Iehova Ia Henia Gaudia amo Edena Bamona Namo Lau Davaria Diba?

¹ Iehova ese lauma gaudia momo ita ia henia. Ia ese ita ia hadibaia. Ia ese ita ia hadibaia dahaka ita karaia ia ita hamoalea totona. (Isa. 48:17) Ia ese Keriso Iesu dekena amo ita ia hakaua. (Isa 55:4) Iehova ese ita ia hadibaia dainai bona Keriso Iesu ese ita ia hakaua dainai, tanobada ibounai dekenai Iehova ese iena orea ia habadaia noho.

² Iehova ese ita ia henia heduru gaudia haida be dahaka?

(a) Bible ia henia ita dekenai.​—Sal. 119:105; 2 Tim. 3:​16, 17.

(b) Iena orea ia haginia ita ia durua nega korikori dekenai Bible ena hereva ita lalo-pararalaia totona.​—Mat. 24:​45-47.

(c) Unai orea dekena amo ita ese Gima Kohorona bona Noga! magasin, buka, buklet, bona pepapepa momo bona ma gau haida danu ita abia.

(d) Kongregesen heboudia dekena amo hadibaia bona hagoadaia herevadia ita abia.​—Heb. 10:​24, 25.

UNAI HEDURU GAUDIA AMO EDENA BAMONA NAMO OI ABIA DIBA?

³ Bema ta ese aniani namona ia hegaegaelaia oi totona, unai aniani amo goada oi abia totona dahaka do oi karaia? Oi ania, ani? Bema ma tau ta ese ia ania unai ese oiemu tauanina do ia hagoadaia lasi. Oibe, bema oi ura goada oi abia bona oi ura oi mauri noho, gau badana be oi ese oi ania.

⁴ Atai hereva hegeregerena, Iehova ese ita totona lauma aniani namona ia hegaegaelaia. To lauma dalanai ita goada bona ita mauri noho totona, gau badana be ita ta ta ibounai be unai aniani ita “ania.” Unai lauma aniani be edena bamona oi “ania” diba?

(a) Oi sibona emu stadi lalonai Dirava ese ita ia henia heduru gaudia oi stadilaia namonamo. Oi guriguri bona stadi herevadia oi laloa namonamo.​—Sal. 1:​1-3; Her. 15:28.

(b) Hebou iboudiai dekenai oi lao bona haere eiava hereva oi henia.​—Heb. 10:​24, 25.

(c) Mataio 24:14 ena hahegani herevana oi badinaia bona Mataio 28:​19, 20 ena hereva hegeregerena, lou-henia bona Bible stadi oi karaia.

⁵ Oibe, Iehova ese ita ia henia heduru gaudia amo namo ita davaria totona, gau badana be ita ta ta ibounai ita hekwarahi. (1 Kor. 3:8) Iehova ese ia henia heduru gaudia amo namo idia abia totona idia hekwarahi taudia be Iehova ese ia lalokau henidia.​—2 Kor. 9:7.

This article is unique to PNG and is repeated in km 4/93.