Oi Aonega—Oi Diba Gaudia Oi Gaukaralaia
1 Kahirakahira taunimanima ibounai be edia mauri lalonai moale bona maino idia tahua. Buka bona magasin tausen momo ese sisiba idia henia headava namona abia totona, natudia hadibaia totona, bona moni gaukara namona abia totona, gorere koua noho totona, bona ma hereva haida danu taunimanima durudia bona moale do idia davaria totona. Ena be tanobada ena magasin lalonai aonega hereva haida idia noho taunimanima durudia totona, to idia momo herea be maino lasi bona moale lasi taudia. Dahaka dainai idia be unai bamona?
2 Haere be Bible buka Hereva Lada-isidia 1:7 dekenai ita davaria diba, ia gwau: “Iehova gari henia karana be lalo-parara kara ginigunana; kavakava taudia ese aonega bona sisiba idia dadaraia.” Bema taunimanima ese hereva momokani bona aonega ia havaraia Diravana, Iehova, idia abia dae lasi bona idia matauraia lasi, vadaeni maino bona moale do idia davaria diba lasi.
3 Lauma dalanai tanobada taudia be idia hitolo momokani. Unai be idia sibona edia kerere badina lauma aniani bada herea ia noho idia abia totona, bona ia be davana lasi. (Her. 1:20, 21; Apok. 22:17) Tanobada taudia be Iehova ena amo ia mai aonegana idia dadaraia, unai dainai lauma dalanai idia be dibura dekenai idia raka bona idia hekwarahi momo. (Her. 1:22-32) To ita Iehova ena taunimanima be idau, ita ese iena taravatu ita matauraia bona iena hahegani ita badinaia, unai dainai lauma aniani bada ita ania bona ita moale. (Isa. 65:13, 14) Danu, Iehova ena orea dekenai lalokau karana ia bada dainai, unai ese ia hahedinaraia ita be Keriso ena hahediba taudia korikori. (Ioane 13:35) Oibe, Iehova ena Witness taudia edia tadikaka ibounai oreana ena kara ese ia hahedinaraia taunimanima be Bible ena hahediba idia badinaia be aonega dalana momokani.
4 Reana Iehova ena orea idia bamoa taudia haida idia moale lasi, to moale idia abia diba. Danu, reana edia hereva bona kara amo ma haida edia moale karana idia hadikaia diba. Edena bamona unai idia karaia diba? Edia mauri lalonai Dirava ena aonega herevana idia badinaia lasi. Reana kongregesen ena hebou, sekit bona distrik hebouhebou dekenai idia lao, bena Society idia halasia buka bona magasin ibounai idia duahia, to edia mauri dalana bona edia kara, taunimanima haida bona Keristen taudia dekenai, danu ese ia hahedinaraia, idia ese idia diba vadaeni hereva momokanina idia badinaia lasi. Unai bamona taudia be dahaka idia karaia be gau badana? Namona be idia be “lauma ena gau [idia] hadoa” bona sibodia edia mauri lalonai moale korikori idia davaria bona idia bamoa taudia danu edia moale idia habadaia diba.—Gal. 6:7, 8.
HAHEITALAI: Tadikaka rua, John bona Alan be platfom dekenai idia gini. Inai haheitalai ia naria elda tauna ta be idia kahirakahira dekenai ia gini edia hereva ia kamonai henia totona.
John: Alan, tadikaka haida idia moale lasi lau dekenai. Tadikaka ta ese lau ia sisiba henia tanobada taudia lau turana henidia momo lasi totona. Lau laloa tadikaka haida be ita idia koua momo, unai dainai lau moale lasi.
Alan: John, bema unai bamona oi laloa, namona be oiemu lalohadai oi gwauraia elda ta dekenai.
John: Tadikaka dekenai lauegu lalohadai lau gwauraia hedinarai momo dainai lau hesiku. Idia lalo-parara lasi, inai tanobada dekenai lau gaukara dainai lau hekwarahi momo, unai dainai lau ura egu gaukara turadia danu ai moale sisina. Idia be taunimanima dikadia momokani lasi, bona nega momo ai inuinu hebou sisina. To, unai lau karaia dainai umui gwau lasi lau ese hereva momokani do lau rakatania.
Alan: Reana unai be momokani John, to lau laloa oi ia sisiba henia tadikakana ena hereva be maoro. Bema hanaihanai Witness lasi taudia oi bamoa, dika do oi davaria diba.
John: Lau moale lasi oiemu hereva dekenai! Lau laloa oi bona tadikaka haida be laga-ani karana momokanina umui diba lasi, bona umui diba lasi edena bamona umui moale diba!
Alan: John, lau sori, to namo lasi oi lau koia. Lau ura lasi oi lau habadua.
John: To lau oi habadua inai! (Doruna ia henia Alan dekenai, bona mai lalo-hekwarahi danu Alan ia raka oho.)
Elda Tauna: John, dahaka dainai oi lalo-hekwarahi? Lau itaia tadikaka Alan danu umui hepapahuahu sisina. Namona be ia dekenai oi lao umui hamaoromaoroa totona, ani?
John: Lau ese gau ta lau lalo-hekwarahilaia momo. Nega ta do ita herevaherevalaia diba, a?
Elda Tauna: (Hari ia be helai taudia ia hereva henidia) Iena lalo-hekwarahi ena badina ita diba vadaeni, to umui laloa edena bamona do umui durua diba lalohadai maorona ia abia totona? Namona be hari umui haere lasi, to umui laloa noho. Gabeai purana dekenai haheitalai amo, heduru herevana bona sisiba Bible dekena amo be mai hebogahisi danu idia henia dalana do ita itaia.
“Lauma ena Gau Ia Hadoa Neganai” Mauri Hanaihanai Ia Abia
HAHEITALAI:
Elda Tauna: Oibe, John, Iehova ena orea lalonai ita vareai be gau namona, bona lau diba unai bamona oi laloa danu, bona lau diba oi ura lasi gau ta ese emu noho orea dekenai ia hadikaia, ani?
John: Oibe! To lau laloa nega haida tadikaka be taravatu momo idia karaia. Lau ura lau sibona egu moale karana lau abia hidi, bona lau ura lasi tadikaka idia maumau lauegu moale karana dainai.
Elda Tauna: John, lau ura Galatia karoa 6 bona siri 8 ena hereva dokona oi duahia. Unai ese ita ia durua lalohadai maorona ita abia totona.
John: Ia namo. (Ia duahia sibona ena Bible amo.)
Elda Tauna: Oi itaia, ita ia sisiba henia “Lauma ena gau [ita] hadoa” totona. John, oi laloa unai ena anina be dahaka?
John: Reana anina be Bible ita stadilaia, hebou dekenai ita lao bona haroro gaukara ita karaia. To lau be unai kara ibounai lau karaia!
Elda Tauna: Oibe, unai be momokani, to oi laloa bema Witness lasi varavara bona ma taunimanima haida oi bamodia momo neganai, unai ese oi ia durua “Lauma ena gau [oi] hadoa” totona, a?
John: Reana, lasi.
Elda Tauna: John, bema unai bamona oi karaia dika oi davaria diba, badina sisina sisina oiemu “kara namona” do ia hadikaia diba 1 Korinto 15:33 ese ia gwauraia hegeregerena, to danu, Galatia karoa 6 ena siri 8 ena hamatamaia hereva hegeregerena, oi ia hakaua diba “tauanina ena ura [oi] hadoa” totona. Bona unai kara ese oi ia veria diba hereva momokani oi rakatania totona. Unai dainai elda taudia bona ma tadikaka haida idia lalo-hekwarahi momo oi totona. Idia ura lasi oiemu mauri oi haboioa bona Iehova ena nega matamata lalonai do oi vareai diba lasi.
John: Tadikaka Elda, lau moale Bible dekena amo lau oi durua dainai. Reana lau bamoa taudia haida lau abia hidi kerere, to hari lau diba lauegu hebamo karana lau laloa bada be namo. (Elda bona John be edia imana idia udeudea.)
[Questions]
1. (a) Ena be taunimanima momo be maino bona moale idia tahua, to dahaka ia vara? (b) Unai ese dahaka henanadai ia havaraia?
2. Dahaka dainai tanobada taudia idia moale lasi bona idia tuari heheni noho?
3. (a) Dahaka dainai taunimanima be lauma dalana dekenai idia hitolo? (b) Dahaka dainai Iehova ena taunimanima be lauma aniani bada idia abia? (c) Iehova ena Witness taudia be tanobada ibounai lalo-tamona ai tadikaka oreana dekenai idia noho dainai, unai ese dahaka ia hamomokania?
4. (a) Edena bamona ita diba hari inai nega Keristen taudia haida ese hereva momokanina idia badinaia lasi? (b) Unai bamona Keristen taudia be dahaka do idia karaia be gau badana?
This article has been taken partly from km-E 4/90 “Be Wise—Apply the Things That You Learn.”