Henanadai

◼ Baibel amo haere ta ita abia totona eiava heduru ita tahua totona Society ita telefon henia be maoro, a?

Kara ta idia karaia haraga totona taunimanima momo be telefon idia gaukaralaia, to nega momo idia karaia haraga sibona idia laloa lasi. Tanobada taudia be nega momo hekwakwanai lasi dalana idia tahua; taunimanima idia ura lasi idia hekwarahi.

Dirava ena sisiba ita dekenai be idau herea! Ita ia hagoadaia aonega ita tahua totona, idia hunia kohu namona ita tahua bamona, unai anina be mai iseda ura danu ita ura ita hekwarahi. Idia vara vadaeni gaudia ese idia hahedinaraia goevagoeva bema unai bamona ita karaia moale bada do ita abia.​—Her. 2:​1-4.

Hebou totona ita hegaegae neganai bema hereva ta ita daradaralaia, eiava hekwakwanai ta ia vara neganai, aonega abia totona ita hekwarahi be gau badana. Maoromaoro Society ita telefon henia neganai namo sisina ita abia, to ita sibona be Baibel amo bona iseda durua bukadia, hegeregere Watch Tower Publications Index mai ena Baibel siri bona sivarai edia indeks gaudia, amo hereva ita tahua neganai, namo bada do ita abia.

Unai ‘idia hunia kohu namodia ita tahua’ murinai, bema heduru ma haida ita ura abia, elda taudia dekenai ita lao diba. Elda taudia edia diba Baibel dekenai be bada bona sivarai tahua dalana idia manadalaia. Bema ita dekenai hekwakwanai ta ia vara eiava dala ta do ita abia hidi gwauraia dainai edia heduru ita tahua, unai be maoro badina idia be laloa maoromaoro taudia bona ita bona iseda hekwakwanai idia diba namonamo.​—Kara 8:​30, 31 itaia danu.

Bema ita laloa namona be Society dekena amo heduru hereva ma haida do ita abia, leta ta ita siaia be namo. Unai leta torea totona elda taudia be idia heduru diba. Leta ita siaia neganai, nega ia noho unai hereva ena haere idia tahua bona idia laloa namonamo totona, telefon amo unai bamona idia karaia diba lasi.