Gari Lasi Dekenai Ita Hamaorodia Idia “Mai”
1 Hari inai negai, tanobada dekenai idia vara gaudia dainai ita diba ita be “nega dokonai” ita noho. (2 Tim. 3:1-5) Raskol karadia idia bada idia lao dainai, bisinesi momo idia moru dainai, bona taunimanima idia hamasea gorere dikadia dainai taunimanima idia lalo-metau. Ena be unai dika idia davaria, to moale gauna be inai, taunimanima ita hamaorodia namo hanaihanai gauna do idia abia diba. Lauma helaga bona headava matamata hahine idia gwau noho: “Oi mai.” Bona hari, gabu ibounai dekenai taunimanima “hutuma bada herea” ese idia durudia ma taunimanima haida idia hamaorodia do idia mai bona mauri ena ranu davana lasi do idia abia totona.—Apok. 7:9; 22:17.
2 Hari inai negai, kara maoromaoro dekenai idia ranu mase taudia momo herea ese ita harorolaia herevana idia kamonai henia noho. Lagani gunanai, tanobada hegegemadai taunimanima milion momo be distrik hebouheboudia dekenai idia lao, bona kahirakahira taunimanima 10,000,000 be Memorial heboudia dekenai idia lao. Ma taunimanima milion momo be Basileia ena sivarai idia kamonai henia dainai, idia hahedinaraia Iehova ese ia henia gaudia idia moalelaia. Vadaeni, gau badana be iseda nega do ita gaukaralaia namonamo unai sivarai be taunimanima vairanai bona ruma ta ruma ta dekenai ita harorolaia totona!—Kara 5:42; Ef. 5:15, 16.
GARI LASI DEKENAI KARAIA
3 Keristen taudia ginigunadia ese mai goada danu idia haroro dainai dagedage idia davaria. (Kara 16:19-21; 17:2-8) To, gari lasi dekenai sivarai namona idia harorolaia goadagoada noho. Idia hegeregeredia, namona be gari lasi dekenai ita goada karaia sivarai namona harorolaia gaukarana ita karaia totona.
4 Ena be tano haida lalonai iseda gaukara idia taravatulaia, bona tadikaka be dagedage bada idia davaria, reana edia moni gaukara bona edia ruma idia haboioa, bona dibura rumana dekenai idia atoa, to idia be mai edia goada ibounai danu haroro gaukara idia do karaia noho. Edia haheitalai namona ese ita ia hagoadaia haroro gaukara ita karaia noho totona, hegeregere taunimanima ita hamaorodia idia “mai”!—2 Tes. 3:9.
5 Taihu ta ese hereva momokani ia abia dae murina lagani 35 lalodiai, ia ura dikadika pioneer gaukara ia karaia. Iena lagani idia 70 neganai dala ia kehoa dainai, regular pioneer gaukara dekenai ia vareai. Taunimanima momo idia buruka neganai, gaukara matamatana ta idia ura lasi tahua. To taihu be idia bamona lasi. Pioneer gaukara be lagani haida ia karaia murinai, ia gwau: “Gaukara ia namo ia lao noho.” Lauma dalanai ia ese taunimanima momo ia hagoadaia badina gari lasi dekenai Iehova ena hahegani ia badinaia bona iena Basileia hesiai gaukarana ia habadaia dainai.
6 Keristen ginigunadia edia nega lalonai hegeregerena, hari inai negai danu, taunimanima ita hamaorodia neganai idia kamonai, edia kara idia haidaua, edia lalohadai idia haidaua, bona Dirava ia ura lasi karadia idia rakatania. Idia be tanobada ibounai dekenai ia noho gwauhamata tadikaka oreana lalonai idia vareai, bona lauma helaga bona headava matamata hahine idia durudia kudou-maoro taudia idia hamaorodia do idia “mai” totona.
7 Basileia ena gaukara ia bada ia lao, bona tano idauidau momo dekenai branch opesi idia noho dainai, ia hedinarai Iehova ese unai gaukara ia hanamoa. To kahirakahira inai nega dikana do ia ore. Unai dainai, hari be nega namona gari lasi dekenai bona mai iseda goada ibounai danu taunimanima ita hamaorodia do idia “mai” totona, bona kara haraga idia kamonai henia herevana idia badinaia totona.—Kara 20:26, 27; Roma 12:11.