Taunimanima Durudia Dibura Idia Rakatania bona Diari Ai Idia Lao Totona
1 Lauma dalanai dibura ese tanobada ia koua. (Isa. 60:2) Taunimanima be kara dika lalonai idia moru ena nega amo ia mai hari, Satana, “inai tanobada ena dirava,” ena siahu dainai lauma dalanai taunimanima be dibura dekenai idia noho, bona unai dainai edia mauri lalonai kara bodaga momo idia karaia.—2 Kor. 4:4.
2 Hereva momokani ena diari dekena amo ita lalo-parara dainai, Iesu bamona ita ese taunimanima ita hebogahisi henidia, a? (Mat. 9:36) Bema oibe, ita diba ia ese aposetolo Paulo dekenai ia henia gaukarana be mai anina bada, ia gwau taunimanima “edia matana oi kehoa, vadaeni dibura do idia rakatania, diari dekenai do idia giroa. Bona Satani ena siahu do idia rakatania, Dirava dekenai do idia giroa.”—Kara 26:16-18.
TAUNIMANIMA EDIA LALONA BONA KUDOUNA HADIARIA
3 Satana ese taunimanima edia lalona ia hadiburaia bona edia kudouna ia ha-aukaia, unai dainai, dahaka ese idia ia durua diba? Namona be Dirava ena Hereva idia dekenai ita hadibaia bona unai hereva be edia kudouna dekenai ia vareai momokani. Paulo ia guriguri Efeso taudia edia lalona do idia diari totona. (Ef. 1:17, 18) Dirava ena Hereva be heduru bada taunimanima edia lalona hamarerea totona, ma gau ta ese unai hereva ena siahu ia hanaia lasi. (Heb. 4:12) Unai ita lalo-pararalaia neganai, ita ia hagoadaia bona ita ura taunimanima dekenai ita hereva henia neganai Bible do ita gaukaralaia namonamo.
4 Henunai ai torea henanadai ese umui do idia durua emui haroro gaukara do umui hanamoa totona. Haroro gaukara do oi karaia totona oi hegaegae namonamo, a? Ruma taudia edia lalona do oi veria totona, ma tau ta danu hamatamaia herevadia namodia umui hegaegaelaia, a? Hua ena Kiki Herevana oi diba bona oi gaukaralaia, a? Ruma ta ruma ta gaukara dekenai Bible ena Hereva be taunimanima danu oi kikilaia idia laloa namonamo totona, a?—Kara 17:2.
GIMA KOHORONA BE HEDURU GAUNA BADANA TA
5 Gima Kohorona magasin ese taunimanima milion momo ia durudia dibura idia rakatania bona diari dekenai idia giroa totona. Ita ia hadibaia Bible ese ia gwauraia mauri ena kara goevadia edena bamona ita badinaia diba. Ita ia durua Bible ena peroveta herevadia edia anina hari inai nega lalonai ita diba totona, bona Iehova ia ura henia dalana dekenai ita raka totona, ita ia durua edena tomadiho be ia momokani bona edena tomadiho idia koikoi ita diba totona.
6 Gima Kohorona magasin lalonai Bible ena hereva momokanidia idia hedinarai dainai dahaka ia vara? Bese idauidau taudia ia durudia Dirava bona iena Natuna dekenai diba korikori idia abia bona unai amo hahemauri do idia abia. (Ioane 17:3; 1 Tim. 2:4) Unai magasin ia duahia tauna ta ia torea: “Gima Kohorona magasin lau moalelaia bada! Ia lalonai idia noho sivaraidia ese taunimanima iboudiai idia durudia ita noholaia negana ena anina idia diba totona. Gima Kohorona magasin ena sivarai umui torea totona hereva umui tahua namonamo, umui stadi, bona gaukara bada umui karaia dainai umui lau tanikiu henia bada. Unai be lauma aniani namona.”
LALOA NAMONAMO
7 October lalonai, henia gauna be Gima Kohorona sabskripsen, unai dainai namona be dala ita tahua bena taunimanima ita durudia diba dibura idia rakatania bona diari dekenai idia giroa totona. Ruma ta ruma ta gaukara dekenai ita lao neganai Bible ena hereva ita kikilaia totona, unai ese ita ia durua unai bamona do ita karaia totona. Basileia ena sivarai idia ura kamonai henia taudia ita davaria neganai, namona be Gima Kohorona magasin duahia hanaihanai karana be edena bamona idia ia durua diba be idia dekenai ita hadibaia. Bema ruma tauna be magasin ia diba vadaeni bona edia sivarai ia moalelaidia, namona be sabskripsen ena hereva oi gwauraia, reana do ia ura abia. Bema oi laloa hua 6 sabskripsen ia abia guna be namo, unai oi gwauraia diba. Unai kamonai tauna durua noho totona oi lou henia negadiai, do oi hagoadaia diba sabskripsen do ia abia lou totona.
8 Ruma ta ruma ta gaukara dekenai, dala dekenai, moni gaukara gabuna dekenai, sikuli dekenai, bona varavara taudia dekenai ita haroro neganai, ita ese taunimanima ruhaia ena hereva momokani harorolaia gaukarana ita durua. (Ioane 8:32) Gima Kohorona magasin ese idia ia durudia diba mauri namona idia abia totona, mauri hanaihanai ena helaro do idia abia totona, bona dibura idia rakatania bona diari dekenai idia giroa lao totona.
[Questions]
1. Satana ese taunimanima dekenai dahaka ia karaia?
2. (a) Iesu ese Paulo ia henia gaukarana be dahaka? (b) Dahaka dainai ita diba unai gaukara be mai anina bada?
3. (a) Satana ese taunimanima edia lalona bona kudouna dekenai dahaka ia karaia diba? (b) Dahaka do ita karaia be gau badana? (c) Iseda haroro gaukara dekenai Efeso 1:17, 18 bona Heberu 4:12 edia hereva be dahaka?
4. (a) Ita ta ta ibounai be edena henanadai do ita laloa be namo? (b) Paulo ena haheitalai namona be dahaka ita tohotohoa totona?
5. Gima Kohorona magasin ese edena bamona taunimanima milion momo ia durudia? Edena bamona oi ia durua?
6. Gima Kohorona magasin ia duahia tauna ta ena hereva be dahaka?
7, 8. Bese taudia ibounai dekenai Gima Kohorona ena namo be dahaka? Namona be unai ese ita ia hagoadaia dahaka do ita karaia totona?