Dirava Ena Hereva Dekenai Emu Abidadama Oi Habadaia
1 Hari inai negai abidadama goadana ita abia be gau badana. Taunimanima momo herea be abidadama lasi taudia bona dina vairai totona edia helaro be lasi. Nega momo tomadiho orea bona politikol orea edia gunalaia taudia idia gwauraia herevadia be helaro koikoi, unai dainai taunimanima momo idia gwau helaro namona ta be lasi. Momokani, aposetolo Paulo ia gwauraia bamona, “haida sibona mo Dirava ena hereva idia abia dae.” (2 Tes. 3:2) To, Iehova ena Witness taudia be mai edia abidadama. Ita diba momokani Dirava ena Hereva lalonai ia gwauraia gwauhamatadia do idia guguru momokani.
2 Iehova ena Witness taudia edia abidadama be ia goada dainai, taunimanima edia amo idia be idau. Unai abidadama dainai kara namodia ita karaia bona taunimanima ma haida bona ita danu namo ita davaria, bona Iehova ena ladana ita hanamoa danu. Unai bamona abidadama ita abia badina iseda mauri lalonai Dirava ena Hereva ita badinaia dainai. Hari inai negai, tanobada ibounai lalonai Keristen momokani taudia edia orea tamona ese ia hahedinaraia bema Bible ita abidadama henia, bona ita gwau Dirava be ena lauma helaga siahuna amo ia havaraia, namo do ita davaria.—2 Tim. 3:16.
DAHAKA DAINAI HAIDA ITA DURUDIA EDIA ABIDADAMA IDIA HABADAIA TOTONA BE NAMO?
3 Ita ura dikadika taunimanima ma haida ita durudia edia abidadama idia habadaia totona, badina unai amo do idia mauri diba. Bible lalonai aonega hereva be momo bona ia be mai ena siahu taunimanima edia mauri dalana ia haidaua kara namo do idia karaia totona. Unai bona ma gau haida ese idia hamomokania Bible be Dirava ena Hereva. Iseda maduna be taunimanima ita durudia Bible hamomokania herevadia idia diba totona. Unai bamona ita karaia totona, gau badana be guna idia ita hadibaia Bible ena hereva idia abidadama henia totona.
4 Dahaka ese ita momo ia durua vadaeni Dirava ena Hereva dekenai abidadama ita habadaia totona? Reana ta ese mai haheauka danu ita dekenai Bible stadi ia karaia. Unai dainai, taunimanima ta dekenai Bible eiava buka ta ita hariharilaia neganai, unai be abidadama habadaia gaukara ena dokona lasi, to ia be abidadama habadaia gaukara ginigunana. Guna, ta ese ita dekenai Bible stadi ia karaia bona unai amo namo ita davaria, unai dainai, taunimanima dekenai buka eiava magasin ita hariharilaia neganai, namona be ita lou henidia haraga bena idia dekenai Bible stadi ita hamatamaia toho bona ita durudia edia abidadama idia habadaia totona.
5 Ita ura taunimanima ma haida ita durudia bena do idia abia dae Bible be Dirava ena Hereva, bona edia mauri lalonai Dirava ena lauma helaga siahuna amo Bible dekenai idia torea sisibana idia badinaia totona. Unai bamona idia karaia taudia be mai moale danu salamo tauna ia gwauraia gurigurina idia karaia, ena kudouna ibounai ida ia gwau: “Mani oi itaia oiemu hahegani lau lalokau henidia. Iehova e, oiemu hebogahisi lalokauna amo lau oi hamauria. Oiemu hereva ena anina be momokani, bona oiemu hahemaoro maoromaorodia iboudiai dohore idia noho ela bona gwauraia lasi neganai.”—Salamo 119:159, 160.
6 Iena Hereva, Bible, dekena amo, Iehova ese mai lalokau danu hahemauri dalana ia kehoa bona ia naridia dalana idia abia dae taudia be ‘hisihisi badana’ amo do idia roho mauri diba. (Mat. 24:21) February lalonai Society ena buka ta do ita hariharilaia neganai, taunimanima ma haida do ita hagoadaia diba Dirava ena Hereva idia duahia bona idia stadilaia totona.
[Questions]
1. (a) Dahaka dainai taunimanima momo be idia abidadama lasi? (b) Iehova ena Witness taudia be edena bamona abidadama lasi taudia amo idia idau?
2. Iehova ena Witness taudia edia abidadama goadana dainai idia davaria hahenamo badadia haida be dahaka? Timoteo Iharuana 3:16 ena hereva amo dahaka ita diba?
3. (a) Bible be Dirava ena Hereva ia hamomokania gauna ta be dahaka? (b) Iehova ena Witness taudia edia maduna be dahaka? Edena bamona unai ita karaia diba?
4. (a) Dahaka ese ita momo ia durua Dirava ena Hereva dekenai abidadama ita habadaia totona? (b) Unai ese ita ia doria dahaka do ita karaia totona?
5, 6. (a) Salamo 119:159, 160 dekenai salamo torea tauna ia guriguri neganai, mai kudouna ibounai amo ia gwauraia tanikiu herevana be dahaka gau dainai ia gwauraia? (b) Dahaka dainai haida be ‘hisihisi badana’ amo hahemauri do idia abia?