Sivarai Namona Harorolaia—Lalo-Parara Dalana Amo
1 Dirava ena siahu amo idia torea aonega herevana ta, ia gwau: “Lalo-parara momokani ia abia tauna ena namo do ia bada.” (Her. 19:8) Iseda haroro gaukara dekenai nega momo unai aonega herevana ia momokani. Hegeregere, haroro gaukara dekenai lalo-parara bona hereva namonamo karadia amo pablisa taudia momo ese taunimanima edia koua herevana idia hanaia bona dala idia kehoa idia dekenai idia haroro totona. Eiava dala idia kehoa gabeai idia giroa idia haroro henidia totona. Edena bamona unai ita karaia diba?
KOUA HEREVANA HANAIA DALANA
2 Nega momo taunimanima ita hedavari henia neganai idia gwau, “Lau bisi.” To momokani ruma tauna ia bisi, eiava unai bamona ia hereva badina ia ura lasi kiki daudau karana dekenai ia vareai, a? Namona be lalo-parara ita hahedinaraia. Bema ita laloa ia bisi momokani lasi, reana iena koua herevana ita hanaia toho. Hegeregere inai bamona ita hereva diba: “Ia namo, do lau hereva daudau lasi.” Bena murinai, iseda kiki herevana ita hamaragia, to laloaboio lasi ita hamaoroa do ita kiki daudau lasi. Bema ia dekenai ita hemataurai bona hereva namona amo ena lalona ita veria, reana ruma tauna do ia gwau ma ita hereva sisina be ia namo.
3 Bema ita hereva henia tauna be momokani ia bisi, dahaka do ita karaia? Ena be ita ura lasi ita ia koua haraga, to bema ita doria iseda hereva ia kamonai henia totona, iena lalohadai Witness taudia dekenai do ia dika. Bema ruma hahine be iduara dekenai ia mai neganai iena imana dekenai nanadu gauna ia dogoatao, bona ia hegaegaelaia aniani bonana ita bonaia, ita diba momokani ia bisi. Unai dainai lalo-parara bona aonega ita hahedinaraia be namo. Namona be ia dekenai ita hemataurai bona do ita hereva daudau lasi. Namona be pepapepa ta ita henia bona ita hamaoroa ma nega ta do ita giroa mai ia ita hereva henia totona. Unai neganai iena lalohadai Witness taudia dekenai do ia namo, bona gabeai Witness tauna ta do ia vadivadi henia neganai, reana haroro herevana do ia ura kamonai henia.
TAUNIMANIMA EDIA KARA TOANA HEGEREGERENA ITA KARA HENIDIA
4 Ruma ta ruma ta gaukarana lalonai, nega haida taunimanima ita davaria neganai, ita idia hereva auka henia. Unai bamona ia vara neganai dahaka do ita karaia? Hereva Lada-isidia 17:27 ena sisiba be inai: “Lalo-parara tauna be ia badu haraga lasi.” Unai sisiba be namo herea! Mai hebogahisi bona manau gadona amo ita hereva henia neganai, reana unai hereva auka tauna ena lalona ita hakerua diba. Ma danu, bema hereva namonamo karana amo ena lalona ita veria diba bona ia sibona ia laloa bada sivaraina ta ia kikilaia, reana ita do ia dadaraia haraga lasi. Reana ena be iseda hereva do ia utua, to bema mai manau danu ita haere henia, iena lalohadai Iehova ena Witness taudia edia gaukara dekenai do ia namo sisina. Bema unai bamona ia vara kara namona ta ita karaia vadaeni. Momokani, bema ruma tauna ia badu dikadika, namona be ita hereva lasi to reana ia ita rakatania bona ma nega ta dekenai do ita haroro henia toho.
5 Taunimanima haida ena be iseda hereva idia hepapahuahulaia, to idia laloa idia maoro dainai unai bamona idia karaia. Unai bamona ia vara neganai, reana unai ese iseda haheauka ia tohoa, to namona be idia danu do ita herevahereva noho be namo. Bema ita be lalo-parara taudia, ruma tauna ta be ia abia dae herevana be mai goada danu ia herevalaia neganai, do ita gwau lasi unai badina dainai ia be hereva momokani ia ura lasi kamonai henia. To namona be henanadai namodia ita henia bena ia ese unai lalohadai ia abia dae ena badina reana do ia gwauraia hedinarai, bena unai neganai Bible ena hereva unai sivarai dekenai ita hahedinarai henia diba. (Her. 20:5) Iena kara toana hegeregerena, do ita diba ita kiki noho be namo eiava lasi.
6 Mai ena lalo-parara pablisa tauna ia diba nega momo, nega bona kara haida ese ruma taudia edia lalohadai Basileia Sivaraina dekenai idia haidaua diba. Reana gabeai do ita lao henia neganai, ena kara ma do ia idau. Namo lasi ita laloa guna ia kamonai henia lasi dainai, hari do ia ura kamonai lasi danu.
7 Taunimanima danu ita kiki noho hebou eiava lasi ita diba totona be ia auka. To, bema iseda diba hadibaia dalana dekenai ita habadaia, unai ese ita ia durua lalo-parara dekenai sivarai namona do ita harorolaia totona, bona Iehova dekenai do ita tabekau iseda gaukara ena anina do ia havaraia totona.—1 Kor. 3:6; Tito 1:9.
[Questions]
1. (a) Hereva Lada-isidia 19:8 ena sisiba herevana ita dekenai be dahaka? (b) Iseda haroro gaukara dekenai edena bamona unai sisiba ia momokani?
2. Ruma tauna ia gwau “Lau bisi” neganai, unai koua herevana ita hanaia totona dahaka do ita gwau diba?
3. Ruma tauna be momokani ia bisi neganai, dahaka ita karaia diba iena lalohadai Witness taudia dekenai ia namo totona?
4. Taunimanima ta ese ita ia hereva auka henia eiava ita ia badu henia neganai, lalo-parara karana be edena bamona ita hahedinaraia diba?
5. (a) Ruma tauna ta be ia abia dae herevana be ia idau bona ia be mai goada danu ia herevalaia neganai, lalo-parara karana be edena bamona do ita hahedinaraia diba? (b) Unai neganai, Hereva Lada-isidia 20:5 ena sisiba be edena bamona ita ia durua diba?
6, 7. (a) Bema guna ruma tauna ia dagedage, namona be pablisa ena lalohadai be dahaka unai ruma dekenai ia lao henia neganai? (b) Ita totona dahaka sisiba hereva namona ia noho 1 Korinto 3:6 dekenai? Tito 1:9 dekenai?