Iehova ese ena Taunimanima Ia Hanamodia Noho
1 Iehova ena Witness taudia ese hahegani idia abia haroro gaukara idia karaia totona. (Mat. 24:14) Ena be lagani ta ta idia mai bona idia ore, to ita moale badina ia hedinarai Iehova ese ena taunimanima ia hanamodia noho. (Sal. 76:1) Kerere lasi dalana ai ia hakaudia namonamo.—2 Kor. 2:14.
2 Tanobada ena kahana momo dekenai, hegeregere Eastern Europe dekenai, dala ia kehoa dainai haroro gaukara badana be do idia karaia. Iseda faktori dekenai buka bona magasin milion momo idia karaia unai gaukara durua totona. Bena bouti amo idia siaia tanobada ena kahana idauidau dekenai bona kongregesen iboudiai dekenai. Unai idia karaia totona idia hegaegae namonamo be gau badana. Danu, Iehova ena lauma helaga ese tadikaka bona taihu momo ia hasiahudia nega ibounai hesiai gaukara idia karaia totona. Iena orea dekena amo Iehova ese gaukara ibounai ia naria namonamo.
3 Papua New Guinea dekenai kongregesen ta ta iboudiai be mai edia teritori idia lao haroro totona. Namona be ita ibounai ita ura iseda teritori dekenai idia noho taudia ibounai ita haroro henidia, aposetolo Paulo ese iena nega lalonai ia karaia bamona. (Kara 20:21, 24) Hari be nega namona dainai, namona be ita goada karaia iseda teritori dekenai idia noho taudia ibounai ita haroro henidia namonamo totona.
4 Unai anina be kongregesen ta ta ibounai dekenai elda taudia edia maduna be bada herea, ani? Oibe, unai be momokani. Namona be Filipi 2:19-24 ita duahia, bena do ita diba Paulo bona Timoteo ese edia tadikaka bona taihu idia laloa bada. Ai diba umui kongregesen elda taudia ibounai be unai haheitalai namona umui tohotohoa. Umui elda taudia be lalokau toana umui hahedinaraia neganai, tadikaka bona taihu be mai moale danu idia gaukara emui hakaua dalana hegeregerena.—Heb. 13:7, 17.
5 Tanobada ena kahana momo dekenai hekwakwanai idia vara dainai, ita ibounai be nega hanaihanai Iehova ena heduru ita tahua. Lagani gunanai, tanobada ena kahana haida dekenai, iseda tadikaka bona misinari taudia danu be dagedage ena hisihisi dikadia bona hetoho badadia idia davaria. Bible ena peroveta herevana ia gwau unai hetoho do ita abia badina ita be Iesu Keriso ena hahediba taudia bona ita be tanobada ena lasi dainai. (Ioane 15:19, 20; 2 Tim. 3:12) Ena be dahaka dika Iehova ia do koua lasi, to ita ia henia hahegani ia hedinarai goevagoeva. Namona be ita goada karaia tanobada ibounai dekenai taunimanima ita boiridia iseda lagani 1991 ena siri badana ena hereva hegeregerena, ia gwau: “Inai hereva idia kamonai taudia danu, namona be idia gwau, ‘Oi mai.’ ”—Apok. 22:17.
[Questions]
1. Iehova ena Witness taudia be lagani 1991 amo ia lao negana lalonai idia do gaukara noho lalonai, Bible ena hereva ese idia edena bamona ia hagoadaia?
2. (a) Tanobada ibounai dekenai haroro gaukara durua gaudia be dahaka? (b) Iehova be edena bamona iena gaukara ia naria?
3. (a) Iseda teritori dekenai haroro gaukara ita karaia namonamo totona aposetolo Paulo ena haheitalai ese ita edena bamona ia durua? (b) Papua New Guinea dekenai hari be nega namona haroro gaukara ita karaia totona, a? Korinto Iharuana 6:1, 2 dekenai, Paulo ena sisiba be dahaka?
4. (a) Elda taudia ibounai totona Paulo bona Timoteo edia haheitalai namona be dahaka? (b) Elda taudia be lalokau toana idia hahedinaraia neganai, tadikaka bona taihu be dahaka do idia ura karaia?
5. Iseda lagani 1991 ena siri badana hegeregerena, namona be dahaka ita karaia?
This article is unique to PNG.