebou dekenai idia mai neganai, bema dabua namodia idia karaia, vadaeni, hebou lalonai edia kara be do edena bamona?
8, 9. Hebou dekenai tama sina idia laloa bada gauna ta be dahaka? Badina be dahaka ruma bese tamona ena taudia iboudiai idia helai hebou be namo?